Li xSusa Young Gates ut laj Joseph F. Smith

Li xSusa Young Gates a’an xrab’in laj Brigham Young. Kiyo’la ut kik’i aran Utah. Nawulak chiru tz’iib’ak ut nawulak chiru li k’anjelak sa’ lix Iglees li Qaawa’.

Santos, 3:9–10, 64

Naq ak nim chik li xSusa, kiyajer. Kixpatz’ jun rosob’tesinkil rik’in li tijonelil. Sa’ li osob’tesihom a’an, li Qaawa’ kixye re li xSusa naq naraj naq tixb’aanu li k’anjel sa’ li santil ochoch.

Santos, 3:193–194

Chirix li osob’tesink, ki’usa li xSusa. Kiroksi lix hoonal chi tzolok chirix li resilal lix junkab’al. Naq naxtaweb’ resil lix komon li ak kamenaqeb’ chi ink’a ke’kub’e xha’, naxik sa’ li santil ochoch re taakub’siiq xha’ choq’ reheb’ a’an. Nawulak chiru raatinankileb’ li kristiaan chirix li k’anjel re resilal li junkab’al. A’b’an, naab’aleb’ li kristiaan li ink’a’ neke’raj xnawb’al a’an.

Santos, 3:194–195, 206

Sa’ jun kutan, li xSusa kirula’ani chaq jun ramiiw, a’ laj Joseph F. Smith, li Awa’b’ej re li Iglees. Li Awa’b’ej Smith yaj chaq chiru k’iila xamaan. Li xSusa kixnaw naq ra ajwi’ xch’ool a’an xb’aan naq kikam li ralal. Naraho’ ajwi’ xch’ool chirix junjunq li na’leb’ nak’ulman sa’ li ruchich’och’, jo’ li pleetink-ib’ ut eb’ li yajel.

Santos, 3:197–199, 205–206

A’b’an naq li xSusa kichunla rik’in li Awa’b’ej Smith, sa xch’ool chi aatinak rik’in a’an. Kixye re li xSusa naq li Dios kixk’e jun k’utb’esinb’il na’leb’ re. Wan rilom rik’in li ruchich’och’ reheb’ li kamenaq, b’ar wi’ neke’xik li kristiaan chirix naq neke’kam. Lix k’utb’esinb’il na’leb’ tz’iib’anb’il chiru hu. Li Awa’b’ej Smith kixk’e re li xSusa ut kixpatz’ re naq taaril.

Santos, 3:206–207

Li xSusa kiril li hu. Naxye naq li Jesukristo kiwulak sa’ li ruchich’och’ reheb’ li musiq’ej. Kixtaqla laj Adan, li xEva, ut wankeb’ chik xkomon li winq ut ixq li wankeb’ xtiikilal re naq te’xk’ut li evangelio chiruheb’ li musiq’ej li ink’a’ ke’xk’ul li evangelio naq yo’yookeb’. Yookeb’ chixtenq’ankileb’ li musiq’ej a’an chixkawresinkil rib’ re naq eb’ li kristiaan te’ruuq chi kub’eek xha’ sa’ li santil ochoch choq’ reheb’ a’an.

Tzol’leb’ ut Sumwank 138:11–19, 29–48; Santos, 3:206–207

Li xSusa kisach xch’ool naq kiril lix k’utb’esinb’il na’leb’ li Awa’b’ej Smith. Li Awa’b’ej Smith kise’ek rik’in. “Susa,” chan re, “nim li k’anjel yookat chixb’aanunkil.” Kixye re naq naxra xb’aan lix paab’aal chirix li Qaawa’.

Santos, 3:206

Li xSusa kitz’iib’ak chirix li k’utb’esinb’il na’leb’ sa’ lix diario. “Oh, kixk’ojob’ inch’ool a’an!” chan. Kiraj ru xseraq’inkil reheb’ li ramiiw ut xkomoneb’ chik li komon sa’ li Iglees. Kixnaw naq lix k’utb’esinb’il na’leb’ li Awa’b’ej Smith tixtenq’aheb’ laj santil paab’anel chixsahob’resinkileb’ xch’ool re xb’aanunkil li k’anjel re li santil ochoch choq’ reheb’ li kristiaan li wankeb’ sa’ li ruchich’och’ reheb’ li musiq’ej.

Santos, 3:207