Li sumlaak rik’in numenaq jun li sum aatin

Naq li profeet aj Jose yoo chixtzolb’al li Santil Hu, kiril resileb’ li profeet jo’ laj Abraham ut laj Moises li ke’sumla chaq rik’in numenaq jun li ixaqilb’ej. Laj Jose kiwan naab’al xpatz’om. Jo’kan naq kitijok ut kipatz’ok chiru li Qaawa’.

Tzol’leb’ ut Sumwank 132:1; Santos, 1:121, 503

Li Qaawa’ kixye naq jun winq tento taawanq jun ajwi’ li rixaqil. A’b’an wan naq li Qaawa’ naxtaqla junaq winq chi sumlaak rik’in numenaq jun li ixaqilb’ej. A’an kik’ab’a’iman jo’ li sumlaak rik’in numenaq jun li sum aatin. Li Qaawa’ kixye re laj Jose naq lix tenamit tento te’sumlaaq rik’in numenaq jun li sum aatin ka’ajwi’ wi naxtaqla a’an.

Jakob 2:27–30; Tzol’leb’ ut Sumwank 132:34–39; Santos, 1:121, 290–291, 489–490, 503

K’iila chihab’ chik chirix a’an, li Qaawa’ kixye re laj Jose ut wankeb’ chik xkomon laj santil paab’anel naq te’sumlaaq rik’in numenaq jun li sum aatin. Ch’a’aj chiruheb’ xb’aanunkil li taqlahom a’an.

Santos, 1:290–291, 444–446

Lix jolomil tenamit kixk’eheb’ chaq’rab’ re risinkil li sumlaak rik’in numenaq jun li sum aatin. Junjunqeb’ aj santil paab’anel, sa’ xyanqeb’ a’an wankeb’ laj jolominel sa’ li Iglees, ke’k’ehe’ sa’ tz’alam.

Santos, 2:501–504

Sa’ 1890, li Qaawa’ kixye re laj Wilford Woodruff, li Awa’b’ej re li Iglees, naq eb’ li winq ink’a’ chik te’sumlaaq rik’in numenaq jun li ixaqilb’ej. Laj jolominel sa’ li Iglees ke’xwotz li taqlahom a’an rik’ineb’ laj santil paab’anel. A’an lix taqlahom li Qaawa’ chalen anajwan—jun li winq tento taasumlaaq rik’in jun ajwi’ li ixaqilb’ej.

Awa’b’ejil Yehom 1; Santos, 2:598–601, 607–609