Li teep re Israel

Xtzolb’al xkanab’ankil qib’ sa’ ruq’ li Qaawa’

Eb’ laj santil paab’anel aran Missouri neke’wan sa’ kok’ muheb’aal.

Eb’ laj santil paab’anel li ke’wan chaq aran Independence, Missouri, ke’raj xtenq’. Ke’k’anjelak chi kaw re xk’ojob’ankil Sion jo’ chanru kixpatz’ li Dios reheb’. A’b’an wankeb’ chik li kristiaan sa’ li tenamit li ink’a’ ke’raj naq te’wanq aran. Ke’xmineb’ ru laj santil paab’anel chi elk sa’ li rochocheb’.

Santos, 1:195

Laj Jose Smith natzolok chirix lix ch’a’ajkilaleb’ laj santil paab’anel aran Missouri.

Laj Jose Smith kiwan rochoch aran Kirtland. Kirab’i resil li ke’xk’ul laj santil paab’anel aran Missouri ut kiraho’ xch’ool. Kitijok re tixnaw k’a’ru tixb’aanu. Li Qaawa’ kixye re laj Jose naq tixsik’eb’ kristiaan li te’ruuq chi ochb’eenink re aran Missouri. Ke’royb’eni naq lix jolomil li tenamit tixtenq’aheb’ laj santil paab’anel chi sutq’iik sa’eb’ li rochoch.

Tzol’leb’ ut Sumwank 103:1–2, 11–20, 30–34; Santos, 1:195–196

Li teep re Israel neke’xkawresi rib’ re xtenq’ankileb’ laj santil paab’anel aran Missouri.

Maare jun cient chi kristiaan ke’xyeechi’i rib’ chirochb’eeninkil. Li profeet kixk’ab’a’i li ch’uut a’an jo’ li teep re Israel. Saheb’ xch’ool chi xik chixtenq’ankileb’ laj santil paab’anel aran Missouri.

Santos, 1:197–199

Laj Jose naxk’e xsahil xch’ool laj Brigham Young, laj Heber Kimball, ut laj Wilford Woodruf.

Laj Brigham Young ut laj Heber Kimball, li ramiiw, ke’wan sa’ li ch’uut a’an. Jun li saaj aj Wilford Woodruff kichal chaq aran Nueva York re tenq’ank.

Santos, 1:197–198

Eb’ li komon re li teep re Israel neke’hilan.

Naab’aleb’ chik li kristiaan ke’ok sa’ li ch’uut. Ke’b’eek chiru jun po ut ke’xq’ax ru jun li nimla nima’ re wulak aran Missouri. Lub’luukeb’ ut tawajenaqeb’. Li najtil b’eek kixk’eheb’ ajwi’ xch’ool naab’aleb’ li kristiaan chi lajk. Toj nim roq li b’e nakana re wulak toj sa’ li tenamit Independence.

Santos, 1:200–201

Jun li ixq naxye re laj Jose naq jun ch’uut li winq yookeb’ chixsik’b’al li teep re Israel.

Naq toj yookeb’ chi b’eek, ke’b’oqe’ xb’aan jun li ixq. Kixye naq jun siireb’ li winq yookeb’ chi chalk re xkamsinkileb’.

Santos, 1:203

Oob’ li winq wankeb’ sa’ xb’een kawaay neke’xyeechi’ xrahob’tesinkil laj Jose ut li teep re Israel.

Li teep re Israel ke’xnumsi li q’ojyin sa’ jun li tz’uul sa’ xb’een chaq li nima’. Naq wankeb’ aran, oob’ li winq ke’wulak sa’ kawaay toj b’ar wi’ wankeb’. Ke’xye naq 300 chik chi winq yookeb’ chi xik chixpleetinkil lix na’ajeb’. Naab’aleb’ li komon re li teep re Israel ke’ok xk’a’uxl. Laj Jose kixye naq che’xpaab’ naq te’tenq’aaq xb’aan li Dios.

Santos, 1:203

Laj Jose ut xkomoneb’ chik li kristiaan ke’xtaw xna’aj sa’ jun li iglees.

Moqon kinujak li choxa rik’in q’eqi choql. Kichal li hab’ chi k’a’jo’ xkawil. Kichamo’ li nima’. Li iq’ kixt’aneb’ li che’. Ke’k’utun raq’ li kaaq chiru choxa. Laj Jose ut eb’ li komon ke’xtaw jun li ch’ina iglees b’ar wi’ ke’ru chixkolb’aleb’ rib’. Ke’b’ichan chiru chixjunil li q’ojyin. “Li Dios wan sa’ li kawil hab’ a’in!” chan laj Jose.

Santos, 1:203–204

Laj Jose naxye reheb’ li komon re li teep re Israel naq naru neke’sutq’i sa’ rochocheb’.

Li hab’ kixrameb’ li kristiaan li ke’ajok xrahob’tesinkileb’. Ke’kole’ rix sa’ lix na’ajeb’. A’b’an lix jolomil li tenamit kixye naq ink’a’ tixtenq’aheb’ laj santil paab’anel. Li Qaawa’ kixye re laj Jose naq li teep re Israel naru neke’sutq’i sa’ rochocheb’. Eb’ laj santil paab’anel tento te’xk’ojob’ Sion rik’in xpaab’ankileb’ lix taqlahom li Dios. A’an kixyeehi’i naq “tixpleeti li pleet re Sion.”

Tzol’leb’ ut Sumwank 105:1–19; Santos, 1:204–205

Eb’ li komon re li teep re Israel neke’raatina rib’ chirib’ileb’ rib’.

Junjunqeb’ li komon re li ch’uut ke’chal xjosq’il naq ke’rab’i a’an. Ke’raho’ xch’ool xb’aan naq ink’a’ te’ruuq chixyalb’aleb’ ru chirix Sion. Junjunqeb’ kristiaan ke’xk’oxla naq li teep re Israel moko us ta ke’el. A’b’an wankeb’ chik, jo’ laj Brigham Young, laj Heber, ut laj Wilford, ke’xb’antioxi li hoonal ke’xnumsi rik’in li profeet aj Jose ut naq ke’tzolok rik’in a’an.

Santos, 1:205–206

Laj Brigham Young nak’ojob’aak jo’ x’apostol li Jesukristo.

Chirix chik a’an, li Qaawa’ kixye re la Jose Smith naq tixb’oqeb’ Kab’laju chi Apostol re te’tenq’anq chixb’eresinkil lix Iglees. Eb’ li apostol a’aneb’ aj yehol nawom chirix lix k’ab’a’ li Jesukristo sa’ chixjunil li ruchich’och’. Waqxaqib’ reheb’ li Kab’laju chi Apostol ke’wan sa’ li teep re Israel. Li k’anjelak rik’in laj Jose kixtenq’aheb’ chixkawresinkil rib’ choq’ re li k’anjel a’an.

Tzol’leb’ ut Sumwank 18:26–27; 107:23; Santos, 1:214–217