« ហនស៍ មីល្ល ( រោងម៉ាស៊ីនកិនស្រូវ ហនស៍ ) » ដំណើររឿងព្រះគម្ពីរគោលលទ្ធិ និងសេចក្ដីសញ្ញា ( ឆ្នាំ២០២៤ )
« ហនស៍ មីល្ល ( រោងម៉ាស៊ីនកិនស្រូវ ហនស៍ ) » ដំណើររឿងព្រះគម្ពីរគោលលទ្ធិ និងសេចក្ដីសញ្ញា
ខែតុលា ឆ្នាំ១៨៣៨–ខែកុម្ភៈ ឆ្នាំ១៨៣៩
ហនស៍ មីល្ល ( រោងម៉ាស៊ីនកិនស្រូវ ហនស៍ )
ការវាយប្រហារ និងអព្ភូតហេតុ
វីលឡាត ស្ម៊ីធ មានអាយុ ១១ ឆ្នាំ ។ គ្រួសាររបស់គាត់រស់នៅឯ ហនស៍ មីល្ល រដ្ឋមិសសួរី ជាមួយពួកបរិសុទ្ធផ្សេងទៀត ។ ពួកគេចង់ប្រមូលផ្តុំឆាប់ៗជាមួយពួកបរិសុទ្ធនៅទីក្រុងហ្វារវែស្ទ ។
គោលលទ្ធិ និងសេចក្តីសញ្ញា ១១៥:៧–៨, ពួកបរិសុទ្ធ, ១:៣៤៧–៣៤៨
ថ្ងៃមួយ វីលឡាត បាននៅជាមួយឪពុក និងបងប្អូនប្រុសរបស់គាត់ឈ្មោះ សាដៀស និង អាលម៉ា ។ ភ្លាមៗនោះ ពួកគេបានឮសំឡេងកាំភ្លើង និងសម្រែក ។ ហ្វូងមនុស្សបានមកវាយប្រហារលើពួកបរិសុទ្ធ ។
ពួកបរិសុទ្ធ, ១:៣៤៨–៣៤៩
មនុស្សគ្រប់គ្នារត់ដើម្បីស្វែងរកទីសុវត្ថិភាព ។ បុរស និងកុមារជាច្រើនបានលាក់ខ្លួននៅក្នុងហាងជាងដែក ។ ឪពុក និងបងប្អូនប្រុសរបស់ វីលឡាត បានចូលទៅក្នុងហាងជាងដែកផងដែរ ប៉ុន្តែ វីលឡាត បានត្រូវបំបែកចេញពីពួកគេ ។ គាត់បានលាក់ខ្លួននៅពីក្រោយគំនរឈើមួយ ។ គាត់បានឮសំឡេងកាំភ្លើងបាញ់នៅជុំវិញខ្លួនគាត់ ។
ពួកបរិសុទ្ធ, ១:៣៤៩, ៣៥៣
វីលឡាត បានរត់ពីកន្លែងមួយទៅកន្លែងមួយទៀតដើម្បីលាក់ខ្លួន ។ នៅទីបំផុតស្នូរកាំភ្លើងក៏បានឈប់ ។ អ្នកវាយប្រហារបានចាកចេញពី ហនស៍ មីល្ល ។
ពួកបរិសុទ្ធ, ១:៣៥៣
វីលឡាត បានទៅហាងជាងដែកដើម្បីស្វែងរកគ្រួសាររបស់គាត់ ។ ឪពុករបស់គាត់ និងសាដៀស ត្រូវបានគេសម្លាប់ ។ ប៉ុន្តែអាលម៉ា ដែលជាប្អូនប្រុសរបស់ វីលឡាត នៅមានជីវិត ។
ពួកបរិសុទ្ធ, ១:៣៥៣
អាលម៉ា ត្រូវបានបាញ់ចំត្រគាករបស់គាត់ ។ គាត់បានរងរបួសធ្ងន់ធ្ងរ ។ វីលឡាតបានលើកអាលម៉ាឡើង ហើយបានបីគាត់ទៅកាន់តង់គ្រួសាររបស់ពួកគេ ។
ពួកបរិសុទ្ធ, ១:៣៥៣–៣៥៤
ម្តាយរបស់វីលឡាត ឈ្មោះ អាមែនដា មិនដឹងពីរបៀបជួយត្រគាករបស់អាលម៉ាទេ ។ ប៉ុន្តែនាងបានដឹងថាព្រះដឹង ។ នាងបានអធិស្ឋាន ហើយនាងបានឮសំឡេងមួយប្រាប់នាងថាត្រូវធ្វើអ្វីយ៉ាងប្រាកដ ។
ពួកបរិសុទ្ធ, ១:៣៥៤
អាមែនដា បានលាងរបួសរបស់អាលម៉ាជាមួយផេះ ។ បន្ទាប់មក នាងបានកិនឫសឈើមួយចំនួន ហើយដាក់វានៅលើរបួសរបស់គាត់ ។ នាងរុំត្រគាករបស់គាត់ជាមួយក្រណាត់ ។ « ឥឡូវនេះ កូនគេងអ៊ីចឹងហើយ កុំរើទៅណា » នាងបាននិយាយថា « ព្រះអម្ចាស់នឹងប្រទានត្រគាកថ្មីឲ្យកូន » ។
ពួកបរិសុទ្ធ, ១:៣៥៤–៣៥៥
ក្រោយមក អភិបាលរដ្ឋមិសសួរីបានមានប្រសាសន៍ថា ពួកបរិសុទ្ធត្រូវចាកចេញពីរដ្ឋនេះ បើមិនដូច្នេះទេ ពួកគេនឹងត្រូវគេសម្លាប់ ។ ប៉ុន្តែត្រគាករបស់ អាលម៉ា នៅមិនទាន់ជានៅឡើយទេ ។ អាមែនដា បានអធិស្ឋាន ហើយបានទូលសូមជំនួយពីព្រះអម្ចាស់ ។ សំឡេងមួយបានប្រាប់នាងថា ព្រះយេស៊ូវនឹងមិនចាកចេញពីគ្រួសាររបស់នាងឡើយ ។ អាមែនដា មានអារម្មណ៍ថាគ្មានអ្វីអាចធ្វើឲ្យនាងឈឺចាប់បានទេ ។
គោលលទ្ធិ និងសេចក្ដីសញ្ញា ៨៨:៨៣, ពួកបរិសុទ្ធ, ១:៣៧២; ៣៧៨–៣៧៩
មិនយូរប៉ុន្មានក្រោយពីនាងបានអធិស្ឋាន អាមែនដា បានឮកូនៗរបស់នាងស្រែក ។ នាងបានរត់ទៅរកពួកគេ ហើយនៅពេលដែលនាងបានទៅដល់ នោះអាលម៉ាបានរត់ទៅរត់មក ។ គាត់បាននិយាយថា « ម៉ែ កូនជាហើយ កូនជាហើយ ! » ត្រគាករបស់គាត់បានជាសះស្បើយ ! វាគឺជាអព្ភូតហេតុមកពីព្រះអម្ចាស់ ។ អាមែនដា និងកូនៗរបស់នាងបានចាកចេញពីរដ្ឋមិសសួរី ដើម្បីស្វែងរកកន្លែងសុវត្ថិភាពជាមួយពួកបរិសុទ្ធដែលនៅសេសសល់ផ្សេងទៀត ។
ពួកបរិសុទ្ធ, ១:៣៧៩