Li ch’a’ajkilal aran Misuri

Xkawob’resinkil li paab’aal sa’eb’ li hoonal xiwxiw

Li kristiaan aran Independence neke’josq’o’ naq yookeb’ chi wulak laj santil paab’anel.

Ke’wulak naab’aleb’ laj santil paab’anel aran Independence, Misuri. Li Qaawa’ kiraj naq te’xkab’la li tenamit Sion aran. A’b’an eb’ laj santil paab’anel ut li kristiaan ak wankeb’ aran Independence ink’a’ ke’xk’am rib’ chi us. Ke’xwech’i rib’ chirib’ileb’ rib’. Ke’wan li ke’josq’o’ ut ke’raj ralinasinkileb’ laj santil paab’anel.

Tzol’leb’ ut Sumwank 57:1–3; Santos, 1:171–174

Eb’ laj jolominel aran Independence neke’aatinak rik’in laj Edward Partridge.

Laj Edward Partridge a’an chaq li obiisp aran Independence. Kiwulak sa’ jun ch’utam rik’ineb’ laj jolominel sa’ li tenamit. Ke’xye naq eb’ laj santil paab’anel tento te’elq aran Independence. Li Obiisp Partridge kixnaw naq li Dios kiraj naq eb’ laj santil paab’anel te’xwaklesi Sion aran Independence. A’an kixye naq ink’a’ te’ruuq chi elk laj santil paab’anel.

Santos, 1:176

Eb’ li josq’ aj winq neke’xt’aneb’ li ochoch ut li kab’l.

Eb’ li josq’ aj winq ke’xtikib’ xt’anb’aleb’ li ochoch ut li kab’l ak ke’xkab’la laj santil paab’anel.

Santos, 1:177–178, 182

Eb’ li winq neke’xchap laj Edward Partridge ut laj Charles Allen.

Eb’ li winq ke’xchap li Obiisp Patridge ut jun chik li winq, laj Charles Allen xk’ab’a’, chirix li rochocheb’. Ke’xkeloheb’ li wiib’ chi winq toj sa’ xyi li tenamit.

Santos, 1:179

Laj Edward ut laj Charles neke’bone’ rik’in tiqwal q’ol ut rismal kaxlan.

Li Obiisp Partridge kixye, “Wi tento tinrahob’tesiiq sa’ xk’a’b’a’ lin paab’aal, ak ke’rahob’tesiik ajwi’ li ke’chal chiwu.” Eb’ li winq ke’xkut li Obiisp Partridge ut laj Charles chi ch’och’. Ke’xb’oneb’ xtib’el rik’in tiqwal q’ol ut rismal kaxlan.

Santos, 1:179–180

Laj William McLellin naxmuq rib’ sa’ k’iche’.

Laj William McLellin, jun komon sa’ li Iglees aran Independence, kirab’i resil li neke’xb’aanu li josq’ aj kristiaan. A’an kixxuwak ut kixmuq rib’ sa’ k’iche’.

Santos, 1:182

Laj William ink’a’ naxnaw k’a’ raj ru tixb’aanu wi ta taachape’q.

Laj William ink’a’ kixnaw k’a’ raj ru taak’ulmanq wi ta taatawe’q xb’aaneb’ li josq’ aj winq. Ma tixye raj naq yaal lix Hu laj Mormon, us ta te’xkamsi xb’aan a’an?

Santos, 1:182–183

Laj Oliver Cowdery ut laj David Whitmer neke’xtaw laj William.

Eb’ li ramiiw laj William, laj Oliver Cowdery ut laj David Whitmer, ke’xtaw sa’ k’iche’. Laj William kixnaw naq laj Oliver ut laj David neke’xpaab’ naq yaal lix Hu laj Mormon. Jun li anjel kixk’uteb’ chaq li perel ch’iich’ oor chiruheb’. “Yehomaq we,” chan laj William, “ma yaal lix Hu laj Mormon?”

Santos, 1:183

Laj Oliver ut laj David neke’xwotz xnawomeb’ xch’ool rik’in laj William.

Laj Oliver ut laj David ke’xye re laj William naq yaal lix Hu laj Mormon. Ke’xye naq us ta li josq’ aj winq te’xyal xkamsinkileb’, maajo’q’e te’xkanab’ xwotzb’al xnawomeb’ xch’ool rik’ineb’ li kristiaan. “Ninpaab’ lee raatin,” chan laj William.

Tzol’leb’ ut Sumwank 17:3–6; Santos, 1:183