Eb’ li seraq’ sa’eb’ li loq’laj hu
Xkab’lankil li tenamit Nauvoo

“Xkab’lankil li tenamit Nauvoo,” Eb’ li Seraq’ sa’ li Tzol’leb’ ut Sumwank (2024)

“Xkab’lankil li tenamit Nauvoo,” Eb’ li Seraq’ sa’ li Tzol’leb’ ut Sumwank

1840–1842

Xkab’lankil li tenamit Nauvoo

Lix k’uub’anb’il na’leb’ li Qaawa’ choq’ re jun chaq’al ru tenamit

Eb’ laj santil paab’anel neke’wan sa’ kok’ muheb’aal nach’ rik’in li nima’ Misisipi.

Li Qaawa’ kixye reheb’ laj santil paab’aanel naq te’xch’utub’ rib’ sa’ jun chik ak’ na’ajej. Li na’ajej a’an nach’ rik’in li nimla nima’ Misisipi xk’ab’a’. T’aqt’aq ru li ch’och’ ut nujenaq chi sulul. Junjunqeb’ li komon ke’xk’oxla naq moko chaab’il ta li na’ajej a’an re xtikib’ankil junaq tenamit. A’b’an li profeet aj Jose Smith naxnaw naq rik’in xtenq’ li Qaawa’, naru nakana chi xchaq’al ru.

Tzol’leb’ ut Sumwank 124:25; Santos, 1:417

Laj santil paab’anel neke’xk’ojob’ Nauvoo.

Laj santil paab’anel ke’xtikib’ k’anjelak chi kaw re xkawresinkil li na’ajej a’an choq’ re li wank. Li profeet aj Jose Nauvoo kixk’ab’a’i li tenamit, li naraj naxye “jun xchaq’al ru na’ajej.”

Santos, 1:417

Laj Jose Smith ut xkomoneb’ chik li kristiaan neke’xk’ab’la jun ochoch.

Li Qaawa’ kixye reheb’ laj santil paab’anel naq te’xyiib’ jun ochoch aran Nauvoo b’ar wi’ te’ruuq chi hilank li neke’nume’ aran. Kiraj naq li tenamit Nauvoo a’anaq raj junaq na’ajej b’ar wi’ chixjunileb’ k’ulub’anb’ilaqeb’.

Tzol’leb’ ut Sumwank 124:22–24, 60; Santos, 1:426

Laj Jose kixk’ut xna’aj li santil ochoch taayiib’amanq.

Li Qaawa’ kixye re li profeet aj Jose naq nim lix na’leb’ choq’ re li tenamit Nauvoo. Kiraj naq eb’ laj santil paab’anel te’xch’utub’ rib’ arin re naq te’xkab’la jun santil ochoch. Kixpatz’ reheb’ naq te’k’anjelaq chi kaw jo’ naru chiruheb’ re xkab’lankil li rochoch a’an. Laj santil paab’anel ke’ok chi k’anjelak sa’ junpaat.

Tzol’leb’ ut Sumwank 124:25–28, 44, 55; Santos, 1:420–421, 425–427

Laj Jose nak’utuk chirix li santil ochoch.

Li Qaawa’ kiraj naq laj santil paab’anel te’xkab’la li santil ochoch xb’aan naq ninq li osob’tesihom kiraj xk’eeb’al reheb’. Sa’ li santil ochoch, neke’ok sa’ sumwank, sa’ yeechi’ink, rik’in li Qaawa’. Neke’tzolok ajwi’ chirix lix k’uub’anb’il na’leb’ li qaChoxahil Yuwa’ re sahil ch’oolejil choq’ reheb’ chixjunil li ralal xk’ajol.

Tzol’leb’ ut Sumwank 124:29–41; Santos, 1:453–455

Li santil ochoch chi kab’lanb’il.

Laj santil paab’anel ke’k’anjelak chi kaw chixkab’lankil li santil ochoch, jo’ kixtaqla li Qaawa’. Naab’al li hoonal kixk’am, a’b’an saheb’ xch’ool chirix li kutan naq chixjunileb’ te’ruuq chi tzolok chirixeb’ li yeechi’ihom naru naxk’e li Qaawa’ reheb’ sa’ lix santil ochoch.

Santos, 1:453–455