“Laj Parley ut li xThankful Pratt,” Eb’ li Seraq’ sa’ li Tzol’leb’ ut Sumwank (2024)
“Laj Parley ut li xThankful Pratt,” Eb’ li Seraq’ sa’ li Tzol’leb’ ut Sumwank
Agosto–septiembre re 1830
Laj Parley ut li xThankful Pratt
Li paab’aal re xtaaqenkil li Musiq’ej
Laj Parley Pratt ut li xThankful Pratt a’aneb’ chaq aj k’anjel sa’ awimq aran Ohio. Sa’ jun kutan, laj Parley kireek’a naq li Musiq’ej naxye re naq taa’elq sa’ li rochoch re k’utuk chiruheb’ li kristiaan chirix li Santil Hu.
Santos, 1:92
Laj Parley ut li xThankful ke’xk’ayi lix ch’och’. Ink’a’ ke’xnaw b’ar raj te’xik, a’b’an ke’xpaab’ naq te’osob’tesiiq xb’aan li Dios xb’aan naq neke’k’anjelak chiru.
Santos, 1:92
Laj Parley ut li xThankful ke’xchap b’ab’ay li t’ikr ut tumin ut ke’taqe’ sa’ jun jukub’. Naq ke’wulak aran Nueva York, li Musiq’ej kixye re laj Parley naq taa’elq sa’ li jukub’. Laj Parley kixpatz’ re li xThankful naq taaxik xjunes. Kixye re naq chi seeb’ toxixtaw a’an. Kireek’a naq wan k’a’ru naraj li Dios naq tixb’aanu aran Nueva York.
Santos, 1:92
Laj Parley kib’eek chiru jun b’e najt roq. Toj reetal naq kiwulak sa’ rochoch jun aj jultikanel aatin. Laj jultikanel aatin kiraatina laj Parley chirix jun li hu jalan b’ayaq ke’xsi re. Ki’el chaq chiru perel ch’iich’ oor ut kitz’iib’aman chaq najter. Kinawman ru jo’ lix Hu laj Mormon. Jun li saaj aj Nueva York kixjaltesi ru rik’in lix wankilal li Dios.
Santos, 1:92
Laj Parley kiraj rilb’al li hu. Laj jultikanel aatin kixk’ut li hu chiru laj Parley. Chi sa xch’ool, laj Parley kixte li hu ut ki’ok chirilb’al. Ke’nume’ li hoor, a’b’an ink’a’ naru xkanab’ankil rilb’al li hu, chi moko yal ta re raj wa’ak malaj wark. Lix Musiq’ li Qaawa’ kixye re a’an naq yaal.
Santos, 1:92–93
Kiwulak tz’aqal chiru laj Parley lix Hu laj Mormon ut kiraj xtawb’al li winq kijaltesin ru. Kib’eek toj sa’ lix ch’och’ li junkab’al Smith, b’ar wi’ kixnaw ru laj Hyrum, li ras laj Jose. Ke’aatinak chiru chixjunil li q’ojyin. Laj Hyrum kixye re laj Parley naq lix Hu laj Mormon tz’aqal yaal. Kixk’e jun li re laj Parley.
Santos, 1:93
Naq yoo chirilb’al, laj Parley kixtzol naq li Jesukristo kirula’ani li tenamit li wan sa’ li ch’och’ America najter chaq. Laj Parley kixk’e reetal naq lix Hu laj Mormon k’a’jo’ wi’chik xloq’al chiru chixjunil lix b’ihomal li ruchich’och’. Kiraj ru sutq’iik rik’in li xThankful ut xwotzb’al rik’in a’an li k’a’ru kixtzol.
Santos, 1:93; 3 Nefi 11:1–12
Laj Parley ki’aatinak rik’in li xThankful ut xkomoneb’ chik lix junkab’al chirix lix Hu laj Mormon. Kixye reheb’ k’a’ru naxk’ut chirix li Jesukristo. Li xThankful kisaho’ xch’ool naq laj Parley kixtaaqe li Musiq’ej ut kixtaw li k’anjel kiraj li Dios naq tixb’aanu. Jo’ ajwi’ laj Parley, li xThankful kixtzol xjunes rib’ naq lix Hu laj Mormon tz’aqal yaal.
Santos, 1:98–99