Eb’ li apostol neke’k’anjelak chaq sa’ jun mision aran Gran Bretaña

“Eb’ li apostol neke’k’anjelak chaq sa’ jun mision aran Gran Bretaña,” Eb’ li Seraq’ sa’ li Tzol’leb’ ut Sumwank (2024)

“Eb’ li apostol neke’k’anjelak chaq sa’ jun mision aran Gran Bretaña,” Eb’ li Seraq’ sa’ li Tzol’leb’ ut Sumwank

Julio re 1838–julio re 1841

Eb’ li apostol neke’k’anjelak chaq sa’ jun mision aran Gran Bretaña

Xpaab’ankil lix yeechi’ihom li Qaawa’

Laj Jose Smith naxk’ul jun k’utb’esinb’il na’leb’ re xk’eeb’al xb’oqb’aleb’ li apostol re li Iglees chi xik sa’ jun mision aran Gran Bretaña.

Sa’ jun k’utb’esinb’il na’leb’ kixk’ul laj Jose Smith, li Qaawa’ kixb’oqeb’ li apostol chi xik toj junpak’al li palaw aran Gran Bretaña. Us ta ch’a’aj choq’ re laj Jose kanaak chi najt rik’ineb’ li apostol, kixkanab’ rib’ sa’ ruq’ li Qaawa’. Ch’a’aj ajwi’ choq’ reheb’ li apostol xkanab’ankileb’ lix junkab’al. A’b’an li Qaawa’ kixyeechi’i naq taarosob’tesiheb’ a’an.

Tzolʼlebʼ ut Sumwank 118

Laj Heber C. Kimball ut li rixaqil, xVilate, toj ka’ch’in lix junkab’aleb’. Wan jun xk’uula’aleb’ li toje’ jun po xyo’lajik. Naab’aleb’ reheb’ lix junkab’al yajeb’.

Santos, 1:405

Laj Brigham Young naxkawresi rib’ re xik sa’ lix mision.

Laj Brigham Young yaj ajwi’, ut lix junkab’al jwal neb’a’. A’b’an li rixaqil, xMary Ann, kixye re, “Ayu ut b’aanu chaq laa mision, ut li Qaawa’ tatrosob’tesi.”

Santos, 1:404–405

Laj Brigham Young nakana sa’ rochoch laj Heber C. Kimball.

Laj Brigham kixtikib’ b’eek, a’b’an naq kiwulak sa’ li rochoch laj Heber, ki’oso’ xmetz’ew ut ink’a’ chik kiru chi b’eek. Kikana sa’ li rochoch laj Heber chiru wiib’ oxib’ kutan.

Santos, 1:405

Li xMary Ann Young naril laj Brigham ut laj Heber.

Li xMary Ann kiwulak chirilb’al laj Brigham toj reetal naq a’an ut laj Heber ke’kawu re naq te’xik. Ke’laj xmetz’ew sa’ kab’ichal, a’b’an ke’raj xjultikankil li evangelio.

Santos, 1:405

Laj Brigham ut laj Heber neke’xchap xb’e re xik sa’ lix mision.

Laj Heber ut laj Brigham ke’xchaq’rab’i rib’ rik’ineb’ li rixaqil ut ke’taqe’ sa’ xb’eeneb’ lix karreet. Ra ke’reek’a xkanab’ankileb’ lix junkab’al li yajeb’ ut neb’a’eb’. Naq ki’ok chi xik lix karreeteb’, laj Heber kixye re laj Brigham, “Ch’a’aj xb’aanunkil a’in.” Kiraj xtenq’ankileb’ lix junkab’al chi wank chi kaw xch’ooleb’. Laj Heber kixpatz’ re laj ch’e’ol re li karreet naq taaxaqliiq.

Santos, 1:405–406

Laj Brigham ut laj Heber neke’xaqli chixchaq’rab’inkileb’ rib’.

Sa’ chaq li kab’l, li xVilate kirab’i jun choqink. Kiwulak sa’ li okeb’aal, b’ar wi’ xaqxo li xMary Ann. Ke’ril laj Heber ut laj Brigham xaqxookeb’ sa’ xb’een li karreet, neke’reek’asi lix punit ut neke’xye, “Hurra! Hurra! Hurra choq’ re Israel!” Eb’ li ixq ke’xye, “Toj taqil qib’! Li Dios chi’osob’tesinq eere!”

Santos, 1:406

Laj Brigham ut laj Heber neke’jultikan aran Gran Bretaña.

Chirix xq’axb’al ru li palaw, laj Heber ut laj Brigham ke’wulak aran Gran Bretaña. Rochb’eeneb’ xkomoneb’ chik li apostol, ke’xtzoleb’ naab’aleb’ li kristiaan chirix li Jesukristo ut lix evangelio. K’iila mil li kristiaan ke’kub’e xha’ ut ke’ok sa’ lix Iglees li Kolonel.

Santos, 1:408–411

Eb’ laj santil paab’anel neke’q’axon aran Nauvoo.

Naab’aleb’ reheb’ li kristiaan ke’kub’e xha’ aran Gran Bretaña ke’q’axon aran Nauvoo re tenq’ank chixwaklesinkil li tenamit ut li santil ochoch. Li Qaawa’ kixtz’aqob’resi ru lix yeechi’ihom naq taarileb’ lix junkab’al laj Heber ut laj Brigham naq yookeb’ chaq chi k’anjelak jo’ misioneer.

Santos, 1:437–439