Palesiteni Timothy L. Farnes

ʻI he taʻu 14 ʻa Palesiteni Tīmote L. Fānesí, naʻe kamata ke fakafepakiʻi ʻe hano kaungāmeʻa ʻo ha tui fakalotu kehe ʻene tui fakalotú. Ko e fuofua taimi ia ʻi he moʻui ʻa Tīmoté ʻi heʻene kei siʻí ke ne fakamoʻoniʻi ko Siosefa Sāmitá ko ha palōfita ʻo e ʻOtuá pea ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku moʻoni.

Naʻá ne manatuʻi, “Naʻe fakafonu ʻe he Laumālié ʻa e lokí. Naʻe ʻikai puli ia ki ha taha. Naʻa mau ongoʻi kotoa ia pea mau liliu kotoa ai.”

Naʻe pehē ʻe Palesiteni Fānesi, ʻokú ne loto ke ʻiloʻi ʻe he toʻu tupu ʻa e Siasí ʻoku nau kau ki he fāmili ʻo e ʻOtuá.

Naʻá ne pehē, “Ko e fānau kinautolu ʻo e ʻOtuá pea ko e fānau kinautolu ʻo e fuakavá, pea te nau lava ʻo hoko ko ha kau ākonga ʻo Sīsū Kalaisi kapau te nau tali Ia—tali ʻa e meʻafoaki ʻoku maʻanautolu koeʻuhí ko ʻEne Fakaleleí.”

Naʻe fāʻeleʻi ʻa Tīmote Loueli Fānesi ʻi he ʻaho 29 ʻo Sune, 1969, ʻi Palatimoa, Melileni, kia Keuli Uiliami Fānesi mo Mele ʻĒleni Fānesi. ʻI heʻene kei siʻí, naʻe hiki hono fāmilí ki ʻIutā, ʻo ne tupu hake ai. Ko e lahi taha ia ʻo ha fānau ʻe toko fitu.

Naʻe ngāue fakafaifekau ʻa Palesiteni Fānesi ʻi he Misiona Brazil Porto Alegre. Naʻá ne ako ʻekonōmika ʻi he ʻUnivēsiti Pilikihami ʻIongí pea kamataʻi kimui ha ngaahi kautaha lahi, kau ai ʻa e MedSource Direct, Aspire, mo e tokoni ʻofa fakaetangata ʻikai fakatupu paʻanga ko e World Joy.

Naʻá ne mali mo Linisī Ane Fānesi ʻi he Temipale Salt Lake ʻi he ʻaho 27 ʻo ʻAokosi, 1992. ʻOkú na maʻu ha fānau ʻe toko nima mo e makapuna ʻe toko ono, pea ʻokú na nofo ʻi Mahu, ʻIutā.

Naʻe hoko ʻa Palesiteni mo Sisitā Fānesi ko ha ongo taki fakamisiona ʻi he Misiona Brazil São Paulo North mei he 2014 ki he 2017. ʻOku kau ʻi he ngaahi uiuiʻi kimuʻa ʻo Palesiteni Fānesí ʻa ʻene hoko ko ha Fitungofulu Fakaʻēlia ʻi he ʻĒlia ʻIutaá, palesiteni fakasiteiki, alēleaʻanga māʻolunga, pīsope, mo e pīsope ʻo e kau taautaha lalahi kei talavoú.