ʻEletā Eduardo F. Ortega

ʻI he ngaahi taʻu lahi ʻo e ngāue ʻa ʻEletā ʻEtuato F. ʻŌtika ʻi he Siasí, kuó ne ako ha lēsoni mahuʻinga. Neongo pe ko e hā ha faʻahinga uiuiʻi, pe ko ha pīsope pe ko ha tangata ngāue fakaetauhi, ʻi hoʻo ʻiloʻi ʻoku tau fakafofongaʻi ʻa e ʻEikí, ʻoku faingofua ange ʻa e uiuiʻí.

Naʻá ne pehē, “Kapau te tau fakakaukau ki he founga te Ne fakahoko ai ʻEne ngāué, ʻe faingofua ange ia,” ʻi heʻene lau ʻa e Sēkope 5:71–72 ʻi he Tohi ʻa Molomoná. “Kuo tuʻo lahi ʻeku ongoʻi e ngāue ʻa e ʻEikí ʻi hoku tafaʻakí ʻi ha ngaahi uiuiʻi lahi koeʻuhí he ko ʻEne ngoue vaine, kae ʻikai ko ʻetau ngoue.”

Naʻe fāʻeleʻi ʻa ʻEtuato Falanisesikou ʻŌtika ʻi Kōtoi Kulusi, Menitosa, ʻĀsenitina, ʻi he ʻaho 10 ʻo Siulai, 1977, kia Fenanitō Taniela ʻŌtika mo ʻĪlima ʻElevila ʻEnisitofa. Naʻá ne mali mo Kapiela ʻAlehanitala Kapi Falanisia ʻi he Temipale Montevideo Uruguay ʻi he ʻaho 13 ʻo Sepitema, 2002. Ko ha ongomātuʻa kinaua ki ha fānau ʻe toko nima pea naʻá na nofo ʻi Mekisikou Siti, Mekisikou, ʻi he taimi naʻe uiuiʻi ai iá.

Naʻe maʻu ʻe ʻEletā ʻŌtika ʻene mataʻitohi BA ʻi he ʻākitekí mei he ʻUnivēsiti Sione F. Kenetií, ʻĀsenitina ʻi he 2008, pea mo e mataʻitohi MA mei he ʻUnivēsiti ʻo Pelikanó ʻi he 2016. ʻI he 2017, naʻá ne maʻu ha tipiloma ʻi he tuʻunga fakatakí mei he ʻApiako Pisinisi Hāvātí. Naʻá ne ngāue ko ha pule polōseki langa, ʻuluaki maʻá e Kautaha SBA pea hoko atu ki he Village Roadshow Entertainment Group. Naʻá ne hoko ko ha talēkita fakatau kelekele maʻá e American Express Company ʻi he 2014, mēmipa poate maʻá e Arch Royale Projects Ltd. ʻi he 2023, pea mēmipa poate maʻá e CorNet Global ʻi he 2024.

ʻI he taimi naʻe uiuiʻi ai ʻa ʻEletā ʻŌtiká, naʻá ne hoko ko ha Fitungofulu Fakaʻēlia. Kuó ne hoko foki ko ha tokoni ʻi he kau palesitenisī fakasiteikí, pīsope, tokoni ʻi he kau pīsopelikí, palesiteni ʻo e kōlomu ʻo e kaumātuʻá, kulupulita ʻo e kau taulaʻeiki lahí, mo e faifekau taimi kakato ʻi he Misiona Colombia Cali.