අපට උදව් කිරීමට උන්වහන්සේගේ හස්තය සූදානම්

වැඩිහිටි ජුවාන් පබ්ලෝ විල්ලාර් විසින්

හැත්තෑවරුන්ගේ

අප ඇදහිල්ලෙන් යේසුස් ක්‍රිස්තුස්වහන්සේ වෙත ළඟා වන විට, උන්වහන්සේ සැමවිටම ඉන්නවා.

මම ළමා කාලේ, නිවාඩුවට අපි පවුලක් ලෙස, මගේ උපන් රට වන චිලී දේශයේ, වෙරළ තීරයට ගියා. මගේ පවුලේ අය සමඟ ගිම්හානය සතුටින් දින කිහිපයක් ගත කිරීමට මම උනන්දුවෙන් හිටියා. මගේ සහෝදරයෝ දෙන්නා සාමාන්‍යයෙන් වතුර උඩ විනෝදයට කරන දේවල් අන්තිමට මටත් ඔවුන් සමඟ එකතු වෙලා කරන්න පුළුවන් කියලා හිතුන නිසා මමත් ගොඩක් සතුටු වුණා.

දවසක් මගේ අයියලා රළ කඩාගෙන එන තැන සෙල්ලම් කරන්න ගියා, ඔවුන් පස්සෙන් යන්න මම ලොකුයි සහ පරිණතයි කියලා මට සිතුණා. මම ඒ ප්‍රදේශය දෙසට ගමන් කරද්දී මට තේරුණා රළ වෙරළේ සිට පෙනෙනවාට වඩා විශාලයි කියලා. එකපාරටම රැල්ලක් වේගයෙන් මගේ ළඟට ආවේ මාව පුදුමයට පත් කරමින්. සොබාදහමේ බලය මා අත්පත් කර ගත්තාක් මෙන් මට දැනුණු අතර, මාව මුහුදේ ගැඹුරට ඇදගෙන ගියා. මට කිසිම දෙයක් දකින්න වත් දැනෙන්නවත් බැරි වුණා, මාව එහාට මෙහාට විසි කරලා දැම්මා. පොළොවේ මගේ වික්‍රමයන් අවසන් වනු ඇතැයි මම සිතන විට, අතක් මාව මතුපිට දෙසට ඇදගෙන යන බවක් මට දැනුණා. අවසානයේ, මට ඉර දකින්න හා හුස්ම අල්ලගන්න පුළුවන් වුණා.

මගේ සහෝදරයා ක්ලෝඩියෝ වැඩිහිටියෙකු ලෙස ක්‍රියා කිරීමට මා දරන උත්සාහය දැක මා බේරා ගැනීමට ඇවිල්ලා තියෙනවා. මම වෙරළට ගොඩක් දුරින් නෙමේ හිටියේ. ජලය නොගැඹුරු වුවත්, මම අන්දමන්ද වී සිටිය අතර මට මටම උදව් කරගන්න පුළුවන් බව මම දැන සිටියේ නෑ. මම පරිස්සම් විය යුතු බවත්, මට අවශ්‍ය නම් එයාට මට උගන්වන්න පුළුවන් බවත් ක්ලෝඩියෝ මට කිව්වා. වතුර ගැලුම් ගනන් මට පෙවී තිබුණත්, ලොකු කොල්ලෙක් වෙන්න තිබුණු මගේ අභිමානයයි ආශාවයි තවත් ශක්තිමත් වෙලා, මම “හා” කියලා කිව්වා.

මම රළ වලට පහර දිය යුතු බව ක්ලෝඩියෝ මට කිව්වා. දැවැන්ත ජල පවුරක් මෙන් පෙනෙන ඒ සටනට එරෙහිව මම නිසැකවම පරාජය වන බව මම මටම කියා ගත්තා.

අලුත් විශාල රැල්ලක් ළං වන විට ක්ලෝඩියෝ ඉක්මනින් මෙසේ කිව්වා, “මගේ දිහා බලන්න; මෙහෙමයි ඔයා ඒක කරන්නේ.” ක්ලෝඩියෝ එන රැල්ල දෙසට දිව ගිය අතර එය කැඩී යාමට පෙර එය තුළට කිමිදුනා. ඔහුගේ කිමිදීම ගැන මම කොයිතරම් පැහැදුණාද කියනවා නම්, ඊළඟ එන රැල්ල මට නොපෙනී ගියා. ඒ නිසා නැවතත් මාව මුහුදේ ගැඹුරට යවා සොබාදහමේ බලවේග විසින් මාව විසි කෙරුවා. තත්පර කිහිපයකට පසු, අතක් මගේ අත අල්ලා ගත් අතර, මම නැවතත් මතුපිට හා වාතය දෙසට ඇදී ගියා. මගේ උඩඟුකමේ ගිනි සිළුව නිවී යමින් තිබුණා.

මේ වතාවේ මගේ සහෝදරයා මට ඔහු සමඟ කිමිදීමට ආරාධනා කළා. ඔහුගේ ආරාධනයට අනුව, මම ඔහු පසුපස ගියා, අපි එකට කිමිදුනා. මට දැනුනේ මම සංකීර්ණම අභියෝගය ජයගන්නවා වගෙයි. නිසැකවම, එය එතරම් පහසු වුණේ නෑ, නමුත් මගේ සහෝදරයා පෙන්වූ උපකාරයට සහ ආදර්ශයට ස්තූතිවන්ත වන්නට, මම එය කළා. ඔහුගේ අතින් මාව දෙපාරක් ගැලෙව්වා. ඔහුගේ ආදර්ශය මට එදා මගේ අභියෝගයට මුහුණ දී ජයග්‍රහණය කරන්නේ කෙසේදැයි පෙන්වා දුන්නා.

සභාපති රසල් එම්. නෙල්සන් අපට සෙලස්ටියල් ආකාරයෙන් සිතීමට ආරාධනා කර තිබෙනවා, ඒවගේම මට ඔහුගේ උපදෙස් අනුගමනය කිරීමට සහ එය මගේ ගිම්හාන කතාවට අදාළ කර ගැනීමට අවශ්‍යයි.

විරුද්ධවාදියාට එරෙහිව ගැලවුම්කරුවාණන්ගේ බලය

අපි සෙලෙස්ටියල් ආකාරයෙන් සිතනවා නම්, ඒවා ජය ගැනීමට අපට ඇති හැකියාවට වඩා විශාල යැයි පෙනෙන අභියෝගවලට අපගේ ජීවිතය මුහුණ දෙන බව අපට වැටහෙයි. අපගේ ලෞකික කාලය තුළ අපි විරුද්ධවාදියාගේ ප්‍රහාරයන්ට යටත් වෙනවා. එම ගිම්හාන දිනයේ මා කෙරෙහි බලය ඇති රළ මෙන්, අපට බල රහිත බවක් දැනිය හැකි අතර ශක්තිමත් ඉරණමකට යටත් වීමට අවශ්‍ය වෙන්න පුළුවන්. ඒ “ද්වේශ සහගත රැලි” වලින් අපිව උඩඟුකමේ පැත්තකට පැටලෙන්න පුළුවන්. නමුත් එම රළ කෙරෙහි, ඇත්ත වශයෙන්ම, සියල්ල කෙරෙහි බලය ඇත්තේ කාටද කියා අමතක කරන්න එපා. ඒ බලය ඇත්තේ අපගේ ගැලවුම්කරුවාණන් වන යේසුස් ක්‍රිස්තුස්වහන්සේටයි. සෑම දුක්ඛිත තත්වයක්ම හෝ අහිතකර තත්වයක්ම ඔස්සේ අපට උපකාර කිරීමට උන්වහන්සේට බලය තිබෙනවා. අපට උන්වහන්සේට සමීප බවක් දැනුණත් නැතත්, අප සිටින තැනට අප වෙත ළඟා වීමට උන්වහන්සේට තවමත් පුළුවන්.

අප ඇදහිල්ලෙන් උන්වහන්සේ වෙත ළඟා වන විට, උන්වහන්සේ සැමවිටම එහි ඉන්නවා, ඒවගේම උන්වහන්සේගේ කාලය තුළ, අපගේ දෑත් අල්ලාගෙන අපව ආරක්ෂිත ස්ථානයකට ඇද ගැනීමට සූදානම්ව සහ කැමැත්තෙන් උන්වහන්සේ ඉන්නවා.

ගැලවුම්කරුවාණන් හා උන්වහන්සේගේ දේවසේවයේ ආදර්ශය

අපි සෙලෙස්ටියල් ආකාරයෙන් සිතනවා නම්, අපි යේසුස් ක්‍රිස්තුස්වහන්සේව දේවසේවයේ දෝෂ රහිත ආදර්ශයක් ලෙස හඳුනා ගනියි. උන්වහන්සේ හෝ උන්වහන්සේගේ ගෝලයන් ඔවුන්ගේ දෑත් දිගු කරන විට, උපකාරයක්, ගැලවීමක්, හෝ ආශිර්වාදයක් අවශ්‍ය කෙනෙක් වෙත ඔවුන් ලඟා වෙන ආකාරයේ රටාවක් ශුද්ධලියවිලි වල තිබෙනවා. මගේ කතාවේ මෙන්, මගේ සහෝදරයා එහි සිටින බව මම දැන සිටියත්, මම වෙනුවෙන් එහි සිටීම පමණක් ප්‍රමාණවත් වුණේ නෑ. ක්ලෝඩියෝ දැනගෙන හිටියා මම අමාරුවේ වැටිලා කියලා, ඒවගේම එයා මාව වතුරෙන් ගොඩගන්න උදව් කරන්න ආවා.

අවශ්‍යතා ඇති කෙනෙකු වෙනුවෙන් පමණක් අප සිටිය යුතු බවත්, බොහෝ විට අපට කළ හැකි බොහෝ දේ ඇති බවත් ඉඳහිට අපි හිතනවා. අවශ්‍යතා ඇති අනෙක් අයට කාලෝචිත උපකාර ලබා දීම සඳහා එළිදරව් ලබා ගැනීමට අපට සදාකාලික ඉදිරිදර්ශනයක් තිබීම උපකාරයක් වෙනවා. එම උපකාර, චිත්තවේගීය සැනසීම, ආහාර, හෝ දෛනික කාර්යයන් සඳහා ආධාර වැනි තාවකාලික සහයක් වුවත්, පරිශුද්ධ ගිවිසුම් සඳහා සූදානම් වීමට, ඒවා ඇති කර ගැනීමට සහ ඒවාට ගෞරව කිරීමට අන් අයට ඔවුන්ගේ ගමනට උපකාර කිරීම සඳහා අවශ්‍ය අධ්‍යාත්මික මගපෙන්වීමක් වුවත්, කුමන ආකාරයේ උපකාරයක් අවශ්‍ය දැයි හඳුනා ගැනීමට අපට ශුද්ධාත්මයාණන්වහන්සේගේ මගපෙන්වීම සහ ආනුභාවය මත විශ්වාසය තබන්න පුළුවන්.

අපව ගලවා ගැනීමට ගැලවුම්කරුවාණන් සූදානම්

ජ්‍යේෂ්ඨ ප්‍රේරිතවරයෙකු වූ, පේත්‍රැස් “යේසුස්වහන්සේ වෙතට යන පිණිස, වතුර පිට පයින් ගියේය … ඔහු බිය විය; සහ ගිලෙන්න පටන්ගෙන,” එවිට, “ස්වාමිනී, මා ගැළවුව, මැනවයි මොරගැසුවේය.” පේත්‍රැස් වතුර මත උන්වහන්සේ වෙතට පැමිණීමට භාවිතා කළ ඇදහිල්ල යේසුස්වහන්සේ දැන සිටියා. පේත්‍රැස්ගේ බිය ගැන ද උන්වහන්සේ දැන සිටියා. “එකෙනෙහිම යේසුස්වහන්සේ … උන්වහන්සේ අත දිගුකොට, ඔහු අල්ලාගෙන, පහත සඳහන් වචන පැවසුවා: “ඇදහිලි මද තැනැත්ත, කුමක් නිසා සැකවුයෙහි ද?” උන්වහන්සේ එම වදන් පැවසුවේ පේත්‍රැස්ට බැණ වදින්නට නොවේ, නමුත් උන්වහන්සේ, එනම් මෙසියස්වහන්සේ, ඔහු සමඟත් ගෝලයන් සමඟත් සිටින බව ඔහුට මතක් කර දීමටයි.

අපි සෙලෙස්ටියල් ආකාරයෙන් සිතන්නේ නම්, යේසුස් ක්‍රිස්තුස්වහන්සේ සැබවින්ම අපගේ ගැලවුම්කරුවාණන්, පියාණන් සමඟ අපගේ උපදේශකයාණන් සහ අපගේ මිදුම්කරුවාණන් බව අපගේ හදවත් තුළ තහවුරු කිරීම අපට ඉඩ ලැබෙනවා. අපි උන්වහන්සේ කෙරෙහි ඇදහිල්ල ක්‍රියාත්මක කරන විට, උන්වහන්සේ මෙම තාවකාලික ජීවිතයේ අපගේ අභියෝග, දුර්වලතා සහ අවශ්‍යතා වලින් ඔබ්බට, අපගේ වැටී ඇති තත්වයෙන් අපව ගලවා ගන්නා අතර, දීමනා වලින් ශ්‍රේෂ්ඨතම දීමනාව වන, සදාකාලික ජීවනය අපට ලබා දෙනවා.

උන්වහන්සේ අපිව අත්හරින්නේ නැහැ

එදා මගේ අයියා මාව අත් නොහැර දිගටම උත්සාහ කළ නිසා මට ඒක කරන්නේ කොහොමද කියලා ඉගෙන ගන්න පුළුවන් වුණා. මාව දෙවරක් ගලවා ගැනීමට අවශ්‍ය වුවත්, ඔහු නොසැලී සිටියා. මුලදී මට එය ලබා ගැනීමට නොහැකි වුවත් ඔහු දිගටම සිටියා. මට ඒ අභියෝගය ජයගෙන සාර්ථක වීමට හැකි වන පිණිස, ඔහු දිගටම සිටියා. අපි සෙලෙස්ටියල් ආකාරයෙන් සිතන්නේ නම්, අපගේ ජීවිතවලට සැබෑ සහ සදාකාලික සතුට ගෙන දෙන ඕනෑම දෙයක් ඉගෙන ගැනීමට, වෙනස් කිරීමට, ජය ගැනීමට, මුහුණ දීමට හෝ සාර්ථක වීමට අවශ්‍ය උපකාර සැපයීමට අවශ්‍ය තරම් වාර ගණනක් අපගේ ගැලවුම්කරුවාණන් අප සමඟ සිටින බව අපට වැටහෙයි.

ගැලවුම්කරුවාණන්ගේ දෑත්

ශුද්ධලියවිලි ගැලවුම්කරුවාණන්ගේ අත්වල සංකේතය සහ වැදගත්කම අමරණීයව පෙන්නුම් කරනවා. උන්වහන්සේගේ වන්දිගෙවීමේ පූජාවේදී, උන්වහන්සේව කුරුසියේ සවි කිරීම සඳහා උන්වහන්සේගේ දෑත් ඇණ වලින් සිදුරු කළා. උන්වහන්සේගේ මරණයෙන් නැවත නැගිටීමෙන් පසු, උන්වහන්සේ සිය ගෝලයන්ට පරිපූර්ණ ශරීරයකින් දර්ශනය වූ නමුත්, උන්වහන්සේගේ අත්වල ඇති සලකුණු උන්වහන්සේගේ අසීමිත කැපකිරීමේ සිහිගැන්වීමක් ලෙස තබාගෙන තිබුණා. මුලදී අපට එය නොපෙනුනත්, දැනුණේ නැතත්, උන්වහන්සේගේ හස්තය සැමවිටම අප වෙනුවෙන් තිබෙනවා, මොකද අපගේ ගැලවුම්කරුවාණන්ව, සියලු මනුෂ්‍ය වර්ගයාගේ මිදුම්කරුවාණන් වීමට අපගේ ස්වර්ගික පියාණන්වහන්සේ විසින් උන්වහන්සේව තෝරාගෙන තිබෙනවා.

මම සෙලෙස්ටියල් ආකාරයෙන් සිතනවා නම්, අපි මේ ජීවිතයේ තනි වී නැති බව මම දන්නවා. අප අභියෝගවලට සහ පරීක්ෂාවන්ට මුහුණ දිය යුතු අතර, අපගේ ස්වර්ගීය පියාණන්වහන්සේ අපගේ හැකියාවන් දන්නා අතර අපගේ දුෂ්කරතා දරා ගැනීමට හෝ ජය ගැනීමට අපට හැකි බව දන්නවා. අප අපගේ කොටස කළ යුතු අතර ඇදහිල්ලෙන් උන්වහන්සේ වෙත හැරිය යුතුයි. උන්වහන්සේගේ ආදරණීය පුත්‍රයාණන් වන යේසුස් ක්‍රිස්තුස්වහන්සේ අපගේ ගැලවුම්කරුවාණන් වන අතර අප වෙනුවෙන් සැමවිටම පෙනී ඉන්නවා. යේසුස් ක්‍රිස්තුස්වහන්සේගේ ශුද්ධ වූ නාමයෙන්, ආමෙන්.