ʻEletā Edward B. Rowe

ʻI he ngāue ʻa ʻEletā ʻEtuate B. Lou ʻi he lao fakatuʻapuleʻangá, naʻá ne nofo mo hono fāmilí ʻi ha ngaahi tami ʻi he ngaahi ʻēlia naʻe meimei ko kinautolu pē ko e kāingalotu ʻo e Siasí. Naʻa nau fakahoko ha ngaahi fakatahaʻanga ʻa e siasí fakafāmili ʻi honau ʻapí, ʻi ha ngaahi taʻu kimuʻa ʻi hono fakafeʻiloaki e naunau Haʻu, ʻo Muimui ʻIate Aú. Naʻe fakatefito ʻenau moihuú ʻi ʻapi—ʻo fakakakato ʻaki ʻenau tui vala lotu mo hono vahe ha ngaahi lea.

Naʻe manatua ʻe ʻEletā Lou ʻene ʻiloʻi ko e “ngaahi akonaki pē ʻe maʻu ʻe heʻema fānaú fekauʻaki mo e ongoongolelei ʻo Sīsū Kalaisí, ko e maʻu meiate kimaua.”

Naʻe ngaohi ʻe he ngaahi aʻusia ko ʻení ke uouangataha honau fāmilí mo ʻai ke faingofua ʻa e ongoongolelei ʻo Sīsū Kalaisí ʻi heʻena feinga ke tokoniʻi ʻena fānaú ke nau maʻu ha vā fetuʻutaki mo e Fakamoʻuí. Naʻá ne pehē, “Ko ha ngaahi taimi toputapu mo makehe ia.”

Naʻe fāʻeleʻi ʻa ʻEtuate Patilā Lou ʻi Polovo, ʻIutā, ʻi he ʻaho 23 ʻo ʻEpeleli, 1967, kia Feleti A. Lou mo Sēlile Lou. Naʻá ne mali mo Puluki Falanisesi ʻi he Temipale Sōlekí ʻi he ʻaho 3 ʻo Sānuali, 1989. Ko ha ongomātuʻa kinaua ki ha fānau ʻe toko nima pea naʻa nau nofo ʻi Peleseni Kolove, ʻIutā ʻi he taimi naʻe uiuiʻi ai iá.

Naʻe maʻu ʻe ʻEletā Lou ha mataʻitohi BA ʻi he filosofií mei he ʻUnivēsiti Pilikihami ʻIongí mo ha mataʻitohi MA ʻi he tuʻutuʻuni fakapuleʻangá pea mo ha mataʻitohi toketā lao fakapalōfesinale mei he ʻUnivēsiti ʻo Sikākoú. Kuó ne ako ngāue ʻi he lao fakavahaʻapuleʻangá ko ha hoa ngāue ʻi ha ngaahi kautaha lao kehekehe ʻi Uāsingatoni, D.C., pea ʻi he funga ʻo māmani. Talu mei he 2019 mo ʻene ngāue ko e CEO ʻo e Stirling Foundation.

ʻI he taimi naʻe uiuiʻi ai iá, naʻá ne lolotonga hoko ko ha Fitungofulu Fakaʻēlia. Naʻá ne hoko kimuʻa ko ha palesiteni ʻo e Misiona Adriatic North (2011–2014), pīsope, palesiteni ʻo e Kau Talavou ʻi he siteikí, palesiteni ʻo e kōlomu ʻo e kaumātuʻá, taki faifekau fakauooti, mo e faifekau taimi kakato ʻi he Misiona Florida Fort Lauderdale.