« ពួកសាក្សីឃើញផ្ទាំងទាំងឡាយនៃព្រះគម្ពីរមរមន » ដំណើររឿងព្រះគម្ពីរគោលលទ្ធិ និងសេចក្ដីសញ្ញា ( ឆ្នាំ២០២៤ )
« ពួកសាក្សីឃើញផ្ទាំងទាំងឡាយនៃព្រះគម្ពីរមរមន » ដំណើររឿងព្រះគម្ពីរគោលលទ្ធិ និងសេចក្ដីសញ្ញា
ខែមីនា–ខែកញ្ញា ឆ្នាំ១៨២៩
ពួកសាក្សីឃើញផ្ទាំងទាំងឡាយនៃព្រះគម្ពីរមរមន
ការថ្លែងទីបន្ទាល់ទៅកាន់ពិភពលោក
យ៉ូសែប អិមម៉ា និងអូលីវើរបានបន្តបកប្រែផ្ទាំងមាសនៅផ្ទះគ្រួសារស្ម៊ីធ ក្នុងរដ្ឋផែនសិលវេញ៉ា ។ ប៉ុន្តែប្រជាជននៅក្នុងទីក្រុងរបស់ពួកលោកចង់បញ្ឈប់ពួកលោក ។ អូលីវើរមានមិត្តភក្តិម្នាក់ឈ្មោះ ដាវីឌ វិតមើរ ដែលរស់នៅទីក្រុងញូវយ៉ក ។ អូលីវើរបានសួរដាវីឌ ថាតើពួកគេអាចផ្លាស់ទៅនៅជាមួយនឹងគ្រួសារវិតមើរ ដើម្បីបញ្ចប់ការបកប្រែនេះបានឬអត់ ។
ពួកបរិសុទ្ធ ១:៦៨
ដាវីឌ និងក្រុមគ្រួសាររបស់គាត់បានយល់ស្រប ។ ពួកគាត់បានស្វាគមន៍យ៉ូសែប អិមម៉ា និងអូលីវើរចូលទៅក្នុងផ្ទះរបស់ពួកគាត់ ។ ឥឡូវនេះ ពួកគាត់អាចធ្វើការបកប្រែដោយសេចក្តីសុខសាន្តហើយ ។ មានមនុស្សជាច្រើនរស់នៅក្នុងផ្ទះវិតមើរ ។ នោះមានន័យថាមានការងារជាច្រើនដែលត្រូវធ្វើ ជាពិសេសសម្រាប់ម្ដាយរបស់ដាវីឌ គឺម៉ារី ។
ពួកបរិសុទ្ធ ១:៦៨–៧០
ថ្ងៃមួយ ខណៈពេលដែលម៉ារីកំពុងធ្វើការ ទេវតាមរ៉ូណៃបានមកជួបគាត់ ។ ទ្រង់បានមានបន្ទូលថា ទ្រង់ដឹងថាការងារជាច្រើនដែលគាត់ធ្វើ ធ្វើឲ្យគាត់នឿយហត់ណាស់ ។ ទ្រង់ចង់ពង្រឹងសេចក្តីជំនឿរបស់គាត់ ។ ទ្រង់បានបើកថង់យាមមួយ ហើយទាញផ្ទាំងមាសចេញមក ។ ទ្រង់បានបើកទៅជាច្រើនទំព័រ ហើយបានបង្ហាញសំណេរទៅកាន់ម៉ារី ។ ទ្រង់បានសន្យាជាមួយម៉ារីថា គាត់នឹងបានពរ ។
ពួកបរិសុទ្ធ ១:៧០–៧១
មនុស្សមួយចំនួនមិនជឿថា ផ្ទាំងនោះមានពិតទេ ។ យ៉ូសែបបានគោរពតាមបញ្ជារបស់ព្រះអម្ចាស់មិនឲ្យបង្ហាញផ្ទាំងនោះដល់នរណាឡើយ ។ ព្រះអម្ចាស់បានមានព្រះបន្ទូលថា ទ្រង់នឹងអនុញ្ញាតឲ្យសាក្សីបីនាក់ទៀតមើលឃើញផ្ទាំងនោះ ។ ដាវីឌ វិតមើរ ម៉ាទិន ហារិស និងអូលីវើរ ខៅឌើរី សួរយ៉ូសែបថាតើពួកគាត់អាចធ្វើជាសាក្សីបានដែរឬទេ ។ ព្រះអម្ចាស់មានព្រះបន្ទូលថា ពួកគាត់អាចធ្វើជាសាក្សីបាន ។
គោលលទ្ធិ និងសេចក្តីសញ្ញា ៥:១១–១២; ១៧; ពួកបរិសុទ្ធ ១:៧៣
យ៉ូសែប ម៉ាទិន អូលីវើរ និងដាវីឌបានចូលទៅក្នុងព្រៃ ។ ពួកគាត់បានលុតជង្គង់ចុះ ហើយបានប្ដូរវេនគ្នាទូលសួរព្រះថាតើពួកគាត់អាចមើលផ្ទាំងដែរឬទេ ប៉ុន្តែគ្មានអ្វីកើតឡើងនោះទេ ។
ពួកបរិសុទ្ធ ១:៧៣
ម៉ាទិន ហារិស មានអារម្មណ៍ថា គាត់គឺជាហេតុផលដែលការអធិស្ឋានរបស់ពួកគាត់មិនទទួលបានចម្លើយ ។ ម៉ាទិនបានចាកចេញ ហើយអ្នកផ្សេងទៀតបានបន្តអធិស្ឋាន ។
ពួកបរិសុទ្ធ ១:៧៣
បន្ទាប់មក ទេវតាមួយអង្គបានបង្ហាញកាយក្នុងពន្លឺដ៏ភ្លឺមួយ ។ ទ្រង់បានបង្ហាញអូលីវើរ និងដាវីឌ នូវផ្ទាំងមាស និងសំណេរនៅលើផ្ទាំងទាំងនោះ ។ ពួកគាត់បានឮព្រះសូរសៀងរបស់ព្រះមានព្រះបន្ទូលថា យ៉ូសែប បានបកប្រែផ្ទាំងទាំងឡាយដោយនូវព្រះចេស្ដានៃព្រះ ហើយថាការបកប្រែគឺត្រឹមត្រូវ ។ ព្រះក៏មានព្រះបន្ទូលថា ពួកគាត់គួរប្រាប់មនុស្សគ្រប់គ្នានូវអ្វីដែលពួកគាត់បានឃើញ និងបានឮ ។
« The Testimony of Three Witnesses »; Saints ១:៧៣–៧៤
យ៉ូសែបបានទៅរកម៉ាទិន ។ គាត់នៅតែអធិស្ឋាននៅឡើយ ។ យ៉ូសែបបានអធិស្ឋានសម្រាប់គាត់ ។ បន្ទាប់មក ទេវតាបានបង្ហាញកាយ ហើយបានបង្ហាញផ្ទាំងដល់ម៉ាទិន ដូចដែលទ្រង់បានបង្ហាញដល់អូលីវើរ និងដាវីឌដែរ ។
Saints ១:៧៤
បន្ទាប់មក យ៉ូសែបបានទៅរកឪពុកម្តាយរបស់លោក ដែលកំពុងទៅជួបម៉ារី វិតមើរ ។ លោកបានប្រាប់ពួកគាត់ថា លោកសប្បាយចិត្តយ៉ាងណា ដែលអ្នកផ្សេងទៀតបានឃើញផ្ទាំងទាំងនោះ ។ ឥឡូវនេះ សាក្សីជាច្រើនអាចប្រាប់មនុស្សគ្រប់គ្នាថា យ៉ូសែបកំពុងនិយាយការពិត ។ ម៉ាទិនបានប្រាប់មនុស្សគ្រប់គ្នាថា លោកសប្បាយចិត្តប៉ុនណា ដែលព្រះបានអនុញ្ញាតឲ្យលោកធ្វើជាសាក្សីម្នាក់ក្នុងចំណោមសាក្សីទាំងឡាយ ។
Saints ១:៧៤–៧៥
ប៉ុន្មានថ្ងៃក្រោយមក ព្រះអម្ចាស់បានមានព្រះបន្ទូលប្រាប់យ៉ូសែបឲ្យបង្ហាញផ្ទាំងមាសដល់មនុស្សប្រាំបីនាក់ទៀត—ឪពុករបស់លោក បងប្អូនប្រុសពីរនាក់របស់លោក បងប្អូនប្រុសរបស់ដាវីឌ បួននាក់ និងបងថ្លៃប្រុសរបស់ដាវីឌ ។ ពួកគាត់បានកាន់ផ្ទាំងទាំងនោះ និងបើកទៅទំព័រជាច្រើន ។ ពួកគាត់បានដឹងថា ផ្ទាំងនោះគឺពិត ។
« The Testimony of Eight Witnesses »; Saints ១:៧៥
ការបកប្រែព្រះគម្ពីរមរមន ឥឡូវនេះត្រូវចប់សព្វគ្រប់ហើយ ។ យ៉ូសែបបានប្រគល់ផ្ទាំងមាសទៅទេវតាមរ៉ូណៃវិញ ។ ឥឡូវនេះ វាដល់ពេលដែលត្រូវបោះពុម្ពគម្ពីរនេះ ដើម្បីឲ្យមនុស្សគ្រប់គ្នាអាចអានគម្ពីរនេះ និងរៀនបន្ថែមទៀតអំពីព្រះយេស៊ូវគ្រីស្ទ ។
Saints, ១:៧៥–៧៦
វាត្រូវចំណាយប្រាក់ច្រើនដើម្បីបោះពុម្ពព្រះគម្ពីរមរមន ។ ម៉ាទិន ហារិសបានលះបង់កសិដ្ឋានរបស់គាត់ផ្នែកខ្លះ ដើម្បីបង់ថ្លៃលើការបោះពុម្ពនេះ ។ គាត់បានធ្វើដូច្នេះ ដោយសារគាត់ដឹងថាព្រះគម្ពីរមរមនគឺពិត ។ គ្រប់ច្បាប់ព្រះគម្ពីរនេះ មានទីបន្ទាល់របស់ម៉ាទិន និងសាក្សីផ្សេងទៀតសម្រាប់មនុស្សទាំងអស់អាន ។ សាក្សីទាំងនោះមិនដែលបដិសេធទីបន្ទាល់របស់ខ្លួនទេ ។