“Elk aran Nauvoo ut xik toj sa’ rokeb’aal li saq’e,” Eb’ li Seraq’ sa’ li Tzol’leb’ ut Sumwank (2024)
“Elk aran Nauvoo ut xik toj sa’ rokeb’aal li saq’e,” Eb’ li Seraq’ sa’ li Tzol’leb’ ut Sumwank
Junio re 1844–julio re 1847
Elk aran Nauvoo ut xik toj sa’ rokeb’aal li saq’e
Laj santil paab’anel neke’yeechi’in chiru li Qaawa’ ut neke’xtz’aqob’resi ru a’an
Laj Jose Smith ak kamenaq chik. Anajwan laj Brigham Young ut lix komoneb’ chik li apostol neke’xb’eresi li Iglees. Laj Brigham naxnaw naq eb’ laj santil paab’anel moko kolb’ileb’ ta chik rix aran Nauvoo. Tento te’elq aran. A’b’anan rub’elaj a’an, li Qaawa’ kiraj naq te’xchoy xkab’lankil li santil ochoch. Kiraj naq te’ok sa’ sumwank rik’in a’an ut te’tz’ape’q sa’ junajil jo’ junkab’al.
Santos, 1:571, 579–580
Chirix wiib’ oxib’ po, kiru li santil ochoch re naq eb’ li kristiaan te’ok sa’ sumwank aran. K’iila mil laj santil paab’anel ke’wulak sa’ li santil ochoch. Laj Brigham kikana sa’ li santil ochoch toj najt q’ojyin re xtenq’ankileb’ chi ok sa’ sumwank rik’in li Qaawa’. Toj reetal naq laj Brigham kixye reheb’ chixjunil naq tento te’xik aran Nauvoo.
Santos, 1:582
Naq laj Brigham ki’aj eq’la wulajaq chik, naab’aleb’ laj santil paab’anel yookeb’ chi oyb’enink sa’ li santil ochoch. Laj Brigham kixye reheb’ naq moko us ta choq’ reheb’ kanaak aran Nauvoo. Tento te’xsik’ chaq junaq xna’ajeb’ aran sa’ rokeb’aal li saq’e. Kixyeechi’i reheb’ naq te’ruuq chixkab’lankil jun chik li ak’ santil ochoch naq te’wulaq aran.
Santos, 1:582–583; 2:13–14
A’b’an laj santil paab’anel ink’a’ ke’el aran. Ke’raj ok sa’ sumwank rik’in li Qaawa’ rub’elaj lix xikikeb’ sa’ junaq chik ak’ na’ajej.
Santos, 1:583
Laj Brigham kirileb’ li xnaq’ ru ut kixjal xk’a’uxl. Kixnumsi li kutan a’an ut li kutan wulajaq chik chixtenq’ankileb’ laj santil paab’anel chi ok sa’ sumwank sa’ li santil ochoch.
Santos, 1:583
Chirix naq laj santil paab’anel ke’ok sa’ sumwank rik’in li Qaawa’, kiwulak xhoonalil li elk aran Nauvoo. Laj Brigham kixnaw naq li Qaawa’ kixkawresi jun na’ajej choq’ reheb’. Kiril a’an sa’ jun k’utb’esinb’il matk’. Ke’xtikib’ lix b’eenikeb’. Ke ru li kutan ut sulul ru li b’e. Ke’yajer li kristiaan. Yookeb’ chi kanaak chi maak’a’eb’ xtzakemq.
Santos, 2:16–18, 20–21
Toj nim roq li b’e tento te’xb’eeni laj santil paab’anel. Laj Brigham kixpatz’ rib’ chan ta wi’ ru naq te’xb’aanu li b’eek a’an li nim ut ch’a’aj. Kitijok chiru li Dios re xpatz’b’al xtenq’ankil.
Santos, 2:46
Li Qaawa’ kixk’e jun k’utb’esinb’il na’leb’ re laj Brigham. Kixk’ut chiru laj Brigham chan ru tixb’eresiheb’ laj santil paab’anel. Kixye naq tento te’xtenq’a rib’ chirilb’aleb’ li neb’a’.
Li Qaawa’ kixye reheb’ laj santil paab’anel naq tento te’xjultika li sumwank ke’ok wi rik’in a’an. Wi te’xb’aanu a’an, te’osob’tesiiq xb’aan a’an ut te’tenq’aaq sa’ lix b’eenikeb’.
Tzol’leb’ ut Sumwank 136:4, 11, 42; Santos, 2:47
Li b’eek toj tz’aqal kaw. Junjunqeb’ li kristiaan ke’kam. A’b’anan, sa’ xk’ab’a’eb’ li sumwank sa’ li santil ochoch, laj santil paab’anel neke’xnaw naq te’rileb’ wi’chik li komon sa’ lix junkab’aleb’.
Wiib’ oxib’ po chik chirix a’an, li xb’eenileb’ aj santil paab’anel ke’wulak sa’ li ru taq’a Lago Salado sa’ 1847. Naq laj Brigham Young kiril li ru taq’a, kixye, “A’an a’in tz’aqal li na’ajej.” A’an li na’ajej kiril sa’ jun li k’utb’esinb’il matk’. Aran te’ruuq chi wank sa’ xyaalal. Aran te’ruuq chixloq’oninkil li Qaawa’ ut chixb’aanunkil lix k’anjel rik’in tiikilal.
Santos, 2:17, 64–67
Rik’in xnumikeb’ li chihab’, naab’aleb’ chik laj santil paab’anel ke’wulak. Ke’xkab’laheb’ naab’aleb’ chik li santil ochoch, b’ar wi’ eb’ li kristiaan naru neke’ok sa’ sumwank rik’in li Qaawa’. Ke’xtaqlaheb’ misioneer sa’ chixjunil li ruchich’och’ re xk’utb’al lix evangelio li Jesukristo. Lix Iglees li Kolonel toj yoo chi k’iik ut chirosob’tesinkileb’ li ralal xk’ajol li qaChoxahil Yuwa’ yalaq ta b’ar.