Laj Hiram Page ut li k’utb’esinb’il na’leb’

Laj Hiram Page a’an chaq ramiiw laj Jose Smith ut laj Oliver Cowdery. A’an ajwi’ jun reheb’ li waqxaqib’ chi aj yehol nawom chirix li perel ch’iich’ oor. Rik’in laj Hiram kiwan jun li pek ut naxk’oxla naq li Dios yoo chiroksinkil a’an re k’ehok esil re, malaj k’utb’esinb’il na’leb’, choq’ re li Iglees. Laj Oliver ut xkomoneb’ chik laj santil paab’anel ke’xpaab’ naq lix k’utb’esinb’il na’leb’ laj Hiram neke’chal chaq rik’in li Dios.

Tzol’leb’ ut Sumwank 28, xjolomil li tasal; Santos, 1:97

Lix k’utb’esinb’il na’leb’ laj Hiram chanchan chik raatinul li loq’laj hu naq nak’utun. A’b’an jalan chiru li k’a’ru naxk’ut li Santil Hu. Jalan ajwi’ chiru li k’a’ru kixye li Qaawa’ re li profeet aj Jose. Laj Jose ink’a’ kixnaw k’a’ raj ru tixb’aanu.

Santos, 1:97

Laj Jose kikana chi aj-o chiru xk’ihal li q’ojyin re xpatz’b’al xtenq’ chiru li Dios. Kixk’oxla naq maare tixb’aanu li k’a’ru ink’a’ us ut tixrahob’tesi xch’ooleb’ li ramiiw.

Santos, 1:97

Laj Jose kiraj naq eb’ li kristiaan te’xsik’ k’utb’esinb’il na’leb’ choq’ re lix yu’ameb’. A’b’an moko ch’olch’ooq ta raj ru wi chixjunileb’ neke’xyal xsik’b’al k’utb’esinb’il na’leb’ choq’ re li Iglees.

Santos, 1:97

Sa’ xraqik, li Qaawa’ kixk’e re laj Jose jun k’utb’esinb’il na’leb’ re naq tixwotz rik’in laj Oliver. Li Qaawa’ kixye naq ka’ajwi’ li profeet naru nak’uluk k’utb’esinb’il na’leb’ ut taqlahom choq’ re chixjunil li Iglees. Kixye naq laj Oliver tento tixk’ut a’an chiru laj Hiram.

Tzolʼlebʼ ut Sumwank 28:2, 6–13

Li Qaawa’ kiraj naq laj Hiram tixtaw ru naq naru naxk’ul k’utb’esinb’il na’leb’ choq’ re lix yu’am. A’b’an li k’utb’esinb’il na’leb’ choq’ re li Iglees taachalq rik’in lix profeet li Qaawa’. Laj Hiram kirab’i li raatin laj Oliver ut kixjal xk’a’uxl. Eb’ laj santil paab’anel neke’xtaw chik ru chi us chan ru naq li Qaawa’ naxb’eresi lix Iglees.

Santos, 1:98