“Laj Samuel Smith naxwotz lix Hu laj Mormon,” Eb’ li Seraq’ sa’ li Tzol’leb’ ut Sumwank (2024)
“Laj Samuel Smith naxwotz lix Hu laj Mormon,” Eb’ li Seraq’ sa’ li Tzol’leb’ ut Sumwank
1830–1832
Laj Samuel Smith naxwotz lix Hu laj Mormon
Jun li hu narosob’tesi naab’aleb’ li yu’amej
Li Qaawa’ kixb’oq laj Samuel Smith, riitz’in laj Jose, sa’ jun li mision re xwotzb’al li evangelio. Laj Samuel kixnaw ru laj John ut li xRhoda Greene ut kiraatinaheb’ chirix lix Hu laj Mormon. Laj John a’an chaq jun pastor sa’ jun chik li Iglees. Kixye naq tixk’ul jun li hu ut taaril ma wan anihaq sa’ lix iglees li naraj ilok re.
Santos, 1:99
Chirix wiib’ oxib’ po, kisutq’i laj Samuel. Li xRhoda kixye re lix b’eelom naq ink’a’ kixtaw junaq li taaraj raj ilok re lix Hu laj Mormon. Kixsutq’isi re laj Samuel.
Santos, 1:99
Kiraho’ xch’ool laj Samuel. Kixsutq’isi rib’ re xik, a’b’an kirame’ xb’aan li xRhoda. Kixye naq kiril lix Hu laj Mormon ut kiwulak chiru.
Santos, 1:99
Li Santil Musiq’ej kixye re laj Samuel naq tixsutq’isi li hu re li xRhoda. “Patz’ re li Dios naq tixk’e jun xnawom aach’ool,” chan laj Samuel re. Kik’utuk chiru li xRhoda chirix li Santil Musiq’ej ut chan ru naq a’an tixnaw naq lix Hu laj Mormon tz’aqal yaal.
Moroni 10:3–5; Santos, 1:99–100
Laj Samuel kisutq’i chaq sa’ li rochoch chirix lix mision. Maa’ani kixkub’si xha’ ut moko k’iheb’ ta li kristiaan li ke’raj raj rilb’al lix Hu laj Mormon.
Li xRhoda ut laj John ke’tijok ut li Santil Musiq’ej kixye reheb’ naq lix Hu laj Mormon tz’aqal yaal. Chirix a’an, li xRhoda kixwotz li hu rik’in li ras, a’ laj Brigham Young.
Santos, 1:100
Laj Brigham ut li ramiiw, laj Heber Kimball, yookeb’ chaq chixsik’b’al lix Iglees li Jesus li tz’aqal yaal. Ke’ril lix Hu laj Mormon. Ke’tzolok ut ke’tijok chirix lix evangelio li Jesukristo chiru haye’ wiib’ chihab’.
Chiru li hoonal a’an, laj Brigham ut laj Heber neke’wulak sa’ li Iglees rochb’eeneb’ lix junkab’al. Sa’ jun reheb’ li ch’utam a’an, laj Brigham kirab’i jun misioneer li kixwotz xnawom xch’ool. Li misioneer moko jwal seeb’ ta chi aatinak, a’b’an laj Brigham kireek’a li Santil Musiq’ej naq na’aatinak a’an. Laj Brigham kixnaw naq yaal li yoo chixyeeb’al.
Laj Brigham, laj Heber, ut eb’ li rixaqil, li xMiriam ut xVilate ke’kub’siik xha’. Ke’xra li Kolonel ut lix evangelio. Wiib’ oxib’ chihab’ chik chirix a’an, li Qaawa’ kixb’oq laj Brigham ut laj Heber chi wank jo’ apostol ut chi k’anjelak sa’ jun mision. Sa’ xk’ab’a’ naq laj Samuel kixwotz lix Hu laj Mormon, naab’aleb’ li kristiaan ke’ok sa’ lix Iglees li Kolonel.
Tzol’leb’ ut Sumwank 124:127–29; 126; Santos, 1:215–16