“Ngaahi Meʻa ʻoku ʻIkai Fakaʻasí: Fakatonuleá mo e Ngaahi Tokoni ki he Kau Fakaafé,” Liahona, Mē 2025.
Ngaahi Meʻa ʻoku ʻIkai Fakaʻasí: Fakatonuleá mo e Ngaahi Tokoni ki he Kau Fakaafé
Ko e fakaʻosinga ʻo e uiké tuʻo taha ʻi he māhina ʻe ono kotoa pē, ʻoku tau mamata ai ki he konifelenisi lahí. Ka ʻi mui ʻi he ngaahi ʻatá, ko ha kau ngāue tokoni ʻe lauafe mo ha kau ngāue ʻa e Siasí ʻoku nau ngāue ʻi ha ngaahi māhina ke lava ʻo fakahoko ʻa e konifelenisi lahí.
ʻOku nau fokotuʻutuʻu ʻa e meʻa kotoa pē ke fakamafola ʻa e ngaahi pōpoaki fakaepalōfitá ki he laumiliona ʻi he funga ʻo e māmaní. Ko ha kiʻi vakai siʻi ʻeni ki he ngāue mafatukituki ko ʻení.
Ngaahi Ngāue ki he Fakatonuleá
ʻOku ʻi ai ha ngaahi timi lea fakafonua ʻe teau fāngofulu mā tolu ʻi he funga ʻo e māmaní ʻoku nau fakatonuleaʻi ʻa e ngaahi lea konifelenisi lahí ʻi he taimi pē ko iá kae lava ke fanongoa ʻe he kāingalotú ʻi heʻenau ngaahi lea tuʻufonuá ʻo ʻikai ha toe tatali. Ko e timi pē ʻe 57 mei he ngaahi timi ko iá ʻoku nau fakatonulea mei he hetikuota ʻo e Siasí ʻi Sōleki Siti.
ʻOku kehe ʻa e fakatonuleá mei he liliu leá, ʻa ia ʻoku kau ai hano liliu ʻo e ngaahi lea kuo tohí ki ha lea fakafonua kehe. ʻI he fakatonuleá, kuo pau ke mateuteu ʻa e ngaahi timi lea fakafonuá ke fakatonuleaʻi ha ngaahi liliu mo ha ngaahi lea naʻe toki fai pē ʻi he tuʻunga malangá. ʻOku tokoni ʻa e kau fakatonuleá ki he kāingalotu ʻi he funga ʻo e māmaní ke nau fanongo ki he ongoongoleleí ʻi heʻenau lea fakafonuá (vakai, Tokāteline mo e Ngaahi Fuakava 90:11).
Ngaahi Tokoni maʻá e Kau Fakaafé
Kapau kuó ke ʻalu ki he konifelenisi lahí ʻi Sōleki Siti, USA, kuó ke fakatokangaʻi hano tataki koe ʻe he kau fakanofonofó ki ho nofoʻangá. ʻOku fakafuofua ki ha kau faifekau ʻe toko 400 nai ʻi he Temipale Sikueá ʻoku nau ngāue tokoni ʻi ha meimei houa ʻe 9,000 ʻi he konifelenisi lahí ke tokoni ki he kau ʻaʻahí ke ola lelei ʻenau hū ki loto mo hū ki tuʻa mei he Senitā Konifelenisí.
ʻOku nau tataki ha kau ʻaʻahi ʻe toko 20,000 ki he fakataha takitaha ʻo e konifelenisi lahí. ʻI he ʻosi pē ʻa e fakatahá, te nau ngāue leva ke tataki ʻa e kau ʻaʻahí ki tuʻa ʻi he vave tahá koeʻuhí ke nau lava ʻo fakamaʻa ʻa e ngaahi feituʻu ki he felueʻakí maʻá e niʻihi te nau kau ki he fakataha hono hokó.