පසුතැවිලි වීමේ ස්වාමින්වහන්සේගේ ත්‍යාගය වැළඳ ගන්න

ආදරණීය ස්වර්ගික පියාණන්වහන්සේ ගැන මම සාක්ෂි දරනවා. 2019 අප්‍රියෙල් ප්‍රධාන සම්මන්ත්‍රණයේදී, හැත්තෑවරුන්ගේ ප්‍රධාන අධිකාරීවරයෙකු ලෙස මගේ නව වගකීමෙහි තහවුරු වී මොහොතකට පසු, ගීතිකා කණ්ඩායම විසින් “I Stand All Amazed” ගීතිකාව ගායනා කළා, එය මගේ හදවත සහ ආත්මය පාසාරු කරගෙන ගියා.

ඒ වචන ටික ඇහුන ගමන් මම ඇත්තෙන්ම පුදුම වුණා. මගේ දුර්වලතා සහ අඩුපාඩු තිබියදීත්, “උන්වහන්සේගේ ශක්තියෙන් මට සියල්ල කළ හැකි” බව දැන ගැනීමට ස්වාමින්වහන්සේ මට ආශිර්වාද කළ බව මට හැඟුණා.

අප්‍රමාණවත් බව, දුර්වලකම හෝ නුසුදුසුකම වැනි පොදු හැඟීම් අපගෙන් බොහෝ දෙනෙක් සමහර විට අරගල කරන දේවල්. මම තවමත් මේවා සමඟ අරගල කරනවා; මට ඒ කැඳවීම ලැබුණු දවසෙ මට ඒක දැනුණා. මට එය බොහෝ වාරයක් දැනී තිබෙනවා, ඒවගේම තවමත් ඔබ සමඟ කතා කරන විට එය මට දැනෙනවා. කෙසේ වෙතත්, මෙම හැඟීම් සමඟ මා තනිව නැති බව මම ඉගෙන ගත්තා. ඇත්ත වශයෙන්ම, මේ හා සමාන හැඟීම් ඇති බව පෙනෙන අයගේ වාර්තා බොහොමයක් ශුද්ධලියවිලිවල තිබෙනවා. නිදසුනක් වශයෙන්, අපිට නෙපීව මතක තියෙන්නෙ ස්වාමින්වහන්සේගේ ඇදහිලිවන්ත සහ නිර්භීත සේවකයෙකු ලෙසයි. සමහර අවස්ථාවලදී, ඔහු පවා නුසුදුසුකම, දුර්වලකම සහ ප්‍රමාණවත් නොවීම වැනි හැඟීම් සමඟ පොරබැදුවා.

ඔහු මෙහෙම කිව්වා, “කෙසේවෙතත්, උන්වහන්සේගේ බලවත් හා ආශ්චර්යවත් වැඩ මට පෙන්වීටම තරම් වූ ස්වාමින්වහන්සේගේ බලවත් යහපත්කම තිබියදීත් මගේ හදවත මෙසේ කියාපායි: අහෝ කාලකණ්නි මිනිසා වන මම! එසේය, මාගේ මාංසය නිසා මගේ හිත දුක්වෙයි; මගේ අයුතුකම් නිසා මගේ ප්‍රාණය ශෝක වෙයි.”

ඔහුගේ යෞවන කාලයේදී, “[ඔහුගේ] දුර්වලකම් සහ අසම්පූර්ණත්වය” නිසා බොහෝවිට ඔහුව “හෙළාදැමීමට” ලක්වීම ගැන ජෝසෆ් ස්මිත් අනාගතවක්තෘවරයා කතා කළා. නමුත් ජෝසෆ්ගේ ප්‍රමාණවත් නොවීම සහ කනස්සල්ල පිළිබඳ හැඟීම් ඔහුව මෙනෙහි කිරීමට, අධ්‍යයනය කිරීමට, ඉගෙනීමට සහ යාච්ඤා කිරීමට පෙලඹවූ හේතු වලින් කොටසක් වෙනවා. ඔබට මතක ඇති පරිදි, ඔහු සත්‍යය, සාමය සහ සමාව සොයාගැනීම සඳහා යාච්ඤා කිරීමට ඔහුගේ නිවස අසල පිහිටි වනයට ගියා. ස්වාමින්වහන්සේ මෙසේ කියනු ඔහුට ඇසුණා: “ජෝසෆ්, මාගේ පුත්‍රය, ඔබේ පව් ඔබට කමා කරන ලදී. නුඹේ මග යන්න, මාගේ ව්‍යවස්ථාව අනුව ගමන් කර මාගේ ආඥා පවත්වන්න. බලන්න, මම මහිමයේ අධිපතියාණන් වෙමි. මාගේ නාමය විශ්වාස කරන සියල්ලන්ට සදාකාල ජීවනය ලැබෙන පිණිස, මා ලෝකය උදෙසා කුරුසියේ ඇණ ගසනු ලැබුවෙමි.”

පසුතැවිලි වී තම ආත්මයේ ගැලවීම සෙවීමට වූ ජෝසෆ්ගේ අවංක ආශාව ඔහුට යේසුස් ක්‍රිස්තුස්වහන්සේ වෙත පැමිණ ඔහුගේ පව්වලට සමාව ලබා ගැනීමට උපකාර වුණා. මෙම අඛණ්ඩ උත්සාහය මගින් යේසුස් ක්‍රිස්තුස්වහන්සේගේ ශුභාරංචිය අඛණ්ඩව නැවත පිහිටුවීමට දොර විවර කළා.

දුර්වලකම සහ ප්‍රමාණවත් නොවීම පිළිබඳ හැඟීම් මගින් අපගේ වැටී ඇති ස්වභාවය හඳුනා ගැනීමට උපකාරී වන ආකාරය අනාගතවක්තෘ ජෝසෆ් ස්මිත්ගේ මෙම විශිෂ්ට අත්දැකීම පෙන්නුම් කරනවා. අප නිහතමානී නම්, යේසුස් ක්‍රිස්තුස්වහන්සේ මත අපගේ යැපීම හඳුනා ගැනීමටත්, ගැලවුම්කරුවාණන් වෙත හැරී අපගේ පව් ගැන පසුතැවිලි වීමටත් අපගේ හදවත් තුළ අවංක ආශාවක් ඇති කරගැනීමටත් මෙය අපට උපකාර කරයි.

මගේ මිත්‍රවරුනි, පසුතැවීම කියන්නෙ ප්‍රීතියක්! මිහිරි පසුතැවිලි වීම කියන්නෙ “පේළියෙන් පේළිය, ආඥාවෙන් ආඥාව,” සිදුවන දෛනික ක්‍රියාවලියක කොටසක්, එමඟින් ස්වාමින්වහන්සේ අපට උන්වහන්සේගේ ඉගැන්වීම් කේන්ද්‍ර කරගත් ජීවිතයක් ගත කිරීමට උගන්වනවා. ජෝසෆ් සහ නෙපී මෙන් අපටත් “කරුණාව උදෙසා [දෙවියන්වහන්සේට] මොරගැසීමට පුළුවන; මක්නිසාද උන්වහන්සේ ගලවාගැනීමට බලවත් සේක.” උන්වහන්සේට ඕනෑම ධර්මිෂ්ඨ ආශාවක් හෝ බලාපොරොත්තුවක් ඉටු කළ හැකි අතර අපගේ ජීවිතයේ ඕනෑම තුවාලයක් සුව කරන්න පුළුවන්.

යේසුස් ක්‍රිස්තුස්වහන්සේගේ තවත් ගිවිසුමක් වන මොර්මොන්ගේ පොතෙහි, අවංක පසුතැවිල්ලකින් ක්‍රිස්තුස්වහන්සේ වෙතට පැමිණෙන ආකාරය ඉගෙනගත් පුද්ගලයන්ගේ ගණන් කළ නොහැකි වාර්තා ඔබටත් මටත් සොයාගන්න පුළුවන්.

මගේ ආදරණීය නිජබිම වන පුවර්ටෝ රිකෝ දූපතේ සිදු වූ අත්දැකීමක් තුළින් ස්වාමින්වහන්සේගේ මුදු මොළොක් දයාව පිළිබඳ උදාහරණයක් ඔබ සමඟ බෙදා ගැනීමට මම කැමතියි.

මගේ උපන් ගම වන පොන්ස් හි සභාවේ සහෝදරියක් වන සීලියා කෲස් අයාලා, ඇය මොර්මොන්ගේ පොතක් මිතුරෙකුට දිය යුතු බව තීරණය කළා. ඇය එය ඔතා දියමන්ති හෝ මැණික්වලට වඩා ඇයට වටිනා මෙම තෑග්ග ලබා දීමට පිටත්ව ගියා. ඇය යන අතරමගදී සොරෙකු ඇය අසලට පැමිණ ඇගේ බෑගය උදුරා ගෙන එහි තිබූ විශේෂ තෑග්ග රැගෙන පලා ගියා.

සභාවේදී ඇය මේ කතාව පැවසූ විට ඇගේ මිතුරිය පැවසුවේ “කවුද දන්නේ? සමහරවිට ශුභාරංචිය බෙදාගැනීමට මෙය ඔබට අවස්ථාවක් වෙන්න පුළුවන්!”

හොඳයි, දින කිහිපයකට පසු, සිදු වූ දේ ඔබ දන්නවාද? සීලියාට ලිපියක් ලැබුණා. සීලියා මා සමඟ බෙදාගත් එම ලිපිය අද මම මගේ අතේ තබාගෙන ඉන්නවා. එහි මෙසේ සඳහන් වෙනවා:

“කෲස් මහත්මිය, මහත්මිය:

“මට සමාවෙන්න, මට සමාවෙන්න. ඔබට පහර දීම ගැන මම කොතරම් කණගාටු වෙනවාද කියා ඔබ කිසි විටෙකත් වටහා ගන්න එකක් නෑ. ඒත් ඒක නිසා මගේ ජීවිතය වෙනස් වෙලා, ඒවගේම ඉදිරියටත් වෙනස් වෙමින් තිබෙනවා.

“ඒ පොත [මොර්මොන්ගේ පොත] මගේ ජීවිතයට මට උපකාර කර තිබෙනවා. ඒ දෙවියන්වහන්සේගේ මනුෂ්‍යයාගේ සිහිනය මාව සසල කළා. … මම ඔබේ [ඩොලර්] පහ ආපසු එවනවා, මට ඒවා වියදම් කරන්නට බැහැ. ඔබ දීප්තිමත් පුද්ගලයෙක් බව ඔබ දැනගන්නවාට මම කැමතියි. එම ආලෝකය මා [ඔබට හානි කිරීමෙන් වළක්වන බවක් පෙනෙන්නට තිබුණා, එබැවින්] මම ඒ වෙනුවට පලා ගියා.

“ඔබ නැවතත් මාව දකින බව ඔබ දැනගන්නවාට මම කැමතියි, නමුත් ඔබ මාව දකිද්දි, ඔබ මාව හඳුනාගන්න එකක් නෑ, මොකද මම ඔබේ සහෝදරයෙක් විදියට ඉඳී. … මම ජීවත් වන ප්‍රදේශයේ, මම ස්වාමින්වහන්සේව සොයාගෙන ඔබ අයත් සභාවට මම යා යුතුයි.

“ඒ පොතේ ඔයා ලියපු පණිවිඩය කියවීමෙන් මගේ ඇස්වලට කඳුළු ආවා. බදාදා රෑ ඉඳන් මට ඒක කියවන එක නවත්තගන්න බැරි වුණා. මම යාච්ඤා කරමින් මට සමාව දෙන ලෙස දෙවියන්වහන්සේගෙන් ඉල්ලා සිටියා, [ඒවගේම] මට සමාව දෙන ලෙස මම ඔබෙන් ඉල්ලා සිටිනවා. … මම හිතුවේ ඔයාගේ ඔතපු තෑග්ග මට විකුණන්න පුළුවන් දෙයක් වෙයි කියලා. [ඒ වෙනුවට,] එය මට මගේ ජීවිතය [වෙනස් කරගැනීමේ] අවශ්‍යතාවය ලබා දුන්නා. මට සමාව දෙන්න, මට සමාව දෙන්න, මම ඔබෙන් අයදිනවා.

“ඔබ නොදන්නා ඔබගේ මිතුරා.”

සහෝදර සහෝදරියනි, අපගේ තත්වයන් මොනවා වුවත් ගැලවුම්කරුවාණන්ගේ ආලෝකයට අප සැම වෙතම ළඟා වෙන්න පුළුවන්. “ක්‍රිස්තුස්වහන්සේගේ වන්දිගෙවීමේ අසීමිත ආලෝකය තුළ බැබළෙනවාට වඩා පහතට ගිලෙන්නට ඔබට නොහැක” කියා සභාපති ජෙෆ්රි ආර්. හොලන්ඩ් පැවසුවා.

සීලියාගේ තෑග්ග වන මොර්මොන්ගේ පොත අනපේක්ෂිත ලෙස ලබාගත් පුද්ගලයා සම්බන්ධයෙන් කියනවා නම්, මෙම සහෝදරයා ස්වාමින්වහන්සේගේ දයාව වැඩි වැඩියෙන් දැකීමට ගියා. මෙම සහෝදරයාට තමාටම සමාව දීමට කාලය ගත වුවද, ඔහු පසුතැවිලි වීමෙන් සතුටක් ලැබුවා. එය කෙතරම් නම් ප්‍රාතිහාර්යක්ද! එක් ඇදහිලිවන්ත සහෝදරියක්, එක් මොර්මොන්ගේ පොතක්, අවංක පසුතැවිල්ලක් සහ ගැලවුම්කරුවාණන්ගේ බලය හරහා ස්වාමින්වහන්සේගේ ශුභාරංචියේ සහ උන්වහන්සේගේ ගෘහයේ පරිශුද්ධ ගිවිසුම්වල පූර්ණ ආශිර්වාදය භුක්ති විඳීමට කෙනෙකුට එය හේතු වුණා. අනෙකුත් පවුලේ සාමාජිකයන් පූර්ණ කාලීන ධර්මදූත සේවය ඇතුළුව ස්වාමින්වහන්සේගේ මිදිවත්තේ පරිශුද්ධ වගකීම් අනුගමනය කළ අතර පිළිගත්තා.

අපි යේසුස් ක්‍රිස්තුස්වහන්සේ වෙතට පැමිණෙන විට, අපගේ අවංක පසුතැවිල්ලේ මාර්ගය අවසානයේදී අපව ගැලවුම්කරුවාණන්ගේ ශුද්ධ වූ දේවමාළිගාවට ගෙන යනවා.

ශුද්ධ වූ දේවමාළිගාවේ ගිවිසුම් තුළින් අපගේ ස්වර්ගික පියාණන්වහන්සේ සහ උන්වහන්සේගේ පුත්‍රයාණන් විසින් කළ හැකි ආශීර්වාදවල පූර්ණත්වයට සුදුස්සෙකු වීම—පවිත්‍ර වීමට වෑයම් කිරීම, කොතරම් ධර්මිෂ්ඨ චේතනාවක්ද! ස්වාමින්වහන්සේගේ දේවමාළිගාවේ නිතිපතා සේවය කිරීම සහ එහි දී අප කරන පරිශුද්ධ ගිවිසුම් පවත්වා ගැනීමට උත්සාහ කිරීම මගින්, අපගේ ගැලවුම්කරුවාණන් හා සමාන වීමට අපට අවශ්‍ය හදවත, ශක්තිය, මනස සහ ප්‍රාණයේ වෙනස අත්විඳීමට අපගේ ආශාව සහ හැකියාව යන දෙකම වැඩි කරනවා. සභාපති රසල් එම්. නෙල්සන් මෙසේ සාක්‍ෂි දී තිබෙනවා: “[දේවමාළිගාවේ නමස්කාර කිරීමට] වඩා වෙනත් කිසිවක් ස්වර්ගය විවෘත නොකරනු ඇත. වෙනත් කිසිවක් එය නොකරනු ඇත!”

මගේ හිතවත් මිත්‍රවරුනි, ඔබට ප්‍රමාණවත් නොවන බවක් දැනෙනවාද? ඔබ නුසුදුසු යැයි හැඟෙනවාද? ඔබ ඔබගේම තීරණ ගැන ප්‍රශ්න කරනවාද? සමහර විට ඔබ කනස්සල්ලට පත්ව මෙසේ අසනවා වෙන්න පුළුවන්: මම ප්‍රමාණවත්ද? මට පරක්කු වැඩිද? මම මගේ උපරිමයෙන් උත්සාහ කරන විට මම අසාර්ථක වන්නේ ඇයි?

සහෝදර සහෝදරියනි, නිසැකවම අපගේ ජීවිතවල අපේ අතින් වැරදි සිදුවෙනවා. නමුත් කරුණාකර මතක තබා ගන්න, වැඩිහිටි ගෙරිට් ඩබ්. ගොන්ග් ඉගැන්වූ පරිදි: “අපගේ ගැලවුම්කරුවාණන්ගේ වන්දිගෙවීම අසීමිත සහ සදාකාලිකයි. අපි හැමෝම වෙනත් මාර්ග වල යනවා ඒවගේම වැරදි කරනවා. අපිට ටික කාලෙකට යන එන මං නැති වෙන්න පුළුවන්. අප කොතැනක සිටියත් කුමක් කළත් නැවත පැමිණීමට නොහැකි වීමක් නැති බව දෙවියන්වහන්සේ ප්‍රේමණීය ලෙස අපට සහතික කරනවා. උන්වහන්සේ අපව වැළඳගැනීමට සූදානම්ව සිටිනවා.”

මගේ ආදරණීය බිරිඳ, කැරි ලූ ද මට උගන්වා ඇති පරිදි, අපි සියල්ලෝම පසුතැවිලි වී, ආපසු හැරීමට සහ සෑම දිනකම “ශුන්‍ය වේලාවට” කාලය නැවත සකස් කළ යුතුයි.

බාධා පැමිණෙයි. දෙවියන්වහන්සේ වෙත හැරීමට පෙර දේවල් දුෂ්කර වන තෙක් අපි බලන් ඉන්නේ නැහැ. සැබෑ ලෙස පසුතැවිලි වීමට අපි අපගේ ලෞකික ජීවිතයේ අවසානය තෙක් බලා නොසිටිමු. ඒ වෙනුවට, අපි දැන්, ගිවිසුම් මාවතේ අපි කුමන කොටසක සිටියත්, යේසුස් ක්‍රිස්තුස්වහන්සේගේ මිදීමේ බලය කෙරෙහි සහ අප ස්වර්ගික පියාණන්වහන්සේ වෙතට නැවත පැමිණෙනවාට උන්වහන්සේගේ ආශාව කෙරෙහි අවධානය යොමු කරමු.

ස්වාමින්වහන්සේගේ ගෘහය, උන්වහන්සේගේ ශුද්ධලියවිලි, උන්වහන්සේගේ ශුද්ධ වූ අනාගතවක්තෘවරුන් සහ ප්‍රේරිතවරුන් ක්‍රිස්තුස්වහන්සේගේ දහම තුළින් පුද්ගලික ශුද්ධකම කරා අපව පොලඹවනවා.

ඒවගේම නෙපී මෙසේ කිව්වා: “තවද දැන් බලන්න, මගේ ආදරණීය සහෝදරවරුනි, මාර්ගය මෙයයි; තවද දෙවියන්වහන්සේගේ රාජ්‍යයෙහි මනුෂ්‍යයාට ගැලවිය හැකි වෙනත් මාර්ගයක් හෝ ස්වර්ගයට යටින් දෙන වෙනත් නාමයක් නොමැත්තේය. තවද දැන්, බලන්න, මෙය ක්‍රිස්තුස්වහන්සේගේ දහම වේ, තවද පියාණන්වහන්සේගේද, පුත්‍රයාණන්වහන්සේගේද ශුද්ධාත්මයාණන්වහන්සේගේද එකම හා සැබෑ දහම වේ.”

දෙවියන්වහන්සේ සමඟ “එක්කෙනෙක් වීමේ” අපගේ ක්‍රියාවලිය අභියෝගාත්මක වෙන්න පුළුවන්. නමුත් ඔබටත් මටත් විරාමයක් ගෙන, නිශ්චලව, ගැලවුම්කරුවාණන් දෙස බලා, අප වෙනස් කිරීමට අවශ්‍ය දේ සොයා ගැනීමට සහ ඒ අනුව ක්‍රියා කිරීමට උත්සාහ කරන්න පුළුවන්. අපි සම්පූර්ණ චේතනාවෙන් එය කරන්නේ නම්, අපි උන්වහන්සේගේ සුවය සාක්ෂාත් කර ගනියි. ඒවගේම අපි ස්වාමින්වහන්සේගේ පසුතැවිල්ල නමැති ත්‍යාගය වැලඳ ගන්නා විට අපගේ අනාගත පරපුර ආශිර්වාද ලබන්නේ කෙසේදැයි සිතා බලන්න!

එය අසීරු වුවත්, මගේ පියාණන්ට ඉගැන්වූ ප්‍රධාන කුඹල්කරු අපව හැඩගස්වා පිරිපහදු කරයි. එසේ වුවද, ප්‍රධාන සුව කරන්නා අපව පවිත්‍ර කරයි. මම එම සුව කිරීමේ බලය අත්විඳ තිබෙනවා ඒවගේම අත්විඳිමින් ඉන්නවා. එය පැමිණෙන්නේ යේසුස් ක්‍රිස්තුස්වහන්සේ කෙරෙහි ඇදහිල්ලෙන් සහ දිනපතා පසුතැවිලි වීමෙන් බව මම සාක්ෂි දරනවා.

දෙවියන්වහන්සේගේ ආදරය සහ උන්වහන්සේගේ පුත්‍රයාණන්ගේ වන්දිගෙවීමේ අසීමිත බලය ගැන මම සාක්ෂි දරනවා. අපි අවංකව සහ මුළු හදවතින්ම පසුතැවිලි වන විට අපට එය ගැඹුරින් දැනෙනවා.

මගේ මිත්‍රවරුනි, මම අනාගතවක්තෘ ජෝසෆ් ස්මිත් හරහා ශුභාරංචිය නැවත පිහිටුවීමේ සහ ගැලවුම්කරුවාණන්ගේ අනාගතවක්තෘවරයා සහ මුඛය වන සභාපති රසල් එම්. නෙල්සන් හරහා ලැබෙන උන්වහන්සේගේ වර්තමාන දිව්‍යමය මගපෙන්වීම පිළිබඳ සාක්ෂිකරුවෙක්. යේසුස් ක්‍රිස්තුස්වහන්සේ ජීවත් වන බවත් උන්වහන්සේ අපගේ ප්‍රාණයන් හි ප්‍රධාන සුව කරන්නා බවත් මම දන්නවා. මේ දේවල් සත්‍ය බව මම දන්නවා ඒවගේම මම සාක්ෂි දරනවා, යේසුස් ක්‍රිස්තුස්වහන්සේගේ ශුද්ධ වූ නාමයෙන්, ආමෙන්.