Jun “li kehob’resiik” aran Ghana

“Jun “li kehob’resiik” aran Ghana,” Eb’ li Seraq’ sa’ li Tzol’leb’ ut Sumwank (2024)

“Jun “li kehob’resiik” aran Ghana,” Eb’ li Seraq’ sa’ li Tzol’leb’ ut Sumwank

Junio re 1989–noviembre re 1990

Jun “li kehob’resiik” aran Ghana

Wank chi tiik naq eb’ laj santil paab’anel ink’a’ neke’ru chi ch’utlaak

Li xAlice Johnson ut li xHetty Brimah neke’xwotz li evangelio aran Koforidua, Ghana.

Li xAlice Johnson a’an jun misioneer li yoo chaq chi k’anjelak sa’ lix tenamit, Ghana. Q’axal nawulak chiru xwotzb’al lix nawom xch’ool chirix li Jesukristo ut tenq’ank re naq li Iglees taak’iiq.

Santos, 4:416–417

Li xAlice ut li xHetty neke’rab’i resil naq ink’a’ chik te’ruuq chixwotzb’al li evangelio.

Sa’ jun kutan, li xAlice kixk’ul jun esil moko jwal chaab’il ta. Li jolomil tenamit aran Ghana kixye naq ink’a’ chik naru neke’uxman li ch’utam re li Iglees. Li misioneer ink’a’ chik te’ruuq chi k’utuk.

Santos, 4:417

Aj k’aak’alenel tenamit chirix jun kab’l tz’aptz’o rik’in laaw.

Laj k’aak’alenel tenamit ke’xmineb’ ru li misioneer chi elk sa’eb’ li rochoch ut ke’xk’ameb’ lix b’aqlaq ch’iich’. Junjunqeb’ li komon ke’k’ehe’ sa’ tz’alam. Li ch’uut aj pleet ke’xtz’apeb’ li rochochil li Iglees ut maa’ani ke’xkanab’ chi ok. “Li kehob’resiik” ke’xye li kristiaan re a’an.

Santos, 4:417–418

Li xAlice naxik chi wank rik’in jun ramiiw.

Li misioneer tento naq ke’sutq’i sa’ rochocheb’. Li xAlice kixchap xb’e toj sa’ jalan chik na’ajej re wank chaq rik’in jun li ramiiw. Ki’ok chixk’oxlankil naq maare maajun wa tixchoy lix mision.

Santos, 4:418

Laj santil paab’anel aran Ghana ke’sach’ xch’ool, ke’raho’ xch’ool, ut ke’ok xxiw. Ke’xpatz’ rib’ k’a’ru li ink’a’ us ke’xb’aanu. Ma te’ruuq chi sutq’iik sa’ li Iglees?

Santos, 4:418

Laj santil paab’anel neke’xb’aanu li ch’utam re li loq’laj wa’ak sa’ ochoch.

Us ta ink’a’ neke’ru chixch’utub’ankileb’ rib’ sa’ lix teepeb’, laj santil paab’anel toj neke’xra li Qaawa’ ut ke’raj xloq’oninkil. Ke’xb’aanu li ch’utam re li loq’laj wa’ak sa’eb’ li rochoch. Li junkab’al b’ar wi’ wankeb’ aj k’amol re li tijonelil ke’rosob’tesi li kaxlan wa ut li ha’ ut ke’xjek’i reheb’ xkomon li junkab’al.

Tzol’leb’ ut Sumwank 6:32; Santos, 4:419

Laj santil paab’anel neke’xwotz li evangelio sa’ kab’l.

Chirix xnumikeb’ li po, ink’a’ ki’isimaak li kehob’resiik. Laj santil paab’anel ke’b’ichan ut ke’xtzol rib’ chirib’ileb’ rib’ chirix li evangelio sa’ li rochocheb’. Ke’rula’ani rib’ chirib’ileb’ rib’ re xtenq’ankileb’ rib’ chixkawob’resinkil lix paab’aaleb’. Ke’xk’uula lix lajetqil re naq te’xtoj naq te’ruuq chi sutq’iik sa’ li Iglees. Ke’tijok ut ke’xkuy xsa’ re naq taaraqe’q li kehob’resiik.

Santos, 4:436–437

Li xAlice nab’oqe’ chi k’anjelak wi’chik sa’ mision.

Toj reetal naq chirix waqxaqlaju po, li jolomil tenamit kixye naq taaruuq wi’chik taa’uxq li ch’utam sa’ li Iglees. Jun li ak’ awa’b’ej re mision kixpatz’ aatinak rik’in li xAlice, li yoo chik chi tzolok sa’ li universidad sa’ li hoonal a’an. “Ma nawulak raj chawu sutq’iik chaq ut k’anjelak sa’ jun mision chirix laa eskweel?” chan re. “Ink’a’,” chan. “Nawaj k’anjelak anajwan ajwi’!”

Santos, 4:437–439

Laj santil paab’anel aran Ghana neke’wulak sa’ jun ch’utam sa’ li Iglees.

Li xAlice ut xkomoneb’ chik laj santil paab’anel k’a’jo’ xsahileb’ xch’ool naq neke’ru wi’chik chi xik sa’ li Iglees! Li xb’een domingo chirix li kehob’resiik, li ch’utam re loq’laj wa’ak kib’ay wiib’ hoor xb’aan naq naab’aleb’ li kristiaan ke’raj xwotzb’al lix nawom xch’ooleb’. Ke’xseraq’i chirib’ileb’ rib’ chan ru naq ke’osob’tesiik ut ke’tenq’aak xb’aan li Qaawa’ chixkawob’resinkil lix paab’aaleb’.

Tzol’leb’ ut Sumwank 20:75; Santos, 4:438