Li sumlaak ut li junkab’al li maak’a’ roso’jik

Naq li xEmma ut laj Jose ke’sumla, ke’xk’oxla naq lix sumlajik taaraqe’q naq te’kamq. Jo’kaneb’ chixjunileb’ li sumlaak. A’b’an chirix a’an, li Qaawa’ kixye re laj Jose naq eb’ li sumlaak ut eb’ li junkab’al naru neke’kana chi junelik.

Santos, 1:413

Li Qaawa’ kiraatina laj Jose Smith chirix li sumlaak li maak’a’ roso’jik. Rik’in lix wankilal li tijonelil, jun li winq ut jun li ixq naru neke’ok sa’ sumwank rik’in li Qaawa’. Wi neke’roxloq’i lix sumwank, li Qaawa’ naxyeechi’i naq lix sumlajikeb’ taakanaaq chi junelik. Li tz’apek’ sa’ junajil nayeeman re a’in. B’ab’ay chik chirix a’an, laj Jose ut li xEmma ke’tz’ape’ sa’ junajil choq’ re li junelik q’e kutan.

Tzol’leb’ ut Sumwank 132:7, 19–24; Santos, 1:413, 432–433, 481–482, 492, 502–503

Laj Jose kixtzol ajwi’ naq wi jun winq ut jun ixq neke’tz’ape’ sa’ junajil, lix kok’aleb’ te’tz’ape’q ajwi’ sa’ junajil rik’ineb’. Sa’ xk’ab’a’ xwankilal li Jesukristo, lix junkab’aleb’ naru te’wanq chi junelik. Naq laj Jose kiraatinaheb’ laj santil paab’anel chirix li osob’tesihom a’an, ke’saho’ xch’ool! Ke’raj ru tz’ape’k sa’ junajil.

Tzol’leb’ ut Sumwank 131:2; 132:6–7; Santos, 1:492–493, 580

Chirix chik a’an, li Qaawa’ kixk’ut naq li tz’ape’k sa’ junajil tento taab’aanumanq sa’ li santil ochoch. Laj santil paab’anel ke’k’anjelak chi kaw re xchoyb’al xyiib’ankil li santil ochoch re Nauvoo re naq te’tz’ape’q sa’ junajil. Naq kiru li santil ochoch, naab’aleb’ li junkab’al ke’tz’ape’ sa’ junajil. Ke’tz’ape’ ajwi’ sa’ junajil rik’ineb’ lix komon li kamenaqeb’. K’a’jo’eb’ xb’antioxihom chirix li osob’tesihom a’an!

Santos, 1:579–580