Li Qʼol Nim Xtzʼaq

Sa’ jun kutan, jun winq kiwulak aran Kirtland rik’ineb’ najteril kamenaq aj Egipto. Rik’ineb’ li kamenaq wankeb’ li b’otb’ookil hu, a’aneb’ najteril hu. Wankeb’ li tz’iib’ aj Egipto chiruheb’ li b’otb’ookil hu. Li winq kixk’uteb’ li hu chiru li profeet aj Jose Smith. Laj Jose kiraj xtz’ilb’aleb’ rix li tz’iib’ahom.

Santos, 1:219–220

Eb’ li ramiiw laj Jose ke’xtenq’a chixloq’b’aleb’ li najteril kamenaq ut li b’otb’ookil hu. Naq laj Jose yoo chixtz’ilb’al rix li tz’iib’anb’il, li Qaawa’ kixk’utb’esi chiru a’an li najteril aatin kixtz’iib’a laj Abraham, jun profeet sa’ li Santil Hu. Chi tenq’anb’il xb’aaneb’ li ramiiw jo’ laj Oliver Cowdery, laj Jose kixtz’iib’a li kixk’ut li Qaawa’ chiru chirix li raatin laj Abraham.

Santos, 1:220

Laj Abraham kiril chaq chi k’utb’esinb’il li qayu’am rik’in li qaChoxahil Yuwa’ rub’elaj naq kooyo’la. Kiril naq kisik’e’ ru li Jesus jo’ aj Kolol qe. Laj Abraham kitzolok ajwi’ chirix lix yo’ob’tesinkil li ruchich’och’. Eb’ laj santil paab’anel ke’saho’ xch’ool chixk’ulb’al li raatin laj Abraham. Ke’saho’ xch’ool naq li Qaawa’ naraj xk’utb’al xkomon chik li na’leb’ chiruheb’.

Abraham 2:6–11; 3–5; Santos, 1:220

Lix tz’iib’ahom laj Abraham ki’oksiik sa’ jun loq’laj hu, li Q’ol Nim Xtz’aq nayeeman re. Sa’ li hu a’in wan ajwi’ lix tz’iib’ahom laj Moises, jun chik li profeet sa’ li Santil Hu. Wankeb’ li yaalil na’leb’ sa’ li hu a’an li maak’a’eb’ chik sa’ li Santil Hu. Li Qaawa’ kiraj naq li kristiaan te’xnaweb’ li na’leb’ a’an, jo’kan naq a’an kixk’uteb’ chiru laj Jose Smith.

Moises 1–8; Abraham 1–5

Natawman ajwi’ sa’ li Q’ol Nim Xtz’aq lix ch’olob’ahom laj Jose Smith jo’ ajwi’ eb’ lix Raqalil li Paab’aal oxlaju. Laj Jose Smith kixtz’iib’aheb’ a’an re naq li ruchich’och’ tixnaw k’a’ru neke’xpaab’ laj Santil Paab’anel sa’ Roso’jikeb’ li Kutan. Li Q’ol Nim Xtz’aq moko nim ta, chanchan jun ch’ina q’ol, a’b’an k’a’jo’ xnimal xtz’aq.

Jose Smith—Resilal; Eb’ lix Raqalil li Paab’aal 1