Li tz’alam aran Liberty

Xtawb’al li Qaawa’ chiruheb’ li hoonal ch’a’aj

Jun siireb’ aj pleet neke’risiheb’ laj santil paab’anel sa’ li rochocheb’ aran Missouri.

Eb’ laj santil paab’anel ke’wan aran Missouri xik’ neke’ile’ xb’aaneb’ naab’aleb’ li kristiaan. Laj jolominel tenamit kixtaqlaheb’ aj pleet re naq te’risiheb’. Laj pleet ke’risiheb’ laj santil paab’anel sa’ li rochocheb’, ke’relq’a li k’a’ru reheb’ ut naab’aleb’ ke’xrahob’tesi.

Santos, 1:355–356, 362, 364

Eb’ laj pleet ke’xchap laj Jose Smith ut xkomoneb’ chik laj jolominel re li Iglees.

Laj pleet ke’xchap li profeet aj Jose Smith ut xkomoneb’ chik laj jolominel re li Iglees.

Santos, 1:357–358

Li ralal laj Jose Smith nayaab’ak naq neke’xk’am laj Jose chi preexil.

Laj Jose kixpatz’ ma naru te’xk’e b’ayaq xhoonal xjunes rik’in lix junkab’al. Laj pleet ke’xye naq ink’a’. Ke’xk’am laj Jose ut xkomoneb’ chik li ke’chape’.

Santos, 1:366

Laj Jose naxye reheb’ laj k’aak’alenel naq te’xkanab’ aatinak.

Sa’ jun q’ojyin, laj Jose ut xkomoneb’ chik li preex ke’rab’iheb’ laj k’aak’alenel chi se’ek chirix li k’a’ru ink’a’ us ke’xb’aanu reheb’ laj santil paab’anel. Laj Jose ink’a’ chik kixkuy rab’inkil a’an. Kixaqli ut kixye chi kaw xyaab’ xkux, “Mexchoqink chik!” Ki’aatinak rik’in lix wankilal li Dios. Laj k’aak’alenel ke’xuwak. Ke’xpatz’ xkuyb’al ut ke’xkanab’ aatinak.

Santos, 1:367–368

Laj Jose ut eb’ li ramiiw sa’ li tz’alam aran Liberty.

Chirix chik a’an, laj Jose ut eb’ li ramiiw ke’tz’ape’ sa’ jun tz’alam sa’ jun tenamit Liberty xk’ab’a’. K’a’jo’ li ke sa’ li tz’alam, ka’ch’in ut q’ojyin xsa’. B’ab’ay ajwi’ li k’im tz’aj ru wan aran re wark. B’ab’ay ajwi’ li tzakemq ut ke’yajer xb’aan a’an.

Santos, 1:369–370, 374, 384–385

Laj Jose yoo xk’a’uxl chirixeb’ laj santil paab’anel.

Laj Jose kixk’oxlaheb’ laj santil paab’anel chi numtajenaq. Naxraheb’ a’an. Yoo xk’a’uxl chirixeb’. A’b’an maak’a’ naru naxb’aanu re xtenq’ankileb’.

Santos, 1:385–386

Laj Jose Smith natijok sa’ li tz’alam aran Liberty.

Kitijok chi numtajenaq. Kixpatz’ re li Dios b’ar wan a’an ut k’a’ut naq ink’a’ naxtenq’aheb’ laj santil paab’anel. Ma ink’a’ chik najultikaak a’an ut li Iglees xb’aan li Dios?

Tzol’leb’ ut Sumwank 121:1–6

Li Dios kixsume lix tij laj Jose. A’an kixye, “At walal, tuqtuukilal chiwanq sa’ aawaam.” Kixye re laj Jose naq lix ch’a’ajkilal moko taakanaaq ta chi junelik ut naq a’anaq li k’a’ru chaab’il choq’ re. Li Dios kixjultika re laj Jose naq k’a’jo’ wi’chik xch’a’ajkilal li k’a’ru kixnumsi li Jesukristo. Kixyeechi’i naq tawanq rik’in laj Jose “chi junelik q’e kutan.”

Tzol’leb’ ut Sumwank 121:7; 122:5–9