Lix kab’lankil li santil ochoch re Kirtland

“Lix kab’lankil li santil ochoch re Kirtland,” Eb’ li Seraq’ sa’ li Tzol’leb’ ut Sumwank (2024)

“Lix kab’lankil li santil ochoch re Kirtland,” Eb’ li Seraq’ sa’ li Tzol’leb’ ut Sumwank

Diciembre re 1832–marzo re 1836

Lix kab’lankil li santil ochoch re Kirtland

Li rochoch li Qaawa’

Laj Jose ut li xEmma Smith ut li xPhebe ut laj Sidney Rigdon neke’ril li na’ajej taakab’lamanq wi’ li santil ochoch re Kirtland.

Li Qaawa’ kixye re laj Jose Smith naq ak xwulak hoonal naq eb’ laj santil paab’anel te’xkab’la jun ochoch nim xloq’al aran Kirtland. A’anaq jun li santil ochoch, b’ar wi’ li Qaawa’ taarula’aniheb’ lix tenamit ut taa’ok sa’ aatin rik’ineb’. Tixk’e jun xnimal ru maatan reheb’ sa’ lix santil ochoch. Kixye naq a’anaq jun li tiqib’aak re wankilal.

Tzol’leb’ ut Sumwank 88:119; 95:8; Santos, 1:205

Laj Hyrum Smith naxik re tenq’ank chixkab’lankil li santil ochoch.

Eb’ laj santil paab’anel ink’a’ ke’xtikib’ xkab’lankil li santil ochoch sa’ junpaat. Chirix xnumik wiib’ oxib’ li po, li Qaawa’ kixjultika reheb’ naq q’axal aajel ru li santil ochoch. Laj Hyrum Smith kixseeb’a rib’ chi xik toj sa’ rochocheb’ xna’ xyuwa’ re xxokb’aleb’ chaq li k’anjeleb’aal. Naq lix na’ kixpatz’ re b’ar taaxik, a’an kixye naq naraj naq a’an li xb’een li taa’ok chixkab’lankil li rochoch li Qaawa’.

Tzol’leb’ ut Sumwank 95:1–8

Laj Sidney Rigdon naril naq yoo chi kab’lamank li santil ochoch.

Eb’ laj santil paab’anel aran Kirtland ke’ok chixkab’lankil li santil ochoch. Terto xtz’aq a’an ut naab’al li k’anjel kiraj. Eb’ li komon sa’ li Iglees jo’ laj Sidney Rigdon ke’xq’axtesi naab’al li tumin re xkab’lankil li santil ochoch. Jwal ke’raj xtaaqenkil lix taqlahom li Qaawa’ ut xk’ulb’aleb’ li rosob’tesihom sa’ li rochoch.

Santos, 1:209–211

Laj Sidney natijok re naq tenq’anb’ilaq rik’in lix kab’lankil li santil ochoch.

Naq eb’ laj santil paab’anel yookeb’ chixkab’lankil li santil ochoch, yoo chi oso’k xtumineb’. Ke’ok xk’a’uxl laj Sidney ut xkomoneb’ chik laj jolominel sa’ li Iglees. Laj Sidney kixtz’aama xtenq’ankil chiru li Dios.

Santos, 1:210–211

Li xCaroline Tippets nawulak re tenq’ank.

Jun li komon sa’ li Iglees, li xCaroline Tippets xk’ab’a’, ut lix junkab’al ak ke’xch’utub’ naab’al li tumin. Li xCaroline kixkanab’ naq li Iglees tixto’ni li tumin re xkab’lankil li santil ochoch.

Santos, 1:211–213

Eb’ li kok’al neke’tenq’an chixxokb’al li jorb’il lem.

Naab’aleb’ laj santil paab’anel yookeb’ chi k’anjelak chi kaw re xkab’lankil li santil ochoch. Ke’wan li ke’b’eresin b’eleeb’al nujenaqeb’ rik’in pek toj sa’ li santil ochoch. Ke’wan chik li ke’kawresin t’ikr ut tzakemaq choq’ reheb’ laj k’anjel. Eb’ li kok’al ke’xxok li jorb’il lem re naq taapuk’iiq ut taak’ehe’q chiru xtz’akil li santil ochoch re naq taalemtz’unq sa’ xsaqenkil li saq’e.

Santos, 1:210, 219, 221

Rik’in xnumik li hoonal kiyaalo’ li santil ochoch! Eb’ laj santil paab’anel ke’raj ok sa’ li rochoch li Qaawa’ re xk’ulb’aleb’ li osob’tesink li kixyeechi’i chaq reheb’.

Santos, 1:221