Li Junkabʼal Martins

Royb’eninkil li rosob’tesihom li Qaawa’

Laj Helvecio Martins na’el sa’ lix trab’aaj sa’ lix b’eleb’aal ch’iich’ re xik sa’ li rochoch.

Laj Helvecio Martins ki’el chaq sa’ lix trab’aaj sa’ lix b’eleb’aal ch’iich’ re xik sa’ li rochoch aran Rio de Janeiro, Brasil. Nujenaqeb’ li b’eleb’aal ch’iich’ chiru li b’e toj reetal naq ink’a’ neke’ru chi eek’ank. Laj Helvecio kik’oxlak chirix lix yu’am. Chaab’il lix trab’aaj. Naxra li rixaqil, xRuda, ut eb’ lix kok’al wiib’, laj Marcus ut li xMarisa. A’b’an nareek’a naq toj wan k’a’ru maak’a’ re.

Santos, 4:229–230

Laj Helvecio ki’el sa’ lix b’eleb’aal ch’iich’ ut ki’ok chi tijok. “At inDios,” chan, “ninnaw naq wankat aran, a’b’an ink’a’ ninnaw b’ar.” Kixye re li qaChoxahil Yuwa’ naq toj wan k’a’ru naxsik’ lix junkab’al ut naq neke’raj ru lix tenq’ a’an. Chirix a’an, laj Helvecio ki’ok wi’chik sa’ lix b’eleb’aal ch’iich’ ut ki’ok chi xik sa’ li rochoch.

Santos, 4:230

Eb’ laj Martins neke’xk’eheb’ xsahil xch’ool li misioneer aj Santil Paab’anel sa’ Roso’jikeb’ li Kutan.

Chirix chik a’an, li Qaawa’ kixtaqlaheb’ misioneer aj Estados Unidos. Ke’rula’ani li junkab’al Martins. Laj Helvecio kixk’e reetal naq k’a’jo’ xtuqtuukilal li musiq’ej neke’xk’am sa’ li rochoch. Kixnaw naq, sa’ li hoonal a’an, li kristiaan q’eqeb’ xtib’el ink’a’ us neke’ilman aran Estados Unidos. A’an kixpatz’, “Chan ru neke’ile’ li q’eqeb’ xtib’el sa’ lee paab’al?”

Santos, 4:230–231

Li misioneer neke’xch’olob’ chiruheb’ laj Martins li ramleb’ rik’in li k’a’ru re li santil ochoch ut li tijonelil.

Li misioneer ke’xch’olob’ naq chixjunileb’ li ralal xk’ajol li Dios naru neke’kub’e xha’. A’b’an sa’ li hoonal a’an, li kristiaan q’eqeb’ xtib’el li wankeb’ xxe’ xtoon aran Africa ink’a’ naru neke’xk’ul li tijonelil chi moko li rosob’tesihom li santil ochoch. Laj Helvecio ut li xRuda ke’wan naab’al xpatz’om. Li misioneer ke’xyal xq’e chixsumenkileb’.

Santos, 4:231

Li Awa’b’ej re li Iglees, laj David O. McKay, wiq’wo chi tijok.

Chiru k’iila chihab’, li profeet ke’tijok re xnawb’al jo’q’e taaruuq chi k’eemank rosob’tesihom li tijonelil ut li santil ochoch reheb’ chixjunil li kristiaan.

Santos, 4:71

Eb’ laj Martins neke’xk’e xsahileb’ xch’ool li kristiaan sa’ jun ch’utam sa’ li Iglees.

Laj Helvecio ut li xRuda ke’xsik’ ru xyalb’al xik sa’ li Iglees. Laj santil paab’anel k’a’jo’ xrahomeb’ ut xchaab’ilaleb’. Eb’ laj Martins nawulak chiruheb’ li k’a’ru neke’xtzol sa’ li Iglees.

Santos, 4:231–232

Lix junkab’al laj Martins nekekub’e xha’.

Sa’ jun kutan, naq yookeb’ chi elk sa’ li Iglees, laj Marcus kixye reheb’ lix junkab’al naq chanchan naq k’a’jo’ chik xsahileb’ xch’ool. “Ninnaw k’a’ut,” chan laj Marcus. “A’ lix evangelio li Jesukristo.” Li xkomoneb’ li junkab’al neke’xnaw naq yaal li naxye laj Marcus. Ke’xsik’ ru kub’eek xha’ ut k’ojob’aak.

Santos, 4:232

Laj Helvecio ut li xRuda neke’rula’ani li santil ochoch re Sao Paulo, Brasil.

K’iila chihab’ chik chirix a’an, laj santil paab’anel aj Brasil laatz’eb’ ru chixkab’lankil jun li santil ochoch. Li junkab’al Martins saheb’ xch’ool, a’b’an raheb’ ajwi’ xch’ool. Ink’a’ raj te’ruuq chi ok sa’ li santil ochoch chirix naq taaq’axtesiiq. “Matk’oxlak,” chan laj Helvecio re li xRuda. “Li Qaawa’ naxnaw chixjunil.”

Santos, 4:293–294

Eb’ laj Martins neke’aatinak rik’in jun ramiiweb’.

Ch’a’aj li wank chi tiik choq’ reheb’. Li kristiaan neke’reetz’u li junkab’al Martins. Chi moko eb’ li ramiiw neke’xtaw ru k’a’ut naq toj wankeb’ sa’ li Iglees. A’b’an laj Helvecio ut lix junkab’al neke’xnaw naq a’an lix Iglees li Jesukristo.

Santos, 4:251–252

Li xRuda na’aatinak rik’in laj Helvecio chirix xraqik li ramleb’ wan rik’in li santil ochoch ut li tijonelil.

Sa’ jun kutan, naq laj Helvecio kiwulak sa’ kab’l chirix lix trab’aaj, li xRuda kixye, “Wan jun esil, k’a’jo’ xchaq’al ru li esil!” Chirix kuyuk sa’ ut tijok, li profeet, li Awa’b’ej Spencer W. Kimball, kixk’ul jun k’utb’esinb’il na’leb’. Li Dios kixye naq chixjunileb’ li kristiaan, maak’a’ naxye xb’onol lix tib’el, naru neke’xk’ul li rosob’tesihom li tijonelil ut li santil ochoch.

Awa’b’ejil Yehom 2; Santos, 4:318–319

Li junkab’al Martins neke’loq’onin sa’ li santil ochoch.

Li junkab’al Martins ut naab’aleb’ chik li komon k’a’jo’ naq ke’royb’eni li kutan a’an. Anajwan kiwulak li hoonal! Laj Helvecio ut laj Marcus ke’xk’ul li tijonelil. Laj Helvecio, li xRuda, ut eb’ lix kok’al ke’tz’ape’ sa’ junajil jo’ junkab’al sa’ li santil ochoch. Anajwan te’ruuq chik chixk’ulb’al rosob’tesihom li evangelio.

Santos, 4:319–321