« ស៊ូសា យ៉ង់ ហ្គេត និង យ៉ូសែប អេហ្វ ស៊្មីធ » ដំណើររឿងព្រះគម្ពីរគោលលទ្ធិ និង សេចក្ដីសញ្ញា ( ឆ្នាំ២០២៤ )
« ស៊ូសា យ៉ង់ ហ្គេត និង យ៉ូសែប អេហ្វ ស៊្មីធ » ដំណើររឿងព្រះគម្ពីរគោលលទ្ធិ និង សេចក្ដីសញ្ញា
ឆ្នាំ១៩០២–ឆ្នាំ១៩១៨
ស៊ូសា យ៉ង់ ហ្គេត និង យ៉ូសែប អេហ្វ ស៊្មីធ
វិវរណៈអំពីពិភពវិញ្ញាណ
ស៊ូសា យ៉ង់ ហ្គេត គឺជាកូនស្រីរបស់ ព្រិកហាំ យ៉ង់ ។ នាងកើតនៅរដ្ឋយូថាហ៍ ហើយធំឡើងនៅទីនោះ ។ នាងចូលចិត្តសរសេរ ហើយនាងចូលចិត្តបម្រើនៅក្នុងសាសនាចក្ររបស់ព្រះអម្ចាស់ ។
ពួកបរិសុទ្ធ, ៣:៩–១០, ៦៤
នៅពេលដែល ស៊ូសា ធំពេញវ័យ នាងបានធ្លាក់ខ្លួនឈឺធ្ងន់ ។ នាងបានសុំការប្រសិទ្ធពរបព្វជិតភាព ។ នៅក្នុងការប្រសិទ្ធពរនោះ ព្រះអម្ចាស់បានប្រាប់ ស៊ូសា ថាទ្រង់ចង់ឲ្យនាងធ្វើកិច្ចការព្រះវិហារបរិសុទ្ធ ។
ពួកបរិសុទ្ធ, ៣:១៩៣–១៩៤
បន្ទាប់ពីការប្រសិទ្ធពរ ស៊ូសា បានប្រសើរឡើង ។ នាងបានចំណាយពេលរៀនអំពីពង្សប្រវត្តិគ្រួសាររបស់នាង ។ នៅពេលដែលនាងបានរកឃើញសមាជិកគ្រួសារដែលបានស្លាប់ដោយមិនបានទទួលពិធីបុណ្យជ្រមុជទឹក នាងបានទៅព្រះវិហារបរិសុទ្ធដើម្បីទទួលបុណ្យជ្រមុជទឹកសម្រាប់ពួកគេ ។ នាងចូលចិត្តប្រាប់មនុស្សអំពីកិច្ចការពង្សប្រវត្តិ ។ គួរឲ្យសោកស្តាយ មនុស្សជាច្រើនមិនបានចាប់អារម្មណ៍ទេ ។
ពួកបរិសុទ្ធ, ៣:១៩៤–១៩៥, ២០៦
ថ្ងៃមួយ ស៊ូសា បានទៅលេងមិត្តរបស់នាង យ៉ូសែប អេហ្វ ស្ម៊ីធ ដែលជាប្រធានសាសនាចក្រ ។ ប្រធាន ស្ម៊ីធ បានឈឺអស់រយៈពេលជាច្រើនសប្តាហ៍ ។ ស៊ូសា ដឹងថាលោកក៏មានការសោកស្តាយខ្លាំងដោយសារកូនប្រុសរបស់លោកបានស្លាប់ ។ លោកសោកស្តាយអំពីរឿងផ្សេងទៀតដែលកើតឡើងនៅក្នុងពិភពលោកនេះផងដែរ ដូចជាសង្គ្រាម និងជំងឺទាំងឡាយ ។
ពួកបរិសុទ្ធ, 3:១៩៧–១៩៩, ២០៥–២០៦
ប៉ុន្តែនៅពេលដែល ស៊ូសា អង្គុយជាមួយប្រធាន ស្ម៊ីធ លោករំភើបណាស់ក្នុងការនិយាយជាមួយនាង ។ លោកបានប្រាប់ ស៊ូសា ថាព្រះបានប្រទានឲ្យលោកនូវការនិមិត្តដ៏ពិសេសមួយ ។ វាគឺជាការណ៍ទាំងអស់អំពីពិភពវិញ្ញាណ ជាកន្លែងដែលមនុស្សទៅបន្ទាប់ពីពួកគេស្លាប់ ។ ការនិមិត្តរបស់លោកត្រូវបានសរសេរទុកនៅលើក្រដាស ។ ប្រធាន ស្ម៊ីធ បានប្រគល់វាឲ្យទៅ ស៊ូសា ហើយសុំឲ្យនាងអានវា ។
ពួកបរិសុទ្ធ, ៣:២០៦–២០៧
ស៊ូសា បានអានក្រដាសនោះ ។ ក្រដាសនោះបានអានថា ព្រះយេស៊ូវគ្រីស្ទបានយាងទៅធ្វើទស្សនកិច្ចនៅពិភពវិញ្ញាណ ។ ទ្រង់បានបញ្ជូនលោកអាដាម អេវ៉ា និងបុរស និងស្ត្រីស្មោះត្រង់ផ្សេងទៀត ដើម្បីបង្រៀនវិញ្ញាណដែលមិនបានទទួលដំណឹងល្អខណៈពេលដែលពួកគេនៅរស់ ។ ពួកគេបានជួយវិញ្ញាណទាំងនេះរៀបចំខ្លួន ដើម្បីមនុស្សអាចត្រូវបានធ្វើបុណ្យជ្រមុជទឹក សម្រាប់ពួកគេនៅក្នុងព្រះវិហារបរិសុទ្ធ ។
គោលលទ្ធិ និងសេចក្តីសញ្ញា ១៣៨:១១–១៩, ២៩–៤៨, ពួកបរិសុទ្ធ, ៣:២០៦–២០៧
ស៊ូសា មានការភ្ញាក់ផ្អើលយ៉ាងខ្លាំងនៅពេលនាងអានការនិមិត្តរបស់ប្រធាន ស្ម៊ីធ ។ ប្រធាន ស្ម៊ីធ ញញឹមដាក់នាង ។ លោកបានមានប្រសាសន៍ថា « ស៊ូសា ! អ្នកកំពុងធ្វើកិច្ចការដ៏អស្ចារ្យ » ។ លោកបានប្រាប់នាងថា លោកស្រឡាញ់នាងចំពោះសេចក្តីជំនឿរបស់នាងទៅលើព្រះអម្ចាស់ ។
ពួកបរិសុទ្ធ, ៣:២០៦
ស៊ូសា បានសរសេរអំពីវិវរណៈនេះនៅក្នុងសៀវភៅកំណត់ហេតុរបស់នាង ។ នាងបាននិយាយថា « អូ! វាគឺជាការលួងលោមណាស់ដល់ខ្ញុំ ! » ។ នាងអន្ទះសាចង់ប្រាប់មិត្តភក្តិរបស់នាង និងសមាជិកផ្សេងទៀតនៃសាសនាចក្រអំពីការនិមិត្តនេះ ។ នាងដឹងថាការនិមិត្តរបស់ប្រធាន ស្ម៊ីធ នឹងជួយពួកបរិសុទ្ធឲ្យសប្បាយរីករាយក្នុងការធ្វើកិច្ចការព្រះវិហារបរិសុទ្ធ សម្រាប់មនុស្សនៅក្នុងពិភពវិញ្ញាណ ។
ពួកបរិសុទ្ធ, ៣:២០៧