ʻEletā B. Corey Cuvelier

Ko e taimi naʻe fanongonongo ai ʻe ʻEletā B. Koli Kaveliē ʻe mavahe mei heʻene ngāué ke hoko ko ha palesiteni fakamisiona maʻá e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻe ʻeke ange heʻene kaungā ngāué, “ʻOkú ke vale?”

Naʻe pehē ʻe ʻEletā Kaveliē naʻe faingataʻa ke mahino ki hono kaungā ngāué ʻa e ʻuhinga ʻo ʻene mavahe mei heʻene ngāue maʻuʻanga moʻui ʻoku lakalakaimonū ʻi he taʻu ʻe tolu. Ka ko ʻenau ngaahi fehuʻí ko ha ngaahi faingamālie ia, naʻá ne pehē, “ke vahevahe ʻa e ʻuhinga ʻoku mau fakahoko ai ʻa e meʻa ʻoku mau fakahokó pea mo e ʻuhinga ʻoku mau tui ai ki he meʻa ʻoku mau tui ki aí pea mo ia ʻoku mau tui ki aí. ʻA ia ko Sīsū Kalaisi.”

Naʻe fāʻeleʻi ʻa Palaieni Koli Kaveliē ʻi he ʻaho 12 ʻo Sānuali, 1969 ʻi Losi ʻEniselesi, Kalefōnia, ʻa ia naʻe pusiakiʻi mo ohi hake ai iá. Ko ʻene tamaí, Hānisi Soakimi Kaveliē, naʻá ne hoko ko ha ʻōfisa polisi. Naʻe tauhi ʻapi ʻa ʻene faʻeé, Sōana Lesilī Sānekí Kaveliē. Ko e lahi taha ia ʻo ha fānau ʻe toko fā.

ʻI he hoko ʻa ʻEletā Kaveliē ko ha faifekau kei talavoú, naʻá ne ngāue ʻi he Misiona Brazil São Paulo South. Naʻá ne ʻosi mei he ʻUnivēsiti Pilikihami ʻIongí ʻi he 1994 mo haʻane mataʻitohi ʻi he fetuʻutaki mo e kakaí. Naʻá ne kau ki he Shell Oil Company (Kautaha Lolo Shell) ʻi he 1996, ʻa ia naʻá ne ngāue ai ʻi ha ngaahi ʻiuniti pisinisi kehekehe ʻi he ʻAmelika Noaté.

Naʻe mali ʻa ʻEletā Kaveliē mo Uenitī Sū Manivalingi ʻi he ʻaho 18 ʻo Siulai, 1992, ʻi he Temipale Los Angeles California. Ko ha ongomātuʻa kinaua ki ha fānau tangata ʻe toko fā. Naʻe hoko ʻa e ongomātuʻa Kavelieé ko ha ongo taki fakamisiona ʻi he Misiona Brazil Curitiba South mei he 2016 ki he 2019 pea naʻá na nofo ʻi Keiti, Tekisisi ʻi he taimi ʻo hono uiuiʻí.

Kimuʻá, naʻe hoko ʻa ʻEletā Kaveliē ko ha Fitungofulu Fakaʻēlia ʻi he ʻĒlia Tonga-hihifo ʻo ʻAmelika Noaté, palesiteni fakasiteiki, tokoni ʻi he palesitenisī fakasiteikí, alēleaʻanga māʻolunga, pīsope, tokoni ʻi he kau pīsopelikí, mo ha palesiteni ʻo e Kau Talavou ʻi he uōtí.