Jun kutan re k’irtesink

Rosob’tesinkileb’ li yaj rik’in lix wankil li Dios

Jun aj k’aak’alenel sa’ li tz’alam na’aatinak rik’in laj Jose Smith.

Naq ke’wan laj Jose Smith ut li rech aj jolominel sa’ li Iglees sa’ jun tz’alam aran Misuri, eb’ laj k’aak’alenel kixk’ameb’ sa’ jalan chik li tz’alam. Eb’ laj k’aak’alanel ke’rileb’ laj preex rik’in chaab’ilal sa’ xch’ooleb’. Sa’ jun q’ojyin, li xb’eenil aj k’aak’alenel kixye re laj Jose naq wark re, ut naq wi te’eeleliq laj Jose ut eb’ li ramiiw, moko tixyal ta xramb’aleb’.

Santos, 1:392–393

Laj Jose naxk’e xsahil xch’ool lix junkab’al.

Laj Jose ut li rech aj jolominel sa’ li Iglees ke’eelelik. Ke’xtaweb’ lix junkab’al sa’ jun tenamit Quincy xk’ab’a’.

Santos, 1:395–396

Li kristiaan neke’xk’e xtzakemqeb’ ut xmuheb’aaleb’ laj santil paab’anel.

Eb’ li kristiaan aran Quincy ke’xk’ut xchaab’ilal xch’ooleb’ chiruheb’ laj santil paab’anel. Ke’xk’e xtzakemqeb’ ut xt’ikreb’ ut xmuheb’aaleb’ laj santil paab’anel.

Santos, 1:377

Eb’ laj santil paab’anel neke’ok chixwaklesinkil Nauvoo.

Eb’ laj santil paab’anel ke’xb’antioxi xchaab’ilaleb’ xch’ool li kristiaan aran Quincy. A’b’an laj Jose kixnaw naq tento te’xtaw tz’aqal xna’ajeb’ a’an. Eb’ laj jolominel sa’ li Iglees ke’xloq’ jun siir chi ch’och’ li maa’ani chik na’ajok re, ut eb’ laj santil paab’anel ke’ok chi q’axonk toj aran.

Santos, 1:399–400

Jun ixq naxch’oolani jun chik li ixq li jwal yaj.

Li ch’och’ a’an wan chixk’atq jun nima’. Jwal t’aqt’aq ut sulul li ch’och’ ut nujenaq chi ch’en. Eb’ li ch’en ke’xrahob’tesiheb’ laj santil paab’anel rik’in jun yajel, li malaria xk’ab’a’. Wankeb’ li ke’kam.

Santos, 1:402

Laj Jose Smith ut laj Wilford Woodruff neke’rosob’tesi, rik’in li tijonelil, jun ch’ina al li yaj.

Naq laj Jose Smith kixk’e reetal naq k’a’jo’ xk’ihaleb’ li yaj, kixch’utub’ junjunqeb’ laj jolominel sa’ li Iglees ut kixpatz’ reheb’ naq te’xik chirix. Chiru chixjunil li eq’la, ke’rula’aniheb’ li junkab’al ut eb’ li yaj ut ke’rosob’tesiheb’. Ke’roksi lix wankil li Jesukristo re xk’irtesinkileb’ chiru lix yajeleb’.

Santos, 1:402

Laj Jose na’aatinak rik’in laj Elijah Fordham.

Jun reheb’ li ke’rula’ani a’an laj Elijah Fordham xk’ab’a’. A’an q’axal yaj, jo’kan naq li rixaqil kixk’oxla naq kamk re. Laj Jose kixpatz’ re laj Elijah ma wan xpaab’aal re naq taak’irtesiiq.

Santos, 1:402

Laj Elijah naxye re laj Jose naq wan xpaab’aal re naq taak’irtesiiq.

“Nink’oxla naq ak x’oso’ li hoonal,” chan laj Elijah. Laj Jose kixpatz’ re laj Elijah ma naxpaab’ li Jesukristo. “Ninpaab’, Hermano Jose,” chan.

Santos, 1:402

Laj Elijah naxaqli chirix xk’ulb’al rosob’tesinkil rik’in li tijonelil.

Laj Jose kirosob’tesi a’an sa’ xk’ab’a’ li Jesukristo. Kixaqli laj Elijah. K’irtesinb’il chik xb’aan li Jesus! Toja’ naq laj Elijah kixtaaqe laj Jose sa’ li junkab’al jun chik ut kixtenq’a chirosob’tesinkil xkomoneb’ chik li yaj.

Santos, 1:402–403