Li santil ochoch re Kirtland naq’axtesiik

“Li santil ochoch re Kirtland naq’axtesiik,” Eb’ li Seraq’ sa’ li Tzol’leb’ ut Sumwank (2024)

“Li santil ochoch re Kirtland naq’axtesiik,” Eb’ li Seraq’ sa’ li Tzol’leb’ ut Sumwank

Marzo re 1836

Li santil ochoch re Kirtland naq’axtesiik

Reek’ankil lix Musiq’ li Qaawa’ sa’ li rochoch

Jun junkab’al na’ok sa’ li santil ochoch re Kirtland

Chirix xnumik oxib’ chihab’ re kawil k’anjel, kiyaalo’ xkab’lankil li santil ochoch re Kirtland. Li profeet aj Jose kixb’oqeb’ laj santil paab’anel sa’ jun ch’utam re xq’axtesinkil li santil ochoch. A’an taatijoq ut tixq’axtesi li santil ochoch re li Qaawa’. A’an taakanaaq choq’ xsantil ochoch li Qaawa’.

Santos, 1:235

Eb’ li kristiaan neke’xch’utub’ rib’ sa’ li santil ochoch choq’ re lix q’axtesinkil.

Eq’la rub’elaj li ch’utam, naab’al cient chi aj santil paab’anel ke’ch’utla sa’ li santil ochoch. Naq maak’a’ chik li chuleb’aal, li kristiaan ke’xxaqab’ rib’ sa’ li rokeb’aal ut chirix kab’l, yookeb’ chi ilok chiruheb’ li ventaan. Chixjunileb’ saheb’ xch’ool naq te’ril lix q’axtesinkil li santil ochoch.

Santos, 1:235–236

Laj Jose Smith naxyaab’asi li tij re q’axtesink.

Laj Jose kixyaab’asi jun tij re xq’axtesinkil li santil ochoch. A’an kixye re li Qaawa’ naq eb’ laj santil paab’anel xe’ab’in chiru li raatin. Kixpatz’ re li Qaawa’ naq tixk’ulub’a li santil ochoch choq’ rochoch a’an.

Tzol’leb’ ut Sumwank 109:1–5

Li kristiaan neke’xtz’ap li ru sa’ li tijok.

Laj Jose kixtz’aama naq chixjunileb’ li te’chalq sa’ li santil ochoch te’reek’a lix wankil li Qaawa’ ut te’xnaw naq a’an li rochoch.

Tzol’leb’ ut Sumwank 109:13

Laj Jose kixtz’aama ajwi’ naq wi te’maakob’q laj santil paab’anel, tikto te’xjal xk’a’uxl. Kixpatz’ re li Qaawa’ naq tixk’e xwankilaleb’ re xwotzb’al lix evangelio sa’ chixjunil li ruchich’och’. Chirix li tij, eb’ laj b’ichanel ke’xb’icha jun ak’ b’ich, “Lix Musiq’ li Dios” xk’ab’a’. Ke’nujak li kristiaan rik’in sahil ch’oolejil. Ke’xaqli ut ke’xnima ru li Qaawa’.

Tzol’leb’ ut Sumwank 109:21–32; Eb’ li B’ich, 2; Santos, 1:237

Jun saqen k’a’jo’ xlemtz’il nakana sa’ xb’een li santil ochoch.

Naab’aleb’ li kristiaan ke’rileb’ li anjel sa’ li santil ochoch chiru li kutan a’an. Ke’rileb’ li saqen k’a’jo’ xlemtz’ileb’ li neke’kub’e chaq sa’ choxa toj sa’ xb’een li santil ochoch. Ke’wan li ke’xye naq a’an chanchan jun choql; ke’wan chik li ke’xye naq chanchan xam. Chixjunileb’ ke’reek’a naq li santil ochoch a’an jun loq’laj na’ajej. Relik chi yaal naq kikana jo’ rochoch li Qaawa’.

Santos, 1:237