ʻEletā Michael Cziesla

ʻOku manatuʻi lelei ʻe ʻEletā Maikolo Sīsela ʻa e ngaahi faingataʻa ʻo e 2017. ʻI ha ʻaho Tūsite ʻi Sānuali, naʻe mole ʻene ngāue ʻi ha kautaha lao fakavahaʻapuleʻanga ʻi he taimi naʻe fakahā ai ʻe he kautahá kuo nau tō lalo fakapaʻangá. ʻI he ʻaho hono hokó naʻe tāfea hono ʻapí ʻi he maumau ha paipa vai. Naʻe hakule ʻe ha kau kaihaʻa hono ʻapí ʻi he ʻaho hono tolú ko e feinga ke toʻo e ngaahi meʻa mahuʻinga ʻa e fāmilí. ʻI ha ngaahi ʻaho siʻi mei ai, naʻe liliu lahi ʻene moʻuí.

Naʻá ne pehē, “naʻá ku malimali ʻi he Sāpate ko iá ʻo hangē ko e angamahení ʻi heʻeku tangutu ʻi muʻa ʻi heʻeku hoko ko e palesiteni fakasiteikí. Naʻe ʻikai ʻiloʻi ʻe ha taha e meʻa naʻe hokó. Ka ʻi hoku lotó, naʻá ku mamahi ʻaupito. Naʻá ku ʻi ha tuʻunga mātuʻaki fakapoʻuli.”

Hili ʻa e fakatahá, naʻe fehuʻi ange ʻe ha tangata anga fakalongolongo mo angavaivai ʻi he uōtí pe ko e hā ʻa e meʻa naʻe hokó. Naʻe pehē ʻe ʻEletā Sīsela, “Naʻá ne fakafanongo, peá ne fāʻofua mai kiate au. Naʻá ku ongoʻi ko e ʻEikí ʻoku fāʻofua maí, naʻá Ne ʻafioʻi ʻeku faingataʻaʻiá, pea ʻe lelei ʻa e meʻa kotoa.”

Naʻe fāʻeleʻi ʻa Maikolo Sīsela kia ʻĀmini Latiuika mo ʻIlematoloti Hena ʻi Niumanisitā, Siamane, ʻi he ʻaho 26 ʻo Siulai, 1972. Naʻá ne tupu hake ʻi Silesiuiki-Holositani pea ngāue kimui ange ʻi he Misiona Utah Ogden. Naʻe ngāue hono uaifi ko Makeleta Ane Laú ʻi he Misiona Temple Square. Naʻá na mali ʻi he Temipale Frankfurt Germany ʻi he ʻaho 4 ʻo ʻEpeleli, 1997. ʻI he taimi naʻe uiuiʻi ai iá, naʻá na nofo mo ʻena fānau ʻe toko nimá ʻi Kalisiheimi, Siamane, ʻa ia naʻa nau manako ki he ʻeva ʻi he ngaahi vaotaá mo mālōlō ʻeveʻeva ʻi ha motu ʻi Tenimaʻake.

Naʻe maʻu ʻe ʻEletā Sīsela ha mataʻitohi lao mei he ʻUnivēsiti ʻo Mainisí ʻi he 2000. Naʻá ne fakakakato ʻene ngāue loea ʻi heʻene hoko ko ha tokotaha māʻolungá ʻi McDermott Will & Emery.

Kimuʻa pea uiuiʻi ʻa ʻEletā Sīsela ko ha Fitungofulu Taki Māʻolungá, naʻá ne hoko ko ha Fitungofulu Fakaʻēlia ʻi he ʻĒlia ʻIulope Lotolotó, palesiteni fakamisiona fakataimi ʻi he Misiona Germany Frankfurt, palesiteni fakasiteiki, alēleaʻanga māʻolunga, mo ha tokoni ʻi he kau pīsopelikí.