අපගේ මිදීමේ ප්රීතිය
යේසුස් ක්රිස්තුස්වහන්සේගේ ප්රේමයට සහ බලයට අප සෑම කෙනෙකුම අපගේ වැරදි, දුර්වලකම් සහ පාපවලින් ගලවා ගත හැකි අතර තවත් හොඳ වීමට අපට උපකාර කරන්න පුළුවන්.
මීට වසර 10 කට පමණ පෙර මට පෙලඹවීමක් ලැබුනා ගැලවුම්කරුවාණන්ගේ සිතුවමක් පාට කරන්න. මම කලාකරුවෙක් වුණාට මේක ටිකක් ලොකුවට දැණුනා. උන්වහන්සේගේ ආත්මය ග්රහණය කරගත් යේසුස් ක්රිස්තුස්වහන්සේගේ සිතුවමක් මම පාට කරන්නේ කොහොමද? මම පටන් ගන්නේ කොහෙන්ද? සහ මම කාලය සොයා ගන්නේ කොහෙන්ද?
මගේ ප්රශ්න එක්කත්, මම ඉදිරියට යාමට තීරණය කළ අතර ස්වාමින්වහන්සේ මට උපකාර කරනු ඇතැයි විශ්වාස කළා. නමුත් මට දිගටම එය කරගෙන යන අතර විය හැකි දේ උන්වහන්සේට භාර කළා. මම යාච්ඤා කළා, මෙනෙහි කළා, පර්යේෂණ කළා, සහ රූප සටහන් කළා, උපකාර සහ සම්පත් සොයා ගැනීමට මම ආශිර්වාදිත වුණා. සුදු කැන්වසය ඊට වඩා වෙනස් දෙයක් බවට පත්වෙන්න පටන් ගත්තා.
මේ ක්රියාවලිය පහසු වුණේ නෑ. සමහර වෙලාවට එය මා බලාපොරොත්තු වූ පරිදි පෙනුනේ නැහැ. සමහර විට පෙළඹවීමක් මගින් කළ සායම් පහරවල් සහ අදහස් ඇති වුණු අවස්ථා තිබුණා. ඒ වගේම බොහෝ අවස්ථාවලදී මට නැවත නැවතත් උත්සාහ කිරීමට සිදු වුණා.
තෙල් සායම් වියළී අවසාන යැයි මම සිතා, කුණු හා දූවිලි වලින් එය ආරක්ෂා කර ගැනීම සඳහා මම විනිවිද පෙනෙන වාර්නිෂ් ආලේප කිරීමට පටන් ගත්තා. මම එය කරන කොට, සිතුවමේ හිසකෙස් වෙනස් වීමට, ආලේප වැකෙන්නට සහ දියවෙන්නට පටන් ගත් බව මම දුටුවා. මම වාර්නිෂ් ආලේප කරන්න ඉක්මන් වුනා වැඩී කියලා මට ඉක්මනින් වැටහුණා, එම සිතුවමේ කොටසක් තවමත් තෙතයි!
මම මගේ සිතුවමේ කොටසක් වාර්නිෂ් වලින් පිසදැමුවා. අහෝ, මගේ හදවත වැටුනු හැටි. මට දැනුණේ දෙවියන්වහන්සේ මට කරන්න උදව් කරපු දේ මම විනාශ කළා වගේ. මම ඇඬුවා ඒවගේම හදවත ඇතුලෙන් මට අසනීපයි වගේ දැනුණා. බලාපොරොත්තු සුන් වූ විට, මම එවැනි අවස්ථාවක සාමාන්යයෙන් ඕනෑම කෙනෙක් කරන දේ කළා: මම මගේ මවට කතා කළා. ඇය ඥානවන්තව හා සන්සුන්ව කිව්වා, “ඔබ සතුව තිබූ දේ ඔබට ආපසු ලැබෙන එකක් නැහැ, නමුත් ඔබට ලැබුණු දෙයින් ඔබට හැකි උපරිමය කරන්න.”
ක්රිස්ටින් එම්. යී විසින්, And I Partook [තවද මම සහභාගී විය]
ඒ නිසා මම යාච්ඤා කරලා උදව් ඉල්ලුවා, දේවල් අලුත්වැඩියා කිරීමට රාත්රිය පුරා තීන්ත ආලේප කළා. ඒ වගේම මට මතකයි මම උදේම සිතුවම දිහා බැලුවා—ඒක මම කලින් කළාට වඩා හොඳට පෙනුණා. එය හැකි වූයේ කෙසේද? පිළිසකර කළ නොහැකි වරදක් යැයි මා සිතූ දෙය උන්වහන්සේගේ දයාවේ හස්තය ප්රකාශ කිරීමට අවස්ථාවක් වුණා. උන්වහන්සේ සිතුවමෙන් අවසන් වුණේ නැහැ, උන්වහන්සේ මා සමඟ අවසන් වුණෙත් නැහැ. මගේ සිත පිරුණේ මොනතරම් ප්රීතියක් සහ සහනයකින්ද. මම ස්වාමින්වහන්සේගේ දයාව ගැන ප්රශංසා කළා, මෙම ප්රාතිහාර්යය සිතුවම සුරැකීමට පමණක් නොව, අපගේ වැරදි, දුර්වලතා සහ පව් වලින් අප සෑම කෙනෙකුම ගලවා ගැනීමටත්, වඩා වැඩි යමක් වීමට අපට උපකාර කිරීමටත් උන්වහන්සේගේ ප්රේමය හා බලය ගැන මට තවත් ඉගැන්නුවා.
“අලුත්වැඩියා කළ නොහැකි” සිතුවම අලුත්වැඩියා කිරීමට උන්වහන්සේ මට දයානුකම්පිතව උපකාර කළ නිසා, ගැලවුම්කරුවාණන් කෙරෙහි මගේ කෘතඥතාවයේ ගැඹුර උත්සන්න වූවා සේම, මගේ දුර්වලකම්වලදී උන්වහන්සේ සමඟ වැඩ කිරීමට උත්සාහ කරන විට සහ වැරදි වලට සමාව ලැබෙන විට මගේ ගැලවුම්කරුවාණන් කෙරෙහි මගේ පෞද්ගලික ආදරය සහ කෘතඥතාව වර්ධනය වුණා. මට වෙනස් වීමට සහ පවිත්ර වීමට හැකි වීම ගැන මම මගේ ගැලවුම්කරුවාණන්ට සදහටම කෘතඥ වෙනවා. උන්වහන්සේට මගේ හදවත දී තිබෙනවා, ඒවගේම මම කරනවාට සහ පත්වෙනවාට උන්වහන්සේ කැමති ඕනෑම දෙයක් කිරීමට මම බලාපොරොත්තු වෙනවා.
පසුතැවිලි වීම අපට දෙවියන්වහන්සේගේ ප්රේමය දැනීමටත්, අප කිසිදා නොදන්න ආකාරයෙන් උන්වහන්සේව දැනගැනීමටත් ප්රේම කිරීමටත් ඉඩ සලසවනවා. ගැලවුම්කරුවාණන්ගේ පාද ආලේප කළ කාන්තාව ගැන උන්වහන්සේ මෙසේ පැවසුවා, “බොහෝවූ ඇගේ පව් ඈට කමා කරන ලද්දේය; මක්නිසාද ඈ බොහෝකොට ප්රේම කළාය. නුමුත් යමෙකුට ස්වල්පයක් කමාකරන ලද්දේද ඔහු ස්වල්ප කොට ප්රේම කෙරේය.” ඇය යේසුස්වහන්සේට බොහෝ සෙයින් ආදරය කළ නිසා, උන්වහන්සේ ඇයට බොහෝ සෙයින් සමාව දුන්නා.
අපට නැවත උත්සාහ කළ හැකි බව දැනගැනීමෙන් එවන් සහනයක් සහ බලාපොරොත්තුවක් ඇතිවෙනවා—වැඩිහිටි බෙඩ්නාර් ඉගැන්වූ පරිදි, අපි සැබැවින්ම අවංකව පසුතැවිලි වන විට ශුද්ධාත්මයාණන්වහන්සේගේ පවිත්ර කිරීමේ බලය තුළින් අපගේ පාපවලට අඛණ්ඩ සමාවක් ලබන්න පුළුවන්.
යේසුස් ක්රිස්තුස්වහන්සේගේ මිදීමේ බලය අපගේ ගිවිසුම්වල ඇති විශාල පොරොන්දු වූ ආශීර්වාදයක් වෙනවා. ඔබ ශුද්ධ වූ නියෝග වලට සහභාගී වන විට මේ ගැන මෙනෙහි කරන්න. එය නොමැතිව, අපට ස්වර්ගයේ සිටින අපගේ පියාණන්වහන්සේගේ සහ අප ආදරය කරන අය වෙත නැවත නිවසට යාමට නොහැකියි.
අපගේ ස්වාමීන්වහන්සේ සහ ගැලවුම්කරුවාණන් වන යේසුස් ක්රිස්තුස්වහන්සේ ගැලවීමට බලවත් බව මම දන්නවා. ලෝකයේ පව්වලට සමාව දී තම ජීවිතය පරිත්යාග කර එය නැවත ලබා ගත් දෙවියන්වහන්සේගේ පුත්රයාණන් ලෙස, උන්වහන්සේ මිදීමේ සහ මරණයෙන් නැවත නැඟිටීමේ බලය දරනවා. උන්වහන්සේ සියල්ලන්ට අමරණීයභාවය සහ උන්වහන්සේව තෝරා ගන්නා අයට සදාකාල ජීවනය ලබා දෙනවා. උන්වහන්සේගේ වන්දිගෙවීමේ පරිත්යාගය තුළින් අපට පසුතැවිලි වී සැබවින්ම පවිත්ර වී මිදීමට හැකි බව මම දන්නවා. උන්වහන්සේ ඔබටත් මටත් මේ ආකාරයෙන් ආදරය කිරීම ආශ්චර්යයක්.
උන්වහන්සේ මෙසේ පැවසුවා “මා නුඹලාව සුවකරන පිණිස, නුඹලා දැන් මා වෙතට හැරී නොඑන්නෝද, තවද නුඹලාගේ පාපයන්ට පසුතැවිලිව, තවද හැරී නොඑන්නෝද?” උන්වහන්සේට ඔබේ ආත්මයේ “නටබුන් තැන්”—පාපයෙන් හා ශෝකයෙන් වියළි, රළු, පාළු වූ ස්ථාන සුව කළ හැකි අතර “[ඔබේ] පාළුකරය ඒදන් උයන මෙන් කරන්න” උන්වහන්සේට පුළුවන්.
ගෙත්සෙමනේදී සහ කුරුසියේදී ක්රිස්තුස්වහන්සේගේ දුක්විඳීමේ වේදනාව සහ ගැඹුර අපට වටහාගත නොහැකි සේම, අපට “[උන්වහන්සේගේගේ] දිව්යමය සමාව,” දයාව සහ ප්රේමයේ සීමාවන් මැනීමට හෝ ගැඹුරට තේරුම් ගන්න බැහැ.
ඔබ සමඟ අරගල කරන දේ නිසා හෝ ඔබ කර ඇති දේ නිසා සමහර විට ඔබ දෙවියන්වහන්සේගේ ප්රේමයට සහ ගැලවුම්කරුවාණන්ගේ වන්දිගෙවීමේ බලයට නොගැලපෙන බව, එයට මුදවා ගැනීමට නොහැකි බව ඔබට විටෙක හැඟෙන්නට පුළුවන්. නමුත් ඔබ ඉහළ සීමාවට වැඩි ඈතක නොවන බවට මම සාක්ෂි දරනවා. ගැලවුම්කරුවාණන් “සියලු දේවලට පහළින් බැස” ඇති අතර, අඳුරුතම අගාධයෙන් ඔබව කැඳවා, ඔබව ඔසවා “උන්වහන්සේගේ පුදුමාකාර ආලෝකය”වෙත ගෙන ඒමට දිව්යමය ස්ථානයක සිටිනවා. උන්වහන්සේගේ දුක් වේදනා තුළින්, අප සෑම කෙනෙකුටම අපගේ පෞද්ගලික දුර්වලතා සහ පාපයන් ජය ගැනීමට මාර්ගයක් හදලා තියෙනවා. “උන්වහන්සේගේ නාමය කෙරෙහි විශ්වාසය තබා පසුතැවිල්ල උදෙසා ක්රියා කරන සෑම මිනිසෙකුම ගළවා ගැනීමට උන්වහන්සේට සියලු බලය ඇත්තේය.”
සිතුවම අලුත්වැඩියා කිරීම සඳහා වැඩ කිරීම සහ ස්වර්ගයේ උපකාරය ඉල්ලා සිටීම අවශ්ය වූවා සේම, “පසුතැවිලි වීමේ ඵලය” ගෙන ඒමට ශ්රමය, අවංක හදවත සහ යටහත් පහත්කම අවශ්ය වෙනවා. යේසුස් ක්රිස්තුස්වහන්සේ සහ උන්වහන්සේගේ වන්දිගෙවීමේ පරිත්යාගය කෙරෙහි අපගේ ඇදහිල්ල හා විශ්වාසය ක්රියාත්මක කිරීම සහ, බිඳුණු හදවතක් සහ පසුතැවිලි වූ ආත්මයක් දෙවියන්වහන්සේට පූජා කිරීම, පාපොච්චාරණය කිරීම සහ පාපයන් අත්හැරීම, හානියට පත් වූ දේ අපට හැකි උපරිමයෙන් නැවත පිහිටුවීම සහ ධර්මිෂ්ඨව ජීවත් වීමට උත්සාහ කිරීම මෙම ඵලවලට ඇතුළත් වෙනවා.
සැබවින්ම පසුතැවිලි වී වෙනස් වීමට නම්, අප මුලින්ම “අපගේ පව් ගැන අවබෝධ කරගන්න ඕනේ.” තමන් අසනීපයි කියලා තේරුනොත් මිසක් බෙහෙත් ගන්න අවශ්යතාවයක් කෙනෙකුට පේන්නේ නැහැ. අප තුළම සොයා බැලීමට සහ සැබවින්ම සුවය සහ අලුත්වැඩියාව අවශ්ය දේ දැකීමට අප කැමති නැති අවස්ථා තියෙන්න පුළුවන්.
සී. එස්. ලුවිස්ගේ ලේඛනවල, අස්ලාන් මෙම වචන ඔහුගේම උපක්රමවල පැටලී සිටින මිනිසෙකුට ඉදිරිපත් කරනවා: “අනේ [මනුෂ්ය වර්ගයා], ඔබට යහපතක් කළ හැකි සියල්ලෙන් ඔබ කෙතරම් දක්ෂ ලෙස ආරක්ෂා වෙනවාද.”
අපට යහපතක් විය හැකි දේවල් වලින් ඔබ සහ මම වැළකෙන්නෙ කොහෙන් වෙන්න ඇතිද?
දෙවියන්වහන්සේ අපට ආශිර්වාද කිරීමට ආශා කරන යහපතෙන් අපි අපිව වළක්වා ගන්නෙ නැතිව ඉමු. උන්වහන්සේ අපට දැනීමට කැමති ආදරය හා දයාවෙන්, උන්වහන්සේ අපට ලබා දීමට කැමති ආලෝකයෙන් සහ දැනුමෙන්, උන්වහන්සේ අපට ඉතා කැමැත්තෙන් අවශ්ය බව දන්නා සුවයෙන්, උන්වහන්සේ තම සියලු පුතුන් සහ දූවරුන් වෙනුවෙන් අදහස් කරන ගැඹුරු ගිවිසුම් සම්බන්ධතාවයෙන් අපි අපිව වළක්වා ගන්නෙ නැතිව ඉමු.
දෙවියන්වහන්සේගේ ප්රේමයේ ආශිර්වාදයෙන් අපව වළක්වා ගැනීම සඳහා අප දැනුවත්ව හෝ නොදැනුවත්ව ගෙන ඇති ඕනෑම “යුද්ධයේ ආයුධ” පසෙකට දැමිය යුතු යැයි මම යාච්ඤා කරනවා. උඩඟුකමේ ආයුධ, ආත්මාර්ථකාමිත්වය, බිය, වෛරය, සිත් රිදවීම, උදාසීනත්වය, අධර්මිෂ්ඨ විනිශ්චය, ඊර්ෂ්යාව—අපගේ මුළු හදවතින්ම දෙවියන්වහන්සේට ප්රේම කිරීමෙන් සහ උන්වහන්සේ සමඟ අපගේ සියලු ගිවිසුම් තබා ගැනීමෙන් අපව වළක්වන ඕනෑම දෙයක් අපි පසෙකට දමමු.
අපි අපේ ගිවිසුම් වල ජීවත් වන විට, උඩඟුකමේ අධ්යාත්මික පරපෝෂිතයන් ඇතුළු අපගේ දුර්වලතා හඳුනා ගැනීමටත් ඒවා ජය ගැනීමටත් අවශ්ය උපකාරය සහ බලය ස්වාමින්වහන්සේට ලබා දෙන්න පුළුවන්. අපේ අනාගතවක්තෘවරයා මෙසේ කිව්වා:
“පසුතැවිලි වීම පරිශුද්ධ වීමට මාර්ගයයි, එමෙන්ම පරිශුද්ධතාවය බලය ගෙන එනවා.”
“ඒවගේම ඇත්තටම, ඉදිරි දින වලදී අපට උන්වහන්සේගේ බලය කෙතරම් නම් අවශ්ය වෙයිද.”
මගේ සිතුවම මෙන්, අප වරදක් කළ විට ස්වාමින්වහන්සේ අපෙන් ඉවත් වෙන්නෙ නෑ, අප පසුබසින විට උන්වහන්සේ පලා යන්නේ නැහැ. අපට අවශ්ය සුවය සහ උපකාර උන්වහන්සේට බරක් නොවේ, නමුත් උන්වහන්සේ පැමිණි හේතුව එයයි. ගැලවුම්කරුවාණන්ම මෙසේ පැවසුවා:
“බලන්න, මම ලෝකයට පැමිණ ඇත්තේ ලෝකය පාපයෙන් ගලවා, ලෝකයට මිදීම ගෙන ඒමටය.”
“මාගේ දයාවේ හස්තය නුඹලා වෙතට දිගුකර ඇත, තවද කවරෙකු මාවෙත පැමිණෙන්නේද, මම ඔහුව භාර ගන්නෙමි; තවද මා වෙතට පැමිණෙන්නාවු අය ආශිර්වාද ලද්දේය”
එබැවින් එන්න—වෙහෙසට පත් වූ, අබලන් වූ සහ දුක් වූ ඔබ එන්න; පැමිණ ඔබේ වැඩ අත්හැර ඔබට වඩාත්ම ආදරය කරන උන්වහන්සේ තුළ විවේකය සොයා ගන්න. උන්වහන්සේ මෘදු හා නිහතමානී හදවතක් ඇති බැවින් උන්වහන්සේගේ වියගහ ඔබ මතට ගන්න.
අපගේ ස්වර්ගීය පියාණන්වහන්සේ සහ ගැලවුම්කරුවාණන් ඔබව දකිනවා. උන්වහන්සේලා ඔබේ හදවත දන්නවා. ඔබ ආදරය කරන අය ඇතුළුව ඔබ සැලකිලිමත් වන දේ ගැන උන්වහන්සේලා සැලකිලිමත් වෙනවා.
ගැලවුම්කරුවාණන්ට කැඩී බිඳී ගිය සබඳතා ඇතුළුව අහිමි වූ දේ මුදවා ගන්න පුළුවන්. උන්වහන්සේ වැටී සිටින සියල්ල මුදවා ගැනීමට—මිය ගිය සහ බලාපොරොත්තු රහිත යැයි හැඟෙන දේට ජීවය හුස්ම දීමට මාර්ගයක් සකස් කළා.
ඔබ මේ වන විට මැඩපවත්වනවා ගත යුතු යැයි ඔබ සිතන තත්වයක් සමඟ පොරබදන්නේ නම්, අත් හරින්න එපා. ඔබ සමඟ ඉවසන්න, ඔබේ ගිවිසුම් තබා ගන්න, නිතර පසුතැවිලි වන්න, අවශ්ය නම් ඔබේ නායකයින්ගේ උපකාරය ලබා ගන්න, ඔබට හැකි සෑම විටම ස්වාමීන්වහන්සේගේ ගෘහයට යන්න. උන්වහන්සේ ඔබට එවන උපදෙස් වලට සවන් දී ඒවා කල්පනාවට ගන්න. උන්වහන්සේ ඔබ සමඟ ඇති උන්වහන්සේගේ ගිවිසුම් සම්බන්ධය අත් හරින්නේ නැහැ.
මගේ ජීවිතයේ දුෂ්කර හා සංකීර්ණ සම්බන්ධතා තිබූ අතර මම අරගල කරමින් සහ වර්ධනය වීමට අවංකව උත්සාහ කළා. සමහර අවස්ථාවලදී මම බොහෝ විට අසාර්ථක වන බව මට දැනුනා. මම කල්පනා කළා, “මම කලින් වතාවේ දේවල් නිවැරදි කළේ නැද්ද? මම ඇත්තටම මගේ දුර්වලකම මැඩපවත්වා ගෙන නැද්ද?” මම අනිවාර්යයෙන්ම දෝෂ සහිත නොවන බව කාලයත් සමඟම මම ඉගෙන ගත්තා; ඒ වෙනුවට, බොහෝ වෙලාවට කිරීමට වැඩ වැඩි ප්රමාණයක් සහ වැඩි සුවයක් අවශ්ය වෙනවා.
වැඩිහිටි ඩී. ටොඩ් ක්රිස්ටෝෆර්සන් මෙසේ ඉගැන්වුවා: “විනිශ්චය කිරීමට සුදුසු ලෙස පැමිණීමට කැමති, දුර්වලකම ශක්තියෙන් ප්රතිස්ථාපනය කිරීමට දිනෙන් දින අධිෂ්ඨානශීලීව වෙහෙසෙන තැනැත්තා සමඟ ස්වාමින්වහන්සේ සිනාසෙන සේක. සැබෑ පසුතැවීම, සැබෑ වෙනසක් සඳහා නැවත නැවත උත්සාහයන් අවශ්ය වෙන්න පුළුවන්, නමුත් එවැනි උත්සාහයක පිරිසිඳු සහ ශුද්ධ දෙයක් තියෙනවා. එවැනි ආත්මයකට දිව්යමය සමාව, සුවවීම සහ ගලා යාම තරමක් ස්වාභාවිකවම සිදු වෙනවා.”
සෑම දිනක්ම යේසුස් ක්රිස්තුස්වහන්සේ නිසා බලාපොරොත්තුවෙන් හා හැකියාවන්ගෙන් පිරුණු අලුත් දිනයක්. ඒව මව ප්රකාශ කළ පරිදි,“අපගේ මිදීමේ ප්රීතිය,” සම්පූර්ණ වීමට ලැබීමේ ප්රීතිය, දෙවියන්වහන්සේගේ නොසැලෙන ආදරය ඔබ කෙරෙහි දැනීමේ ප්රීතිය සෑම දිනකම ඔබටත් මටත් දැනගන්න පුළුවන්.
ස්වර්ගයේ සිටින අපගේ පියාණන්වහන්සේ සහ ගැලවුම්කරුවාණන් ඔබට ප්රේම කරන බව මම දන්නවා. යේසුස් ක්රිස්තුස්වහන්සේ තමයි සියලු මනුෂ්ය වර්ගයාගේ ගැලවුම්කරුවාණන් සහ මිදුම්කරුවාණන්. උන්වහන්සේ ජීවමානයි. උන්වහන්සේගේ වන්දිගෙවීමේ පරිත්යාගය තුළින්, අප ආදරය කරන අය සමඟ සුවය, මිදීම සහ සදාකාල ජීවනය තෝරා ගැනීමට අපට නිදහස ලැබෙන පිණිස, පාපයේ සහ මරණයේ බැඳීම සදහටම කැඩී ගියා. ඒවගෙඉම මම මේ දේවල් ගැන සාක්ෂි දරන්නේ උන්වහන්සේගේ නාමයෙන්, යේසුස් ක්රිස්තුස්වහන්සේගේ නාමයෙන්, ආමෙන්.