ʻEletā Kevin G. Brown

ʻI he taʻu 12 ʻa Kēvini Palauní, naʻe fakatukupaaʻi ia ʻe ha faifekau fefine ke ne lau e Tohi ʻa Molomoná. Ko ia, naʻá ne lotu, lau, mo toe lotu ʻi he pongipongi kotoa pē. Naʻá ne kole ki he Tamai Hēvaní pe naʻe moʻoni ʻa e Tohi ʻa Molomoná ʻi he lotu kotoa pē.

ʻOkú ne manatu ki ha pongipongi ʻe taha lolotonga ʻene lotú, “naʻe ʻikai fiemaʻu ia ke ne fai ʻa e fehuʻí. Naʻe maʻu e tali ʻa e ʻEikí ʻi ha founga fakaofo moʻoni.” Naʻá ne ongoʻi naʻe fakahā ange ʻe he ʻEikí: “ʻOku ou ʻafioʻi koe, pea ʻoku ou ʻofa ʻiate koe. Ko hoku foha koe.”

ʻI he taimi pē ko iá, naʻe fakapapauʻi ange ʻe he Laumālie Māʻoniʻoní kiate ia: “Ko e moʻoni ʻeni ʻa e ʻOtuá. ʻOku moʻoni ʻa e Tohi ʻa Molomoná. Ko Siosefa Sāmitá ko ha palōfita.” Naʻe liliu ʻe he aʻusia ko ʻení ʻene moʻuí.

ʻOku fakamālō ʻa ʻEletā Palauni ki he ivi tākiekina ʻo e faifekau ko iá mo e niʻihi kehé ʻi he tuʻunga ʻokú ne ʻi ai ʻi he taimi ní. Talu mei heʻene kei siʻí mo hono tākiekina ia ʻe he kāingalotu ʻo e Siasí ʻa ia naʻa nau tokoniʻi ia—mei heʻene palesiteni fakavahefonuá ki he kau faiako Palaimelí, mei he kau faifekau kei talavoú ki he kau faifekau matuʻotuʻá, kae tautautefito ki hono uaifi ko Neitiní, ʻa ia kuó ne hoko ko e tokoni lahi tahá mavahe mei he ʻEikí.

Naʻe fāʻeleʻi ʻa Kēvini G. Palauni ʻi he ʻaho 18 ʻo Mē 1976, ʻi Manisesitā, Samaika, kia Tesimoni Holinesi mo Petisī Uiliami Piliseta. Naʻá ne mali mo Neitini Liseni Kata ʻi he 1999. ʻOku ʻi ai ʻena fānau ʻe toko nima.

Naʻe maʻu ʻe ʻEletā Palauni hono mataʻitohi BA mei he ʻUnivēsiti ʻo e Tekinolosiá, Samaika ʻi he 2008. Naʻá ne maʻu ha mataʻitohi MA ʻi he mafai pulé mo e tuʻutuʻuni fakapuleʻangá mei he ʻUnivēsiti ʻo e Uēsite ʻInitisí ʻi he 2012. Talu mei he 2001 mo ʻene ngāue maʻá e Semineli mo e ʻInisititiuti Fakalotu ʻa e Siasí.

ʻI he taimi hono uiuiʻi ʻo ʻEletā Palauní, naʻá ne lolotonga hoko ko ha Fitungofulu Fakaʻēlia ʻi he ʻĒlia ʻIutaá.