Li Komonil re Tenq’ank

Eb’ li ixq aran Nauvoo neke’k’anjelak chiru li Qaawa’

Li xMargaret Cook ut li xSarah Kimball neke’aatinak chirix li santil ochoch li yoo chi kab’lamank aran Nauvoo.

Li xMargaret Cook kiwan rochoch aran Nauvoo. Kik’anjelak choq’ re li xSarah Kimball, naxtenq’a chaq a’an chi b’ojok. Naq nak’anjelak, nawulak chaq chiru aatinak chirix li santil ochoch li yoo chi kab’lamank aran Nauvoo. K’a’jo’ xsahileb’ xch’ool chirix li santil ochoch.

Santos, 1:447

Li xMargaret naxk’e reetal naq q’eel t’ikr neke’roksi li neke’kab’lank re li santil ochoch.

Sa’ jun kutan, li xMargaret kixk’e reetal naq naab’aleb’ reheb’ li winq li yookeb’ chi kab’lank re li santil ochoch q’eel ut pejel t’ikr neke’roksi. Kixpatz’ rib’ ma te’ruuq raj chi k’anjelak rochb’een li xSarah re xb’ojb’al ak’il kamiis choq’ reheb’ li winq. Kiwulak li na’leb’ a’an chiru li xSarah. A’an ut li xMargaret ke’aatinak rik’ineb’ jun siir chik li ixq chirix xk’uub’ankil junaq li ch’uut re xtenq’ankileb’ laj trab’aaj.

Santos, 1:447–448

Laj Jose Smith kich’utla rik’in li xMargaret, li xSarah, ut naab’aleb’ chik li kristiaan re xk’uub’ankil li Komonil re Tenq’ank re li Iglees.

Li profeet aj Jose kixye naq li Qaawa’ sa xch’ool chirix li na’leb’ a’an ut naq chaab’il wi’chik li na’leb’ wan choq’ reheb’. Laj Jose kixpatz’ reheb’ li ixq naq te’ch’utlaaq rik’in a’an sa’ li 17 re marzo re 1842. Rik’in lix wankilal li tijonelil, kixk’uub’ xch’uuteb’ li ixq re li Iglees. Ke’xye naq Komonil re Tenq’ank reheb’ li Ixq aran Nauvoo te’xk’e choq’ xk’ab’a’ lix ch’uuteb’.

Santos, 1:448, 450–451

Li xMargaret na’aatinak rik’ineb’ wiib’ li ixq.

Laj Jose kixpatz’ re li Komonil re Tenq’ank naq te’xtenq’aheb’ li kristiaan chixkawresinkileb’ rib’ choq’ re li rosob’tesihom li santil ochoch ut li junelik yu’am. Tent’o te’xk’utb’esi xtaaqenkil li Jesus.

Santos, 1:451

Eb’ li komon sa’ li Komonil re Tenq’ank neke’xk’am xtzakemq jun junkab’al wankeb’ sa’ rajb’al ru.

Laj Jose kixye ajwi’ naq li Komonil re Tenq’ank tento te’xtaweb’ li kristiaan neb’a’ ut te’xtenq’aheb’. Ut eb’ ajwi’ li ixq neb’a’eb’ ke’raj xtenq’ankileb’ li kristiaan wankeb’ sa’ rajb’al ru.

Santos, 1:449

Kik’uub’aman li Komonil re Tenq’ank. Li xEmma Smith kib’oqe’ choq’ awa’b’ej. Kixb’oqeb’ wiib’ aj tenq’ re, li xSarah Cleveland ut li xAnn Whitney. Kixb’oq ajwi’ jun aj tz’iib’, li xEliza R. Snow.

Santos, 1:450

Li xEmma naxtzoleb’ li ixq sa’ li Komonil re Tenq’ank.

Li Qaawa’ kixtenq’a li xEmma chi k’anjelak sa’ lix b’oqb’al. Li xEmma kixk’ut chiruheb’ li ixq naq nim li k’a’ru naru neke’xb’aanu sa’ lix k’anjel li Qaawa’. Kiraj naq chixjunileb’ te’xsik’ chan ru te’xb’aanu li us. Li k’a’ru jwal ajel ru, chan reheb’, a’an xraab’aleb’ li kristiaan jo’ chan ru kixb’aanu li Jesus. Naab’aleb’ li ixq aran Nauvoo ke’ok sa’ li Komonil re Tenq’ank.

Tzol’leb’ ut Sumwank 25:3, 7; Santos, 1:451

Jun eetalil li naxk’utb’esi chan ru naq eb’ li ixq re li Iglees neke’xtenq’aheb’ li kristiaan sa’ chixjunil li ruchich’och’.

Ke’xtenq’aheb’ li kristiaan chixkawresinkileb’ rib’ choq’ re li rosob’tesihom li santil ochoch ut ke’xtenq’aheb’ naab’aleb’ li junkab’al wankeb’ rajom ru aran Nauvoo. Chalen chaq aran, eb’ li ixq sa’ chixjunil li ruchich’och’ neke’ok sa’ li Komonil re Tenq’ank. Toj neke’k’anjelak chiruheb’ li kristiaan ut neke’xtenq’aheb’ chixk’ulb’al li rosob’tesihom li santil ochoch.

Santos, 1:451