ʻEletā Brik V. Eyre

ʻOku ui ʻe ʻEletā Pilika V. ʻAle ʻene aʻusia ʻi he ngāue taʻu ʻe tolu ko e palesiteni ʻo e Misiona Arizona Phoenix Mission, ʻoku “fakangalongataʻa.”

Naʻá ne pehē ʻo kau ki heʻene ngāue fakataha mo hono uaifi ko Sūsaná, “ʻOkú ke kau fakataha mo ho hoá, … ko ia ai naʻá ma fengāueʻaki fakataha.” ʻI he ngāue fakataha mo ha kau faifekau taimi kakato ʻe laungeaú, naʻá ne pehē, “ʻOku ʻikai te u ʻilo pe te u lava nai ʻo fakamatalaʻi ʻa e tāpuaki maʻongoʻonga ʻo e ngāue ʻi he ʻaho kotoa ʻi he taʻu ʻe tolu, mo ha kau fakafofonga ʻo Sīsū Kalaisi kuo fakamafaiʻi.”

Naʻe fāʻeleʻi ʻa Pilika Veni ʻAle ʻi he ʻaho 17 ʻo Sānuali, 1964, ʻi Lōkani, ʻIutā, kia Veni Pingihemi ʻAle mo ʻEma Lei ʻEnitasoni ʻAle. ʻOku ʻi ai hono ngaahi tuofāfine matuʻotuʻa ange ʻe toko nima mo ha ngaahi kui ʻe niʻihi naʻa nau kau ʻi he kau fuofua kāingalotu ʻo e Siasí.

Naʻe ngāue ʻa ʻEletā ʻAle ʻi he Misiona Guatemala Guatemala City. Naʻá ne mali mo Sūsana Sali Lahimasate ʻi he Temipale Logan Utah ʻi he ʻaho 27 ʻo Sune, 1987. Ko e tamai ʻa Sisitā ʻAlé ʻoku tupuʻi Mosilemi, pea ko ʻene faʻeé ko ha tupuʻi Kāingalotu ʻo e Kau Māʻoniʻoni ʻi he Ngaahi ʻAho Kimui Ní. Ko e ongomātuʻa ʻAlé ʻa ia naʻá na nofo ʻi he Paaka Siti, ʻIutā ʻi he taimi ʻo e uiuiʻi ko ʻení, ʻoku ʻi ai haʻana fānau lalahi ʻe toko nima.

Naʻe maʻu ʻe ʻEletā ʻAle hono mataʻitohi BA ʻi he meʻa fakapaʻangá mei he ʻUnivēsiti ʻIutā Siteití pea mo ha mataʻitohi MA ʻi he puleʻi fakapisinisí mei he ʻUnivēsiti ʻo Talasaá . Kuó ne ngāue ʻi he ngāue ʻanga ʻoku ngaahi ai e ngaahi koloa fakafaitoʻó, kau ai ʻene hoko ko e tokoni palesiteni māʻolunga mo e palesiteni ʻi he vahefonua ʻo ʻAmeliká ki he kautaha Baxter International, pea kimui ní naʻá ne hoko ko ha mēmipa ʻo e poate HemaSource.

ʻI he taimi naʻe uiuiʻi ai ʻa ʻEletā ʻAlé, naʻá ne hoko ko ha Fitungofulu Fakaʻēlia. Kuó ne hoko foki ko ha palesiteni fakasiteiki, tokoni ʻi he kau palesitenisī fakasiteikí, alēleaʻanga māʻolunga, pīsope, palesiteni ʻo e Kau Talavou ʻi he uōtí, mo ha faiako semineli ʻi he hengihengí.