« ម៉ារី និង ខារ៉ូលីន រ៉ូលីន » ដំណើររឿងព្រះគម្ពីរគោលលទ្ធិ និងសេចក្ដីសញ្ញា ( ឆ្នាំ២០២៤ )
« ម៉ារី និង ខារ៉ូលីន រ៉ូលីន » ដំណើររឿងព្រះគម្ពីរគោលលទ្ធិ និងសេចក្ដីសញ្ញា
ខែវិច្ឆិកា ឆ្នាំ១៨៣០–ខែកក្កដា ឆ្នាំ១៨៣១
ម៉ារី និង ខារ៉ូលីន រ៉ូលីន
សេចក្ដីស្រឡាញ់ដ៏ខ្លាំងក្លាចំពោះព្រះគម្ពីរ
ម៉ារី រ៉ូលីន មានអាយុ ១២ឆ្នាំ ពេលដែលពួកអ្នកផ្សព្វផ្សាយសាសនាបានទៅទីក្រុងខឺតឡង់ រដ្ឋអូហៃអូ ជាលើកដំបូង ។ នាងបានឮពួកគេនិយាយអំពីព្រះគម្ពីរមរមន ។ នៅគ្រានោះ មានព្រះគម្ពីរមរមនតែមួយក្បាលប៉ុណ្ណោះនៅខឺតឡង់ ហើយអ្នកដឹកនាំសាសនាចក្រឈ្មោះ អ៊ីសាក ម៉ូលី មានព្រះគម្ពីរនោះ ។
ម៉ារីបានទៅផ្ទះរបស់បងប្រុសម៉ូលី ហើយបានសុំមើលព្រះគម្ពីរ ។ បងប្រុសម៉ូលី បានឲ្យនាងកាន់ព្រះគម្ពីរនោះ ។ ម៉ារីបានសួរ បើសិននាងអាចយកព្រះគម្ពីរទៅផ្ទះ ។
បងប្រុសម៉ូលី មិនចង់ឲ្យព្រះគម្ពីររបស់គាត់ទៅម៉ារីនោះទេ ។ គាត់មិនទាន់បានអានព្រះគម្ពីរនេះបានច្រើននៅឡើយ ។ ម៉ារីបានអង្វរបងប្រុសម៉ូលី ដើម្បីឲ្យនាងបានខ្ចីព្រះគម្ពីរ ។
បងប្រុសម៉ូលី បានយល់ព្រម ។ គាត់បាននិយាយថា ម៉ារីអាចយកព្រះគម្ពីរទៅផ្ទះបាន ប្រសិនបើនាងយកវាមកវិញនៅព្រឹកថ្ងៃស្អែក ។ ម៉ារីបានចាត់ទុកព្រះគម្ពីរនេះដូចជាកំណប់ទ្រព្យមួយ ។ នាងស្ទើរតែមិនបានគេងពេញមួយយប់ដើម្បីនៅអានព្រះគម្ពីរនោះ ។
នៅពេលដែលម៉ារីបានឲ្យព្រះគម្ពីរទៅគាត់វិញ បងប្រុសម៉ូលី បានភ្ញាក់ផ្អើល ដោយសារនាងបានអានវាបានច្រើន ។ គាត់បាននិយាយថា « ក្មេងតូចអើយ » « ឯងយកព្រះគម្ពីរនេះទៅផ្ទះវិញ ហើយអានវាឲ្យចប់ចុះ ។ ខ្ញុំអាចរង់ចាំបាន » ។
ម៉ារីគឺជាមនុស្សដំបូងគេបង្អស់នៅខឺតឡង់ដែលបានអានព្រះគម្ពីរមរមនចប់ ។ មិនយូរប៉ុន្មានបន្ទាប់ពីនាងអានចប់ នាងបានជួបនឹងព្យាការី យ៉ូសែប ស្ម៊ីធ ។ នៅពេលដែលលោកបានដឹងថា ម៉ារីស្រឡាញ់ព្រះគម្ពីរមរមនខ្លាំង លោកបានមានប្រសាសន៍ថា នាងអាចយកព្រះគម្ពីររបស់បងប្រុសម៉ូលីបាន ។ លោកនឹងឲ្យបងប្រុសម៉ូលីមួយក្បាលទៀត ។
ក្រោយមកនៅឆ្នាំនោះ ម៉ារី និងគ្រួសាររបស់នាងបានផ្លាស់ទៅទីក្រុងអ៊ិនឌីប៉ែនដែនស៍ រដ្ឋមិសសួរី ។ នាងពិតជារំភើបក្នុងការឃើញថ្នាក់ដឹកនាំសាសនាចក្រចាប់ផ្ដើមរៀបរៀងព្រះគម្ពីរថ្មីមួយដែលហៅថា ព្រះគម្ពីរនៃបទបញ្ញត្ដិ ។ ព្រះគម្ពីរនេះមាននូវវិវរណៈជាច្រើនដែលព្រះយេស៊ូវគ្រីស្ទបានប្រទានដល់ យ៉ូសែប ស្ម៊ីធ ។
គោលលទ្ធិ និងសេចក្ដីសញ្ញា ៦៧; ៧០:១–៤; Saints ១:១៧៨
ប៉ុន្តែមនុស្សមួយចំនួននៅអ៊ិនឌីប៉ែនដែនស៍ មិនចូលចិត្តសាសនាចក្រទេ ។ ពួកគេចង់ឲ្យពួកបរិសុទ្ធចាកចេញ ។ ថ្ងៃមួយ ពួកមនុស្សក្រេវក្រោធមួយក្រុមបានសម្រុកចូលក្នុងអគារដែលកំពុងតែបោះពុម្ពព្រះគម្ពីរនៃបទបញ្ញត្តិនោះ ។ ពួកគេបានបោះម៉ាស៊ីនបោះពុម្ពចេញតាមបង្អួច និងគ្រវែងឯកសារនៃព្រះគម្ពីរនៃបទបញ្ញត្ដិចោលតាមផ្លូវ ។
Saints ១:១៧៧–១៧៨
ម៉ារី និងប្អូនស្រីរបស់នាង ខារ៉ូលីន កំពុងមើលនៅពីក្រោយរបង ។ ម៉ារីបានប្រាប់ខារ៉ូលីន ថានាងចង់យកឯកសារទាំងនោះទុកមុនពេលឯកសារទាំងនោះត្រូវគេបំផ្លាញចោល ។ ខារ៉ូលីនបានខ្លាចដល់ពួកមនុស្សក្រេវក្រោធមួយក្រុមនោះ ។ នាងបាននិយាយថា « ពួកគេនឹងសម្លាប់យើង » ។ ប៉ុន្ដែ ម៉ារី និងខារ៉ូលីនបានដឹងថា ឯកសារទាំងនោះមាននូវព្រះបន្ទូលរបស់ព្រះនៅលើនោះ ។
Saints ១:១៧៨
ពីរនាក់បងប្អូនរង់ចាំរហូតទាល់តែពួកបុរសទាំងនោះបែរមុខចេញ ។ បន្ទាប់មកពួកគេបានរត់ទៅតាមផ្លូវ ហើយប្រមូលឯកសារទាំងនោះបានច្រើនតាមដែលពួកគេអាចកាន់បាន ។ កាលពួកគេកំពុងប្រញាប់ប្រញាល់ នោះពួកមនុស្សអាក្រក់មួយចំនួនបានឃើញពួកគេ ហើយស្រែកឲ្យពួកគេឈប់ ។ ម៉ារី និងខារ៉ូលីន បានកាន់ឯកសារទាំងនោះជាប់ ហើយរត់យ៉ាងលឿនចូលទៅក្នុងចម្ការពោតនៅក្បែរនោះ ។
Saints ១:១៧៨–១៧៩
បុរសពីរនាក់បានដេញតាមបងប្អូនពួកគេនៅក្នុងចម្ការពោត ។ ដើមពោតខ្ពស់ៗខ្លាំង ម៉ារី និងខារ៉ូលីន មិនអាចមើលឃើញផ្លូវនោះទេ ។ ពួកគេបានផ្ដួលខ្លួនដេកទៅលើដី ហើយលាក់ឯកសារទាំងនោះនៅពីក្រោមខ្លួនរបស់ពួកគេ ។ ពួកគេបានស្ដាប់យ៉ាងស្ងៀមស្ងាត់ កាលបុរសពីរនាក់នោះដើររកពួកគេតាមដើមពោត ។
Saints ១:១៧៩
មិនយូរប៉ុន្មាន បុរសទាំងនោះបានឈប់រកពួកគេ ។ ម៉ារី និងខារ៉ូលីន មានសុវត្ថិភាព ។ ពួកគេបានរក្សាទុកឯកសារនៃវិវរណៈរបស់ព្រះអម្ចាស់សម្រាប់ព្រះគម្ពីរនៃបទបញ្ញត្ដិ ។ សព្វថ្ងៃនេះ វិវរណៈទាំងនោះមាននៅក្នុងព្រះគម្ពីរគោលលទ្ធិ និងសេចក្តីសញ្ញា ។
Saints ១:១៧៩