Li Junkabʼal Jackson

Chirix naq li xb’een ch’uut aj santil paab’anel ke’xchap xb’e re xik sa’ li ru taq’a Lago Salado, k’iila mil chik aj santil paab’anel ke’xb’aanu ajwi’ a’an. Najt ke’b’eek ut li Qaawa’ kixtenq’aheb’. Jun reheb’ li junkab’al li ke’b’eek a’an li junkab’al Jackson. Ke’xkanab’ chaq li rochoch aran Inglaterra ut saheb’ xch’ool chi xik chixtenq’ankileb’ laj santil paab’anel chixwaklesinkil Sion.

Tzol’leb’ ut Sumwank 136:1–11; Santos, 2:222–223

Eb’ laj Jackson ke’xq’ax ru li palaw sa’ jun jukub’. Chirix a’an ke’xchap jun li tren chiru xcha’al li b’e toj reetal li ru taq’a Lago Salado. Tento naq ke’b’eek re xchoyb’al li b’e.

Santos, 2:222–223

Ke’xyiib’ jun ch’ina karreet kelonb’il chi uq’ej re xk’amb’al lix waheb’, t’ikr, ut k’a’aq chik re ru li ke’raj xk’amb’al. Naab’aleb’ aj santil paab’anel kaweb’ naq ke’wulak sa’ li ru taq’a chi jo’kan.

Santos, 2:223–226

Li xElizabeth ut laj Aaron Jackson ke’xkelo lix karreet chi ruq’eb’. Eb’ lix kok’al, li xMartha, li xMary, ut laj Aaron, alalb’ej, ke’b’eek. A’an jun kawil k’anjel. Ke’royb’eni wulak sa’ li ru taq’a rub’elaj li hab’al q’e. A’b’an naq kiraqe’ li saq’ehil, toj nim roq li b’e tento te’xb’eeni. Kitikla li ke ut ki’ok chi oso’k xwaheb’.

Santos, 2:223–226, 229, 231–232

Aran Lago Salado, laj Brigham Young kirab’iheb’ resil laj santil paab’anel li yookeb’ chi wulak sa’ li ru taq’a. Yoo xk’a’uxl chirixeb’. Wulajaq chik, sa’ li Iglees, kixye reheb’ chixjunil naq eb’ laj santil paab’anel a’an wankeb’ sa’ ch’a’ajkilal. Kixpatz’ reheb’ naq te’xnujob’resiheb’ karreet rik’in k’a’aq re ru li te’raj ru laj santil paab’anel. “Ayuqex ut k’amomaqeb’ chaq li kristiaan a’an,” chan.

Santos, 2:229–230

Eb’ li ixq sa’ li ch’utam ke’risi lix ramb’aleb’ li roq ut ke’xk’e sa’ li karreet. Wankeb’ chik li k’ek’ehok wa, isb’, xaab’, ut t’ikr. Wiib’ kutan chik chirix a’an, numenaq meero cient chi winq ut jun may chi karreet ke’el sa’ li ru taq’a re xik chi tenq’ank.

Santos, 2:230

Naq li junkab’al Jackson toj yookeb’ chi b’eek, ki’ok chi t’ane’k li saqb’ach. Laj Aaron kiyajer chi tz’aqal. Ink’a’ chik jwal naru chi b’eek. Laj santil paab’anel tento ke’xq’ax ru li kehil nima’ ut a’an kixlaj wi’chik chi us xmetz’ew laj Aaron. Chiru li q’ojyin a’an, laj Aaron kikam. Chi ra xch’ool, lix junkab’al tento te’xik chi uub’ej xjuneseb’ chik.

Santos, 2:232–234

Eq’la wulajaq chik, kitam li saqb’ach chiru li ch’och’. Eb’ laj Jackson ut xkomoneb’ chik laj santil paab’anel ke’xtiikisiheb’ ut ke’xkeloheb’ lix karreet sa’ li saqb’ach. Rajlal kutan ke’tijok re naq te’tenq’aaq xb’aan li Dios.

Tzol’leb’ ut Sumwank 136:29; Santos, 2:234–35

Sa’ jun q’ojyin, li xElizabeth yoo xk’a’uxl chirixeb’ lix kok’al. Yookeb’ xtz’okajik ut ke neke’reek’a. Ma te’ruuq ta b’i chi wulak sa’ li ru taq’a Lago Salado? Kiwar ut kixmatk’i naq kiril laj Aaron. A’an kixye re, “Kawaq aach’ool, at Elizabeth.” A’an kixye re naq taawulaq xtenq’eb’.

Santos, 2:235–236

Yaal kixye laj Aaron. B’ab’ay chik chirix a’an, li winq ke’el chaq Lago Salado ke’wulak rik’ineb’ lix karreet. Ke’xk’eheb’ xwa ut xt’ikr laj santil paab’anel. Laj santil paab’anel ke’saho’ xch’ool, ke’se’ek, ut ke’xq’aluheb’ li winq. Ke’b’ichan ut ke’b’antioxin chiru li qaChoxahil Yuwa’ xb’aan naq kixsumeheb’ lix tij.

Tzol’leb’ ut Sumwank 136:28; Santos, 2:236

Ke’wulak sa’ li ru taq’a sa’ jun domingo. Laj Brigham Young kixye reheb’ li komon re li Iglees aran Lago Salado naq sa’ xna’aj xik sa’ li Iglees, tento te’xik chixk’ulb’aleb’ laj santil paab’anel li ke’wulak. Ke’xk’eheb’ xsahil xch’ool laj santil paab’anel li ke neke’reek’a ut lub’luukeb’ ut ke’xb’oqeb’ chi kanaak sa’eb’ li rochoch.

Santos, 2:239–240