Eb’ laj yehol nawom neke’ril li perel ch’iich’ re lix Hu laj Mormon

“Eb’ laj yehol nawom neke’ril li perel ch’iich’ re lix Hu laj Mormon,” Eb’ li Seraq’ sa’ li Tzol’leb’ ut Sumwank (2024)

“Eb’ laj yehol nawom neke’ril li perel ch’iich’ re lix Hu laj Mormon,” Eb’ li Seraq’ sa’ li Tzol’leb’ ut Sumwank

Marzo–septiembre 1829

Eb’ laj yehol nawom neke’ril li perel ch’iich’ re lix Hu laj Mormon

Yehok nawom chiru li ruchich’och’

Junjunqeb’ li kristiaan yookeb’ xjosq’il rik’in laj Jose Smith.

Laj Jose, li xEmma, ut laj Oliver toj ke’xjaltesi ru li perel ch’iich’ sa’ rochocheb’ laj Smith aran Pesilvania. A’b’an li kristiaan sa’ lix tenamiteb’ ke’raj xramb’aleb’. Laj Oliver kiwan jun ramiiw aj David Whitmer xk’ab’a’ li wan aran Nueva York. Laj Oliver kixpatz’ re laj David ma naru te’nume’q chi wank sa’ rochoch li junkab’al Whitmer re naq te’xchoy li jaltesink.

Santos, 1:68

Laj David Whitmer naxk’uleb’ laj Jose, li xEmma, ut laj Oliver sa’ li rochoch.

Laj David ut lix junkab’al ke’xk’ulub’a a’an. Ke’xk’uleb’ laj Jose, li xEmma, ut laj Oliver sa’ li rochocheb’. Anajwan te’ruuq chi k’anjelak sa’ tuqtuukilal rik’in li jaltesink. Naab’aleb’ li kristiaan wankeb’ sa’ li rochocheb’ laj Whitmer. A’an naraj naxye naq naab’al li k’anjel naraj b’aanumank, mas wi’chik choq’ re li xMaria, xna’ laj David.

Santos, 1:68–70

Li anjel Moroni naxk’utb’esi rib’ chiru li xMaria Whitmer.

Sa’ jun kutan, naq li xMaria yoo chi k’anjelak, ki’ula’aniik xb’aan li anjel Moroni. Kixye naq a’an naxnaw naq yoo chi lub’k xb’aan xk’ihal li k’anjel yoo chixb’aanunkil. Kiraj xkawob’resinkil lix paab’aal. Kixte jun li b’oolx ut kirisi li perel ch’iich oor. Kixte li perel ut kixk’ut chiru li xMaria li k’a’ru tz’iib’anb’il. Kixyeechi’i re li xMaria naq taa’osob’tesiiq.

Santos, 1:70–71

Laj David Whitmer, laj Martin Harris, ut laj Oliver Cowdery neke’xpatz’ re laj Jose ma naru neke’wan choq’ aj yehol nawom.

Junjunqeb’ li kristiaan neke’xk’oxla naq moko tz’aqal wankeb’ ta li perel ch’iich’. Laj Jose kixpaab’ lix taqlahom li Qaawa’ naq maa’ani tixk’ut wi’ li perel ch’iich’. Li Qaawa’ kixye naq tixk’eheb’ oxib’ chik aj yehol nawom chirilb’al li perel ch’iich’. Laj David Whitmer, laj Martin Harris, ut laj Oliver Cowdery ke’xpatz’ ma naru neke’wan choq’ aj yehol nawom. Li Qaawa’ kixye naq neke’ru.

Tzol’leb’ ut Sumwank 5:11–12; 17; Santos, 1:73

Laj Jose, laj Martin, laj Oliver, ut laj David neke’tijok re xk’ulb’al xnawomeb’ chirix li perel ch’iich’ oor.

Laj Jose, laj Martin, laj Oliver, ut laj David ke’ok sa’ li k’iche’. Ke’wiq’la ut sa’ junjunqal ke’xpatz’ re li Dios ma naru neke’ril li perel ch’iich, a’b’an maak’a’ kik’ulman.

Santos, 1:73

Laj Martin Harris narisi rib’ sa’ li ch’uut.

Laj Martin Harris kireek’a naq sa’ xk’ab’a’ a’an ink’a’ ke’xk’ul xsumenkileb’ lix tij. Laj Martin ki’el aran ut eb’ lix komon ke’kana chi tijok.

Santos, 1:73

Jun li anjel naxk’utb’esi rib’ chiru laj Oliver, laj David, ut laj Jose.

Kik’utun ut chaq jun li anjel sa’ jun saqen q’axal lemtz’. Kixk’ut li perel ch’iich oor ut li k’a’ru tz’iib’anb’il chi sa’ chiru laj Oliver ut laj David. Ke’rab’i xyaab’ xkux li Dios chixyeeb’al naq laj Jose kixjaltesi ru li perel ch’iich’ rik’in xwankilal li Dios ut naq tz’aqal re ru lix jaltesinkil ru. Li Dios kixye ajwi’ naq tento te’xwotz re chixjunileb’ li k’a’ru xe’ril ut xe’rab’i.

“Lix Chʼolobʼahomebʼ li Waqxaqibʼ chi aj Yehol Nawom”; Santos, 1:73–74

Jun li anjel naxk’utb’esi rib’ chiru laj Martin ut laj Jose.

Laj Jose kixsik’ chaq laj Martin. A’an toj yoo chi tijok. Laj Jose kitijok rik’in. Toja’ ut naq kixk’utb’esi rib’ jun li anjel ut kixk’utb’esi li perel ch’iich’ chiru laj Martin, jo’ kixb’aanu rik’in laj Oliver ut laj David.

Santos, 1:74

Laj Jose naxye reheb’ lix na’ xyuwa’ naq wankeb’ chik li kristiaan xe’ilok re li perel ch’iich’ oor.

Chirix a’an, laj Jose kixsik’eb’ chaq lix na’ xyuwa’, li yookeb’ chaq chirula’aninkil li xMaria Whitmer. Kixye reheb’ naq k’a’jo’ xsahil xch’ool xb’aan naq wankeb’ chik li kristiaan xe’ilok re li perel ch’iich’. Anajwan eb’ laj yehol nawom naru neke’xye reheb’ li kristiaan naq yaal li yoo chixyeeb’al laj Jose. Laj Martin kixye reheb’ chixjunil naq k’a’jo’ xsahil xch’ool xb’aan naq li Dios kixk’e a’an chi wank jo’ jun reheb’ laj yehol nawom.

Santos, 1:74–75

Waqxaqib’ chik li kristiaan neke’xk’ul xnawom xch’ool chirix li perel ch’iich’ oor.

Wiib’ oxib’ kutan chik chirix a’an, li Qaawa’ kixye re laj Jose naq tixk’ut li perel ch’iich’ oor chiruheb’ waqxaqib’ chik li kristiaan—lix yuwa’, wiib’ reheb’ li riitz’in, kaahib’ reheb’ li riitz’in laj David, ut li xb’eelom ranab’ laj David. Ke’xchap li perel ch’iich’ sa’ ruq’eb’ ut ke’rileb’ li perel. Ke’xnaw naq tz’aqal wankeb’ li perel ch’iich’.

“Lix Chʼolobʼahomebʼ li Waqxaqibʼ chi aj Yehol Nawom ”; Santos, 1:75

Laj Jose ut laj Martin neke’ril li perel hu chi isinb’il.

Lix jaltesinkil ru lix Hu laj Mormon ak raqenaq chik. Laj Jose kixq’axtesi li perel ch’iich oor re laj Moroni. Anajwan kiwulak li hoonal naq taa’isimanq chiru hu re naq chixjunileb’ te’ruuq chirilb’al ut chi tzolok chirix li Jesukristo.

Santos, 1:75–76

Laj Jose ut laj Martin neke’saho’ xch’ool xb’aan naq xpuktesiman Lix Hu laj Mormon.

Naab’al li tumin naraj risinkil lix Hu laj Mormon chiru hu. Laj Martin Harris kixq’axtesi xcha’al lix ch’och’ re xtojb’al a’an. Kixb’aanu a’an xb’aan naq naxnaw naq lix Hu laj Mormon tz’aqal yaal. Lix nawom xch’ool laj Martin ut li reheb’ li xkomoneb’ chik aj yehol nawom wan sa’ li junjunq chi hu re naq chixjunileb’ te’ruuq chirilb’al. Eb’ laj yehol nawom maajun wa ke’xq’et lix nawom xch’ooleb’.

Tzol’leb’ ut Sumwank 19:26–27, 34–35; Santos, 1:76–78