ʻEletā John D. Amos

ʻI he 2020, naʻe maʻu ai ʻe ʻEletā Sione D. ʻĀmosi ha uiuiʻi liliu moʻui ke hoko ko ha palesiteni fakamisiona ki he Misiona Baton Rouge Louisiana. Naʻe lahi ha ngaahi meʻa ʻi heʻene moʻuí naʻe fiemaʻu ke liliu koeʻuhí ko e uiuiʻí, ka naʻe tali loto-lelei ʻe ʻEletā mo Sisitā ʻĀmosi ʻa e ngāué.

Naʻe pehē ʻe ʻEletā ʻĀmosi, “Naʻe ʻosi fakahoko ʻa e filí mo e tukupaá talu mei fuoloa. ʻI he taimi ʻoku ui ai ʻa e ʻEikí, ʻoku tau tali pē.”

Naʻe fāʻeleʻi ʻa Sione D. ʻĀmosi ʻi he ʻaho 2 ʻo Nōvema 1961, ʻi Lafeieti, Luisiana, kia Sione N. ʻĀmosi ko e Lahí mo Tolofī Vikatōliani ʻĀmosi. Naʻá ne fetaulaki mo hono uaifi te na malí, Mīselo ʻĪveti Laiti, ʻi he ngaahi kalasi naʻá na kau fakataha ki ai ʻi he kolisí, ʻo na fakatou ako ʻi he ʻenisinia fakaʻuhilá.

Naʻe ʻosi hoko ʻa Mīselo ko ha mēmipa ʻo e Siasí, pea naʻá ne fakaafeʻi ʻa Sione ki ha hulohula siasi ʻi heʻena fuofua teití. Hili iá, naʻá ne kamata ako lahi ange fekauʻaki mo e Siasí pea mo e tefitoʻi fatongia ʻo e Fakamoʻuí ʻi he ongoongolelei kuo fakafoki maí.

Naʻá ne pehē, “ʻOku fekauʻaki e meʻa kotoa pē mo Sīsū Kalaisi. Ko Ia ʻa e uho ʻo e meʻa kotoa pē.”

Naʻe mali ʻa ʻEletā ʻĀmosi mo Mīselo ʻi Sune ʻaho 9, 1990, ʻi he Temipale Atlanta Georgia. ʻOku ʻi ai ʻena fānau ʻe toko tolu mo ha makapuna ʻe toko ono.

Kuo maʻu ʻe ʻEletā ʻĀmosi ʻene ngaahi mataʻitohi ʻi he ʻenisinia fakaʻuhilá mo e ivi fakaʻātomí. Lolotonga ʻene ngāue maʻuʻanga moʻuí, naʻá ne ngāue ʻi he Tautahi ʻa e ʻIunaiteti Siteití, ngāue ʻi he Siemens Energy Inc., pea faiako ʻi he ʻUnivēsiti ʻo Folōlita Lotolotó.

ʻOku kau ʻi hono ngaahi uiuiʻi faka-Siasi kimuʻá ʻa e Fitungofulu Fakaʻēlia (ʻĒlia ʻAmelika Noate Tonga-hahaké), palesiteni fakamisiona, tokoni ʻi he kau palesitenisī fakasiteikí, pīsope, tokoni ʻi he kau pīsopelikí, palesiteni Lautohi Faka-Sāpate ʻi he uōtí, sekelitali pule ʻo e uōtí, kulupulita ʻo e kau taulaʻeiki lahí, mo e taki nesilī.