ʻEletā Steven C. Barlow

Ko e taha ʻo e ngaahi aʻusia ongo taha kia ʻEletā Sitīveni C. Pālou mo e Laumālie Māʻoniʻoní, ko e “ueʻi taʻe toe fehuʻia mei he langí ʻa e fiemaʻu ke [ne] mali mo Kilisitina ʻEvanisí.” Naʻá na mali ʻi he Temipale Salt Lake ʻi he 1991 pea ʻi ai ʻena fānau ʻe toko nima.

Naʻe hoko ʻa ʻEletā mo Sisitā Pālou ko ha ongo taki fakamisiona ʻi ʻEkuatoa mei he 2017 ki he 2020, kau ai ʻa e kamataʻanga ʻo e mahaki fakaʻauha COVID-19. Lolotonga e taimi ko iá, ne tokolahi ha kau faifekau ne nau foki ki ʻapi, kae toe vahe ha kau faifekau kehe ki he misiona ʻa e ongomātuʻa Pāloú. Naʻe fakamoʻoni ʻa ʻEletā mo Sisitā Pālou ki hono tataki ʻe he toʻukupu ʻo e ʻEikí ʻa e ngaahi ngāue fakafaifekau ko iá.

Naʻá ne manatua, “Naʻe tuku ʻemau falalá ki he ʻEikí. Naʻe ʻi ai ha ngaahi taimi naʻe ʻikai ke mau ʻiloʻi pe ko e hā e meʻa ʻe hoko ʻi he ʻaho hono hokó. Naʻa mau fakafaingofua pē mo tuʻu mateuteu. Naʻa mau faʻa lotu, pea naʻe ngāue lelei e meʻa kotoa pē.”

Naʻe toe fakamamafaʻi mai ʻe he aʻusia ko ʻení ʻa e ngaahi lēsoni naʻe akonekina ia ki ai kimuʻa, ko e ʻEikí ʻokú Ne fai e tatakí pea ʻe lava ke tau falala maʻu pē kiate Ia.

Naʻe maʻu ʻe ʻEletā Pālou ha mataʻitohi BA ʻi he ako ki he moʻui leleí mei he ʻUnivēsiti ʻo ʻIutaá ʻi he 1993. Kuó ne ngāue ko ha pule ʻi he ʻanalaiso fakamatalá mo e fakatupulaki ʻo e tuʻunga ngāue ʻi he tokangaekina e moʻui leleí. ʻI he taimi naʻe uiuiʻi ai ʻa ʻEletā Pāloú, naʻá ne lolotonga ngāue ko ha Fitungofulu Fakaʻēlia ʻi he ʻĒlia ʻIutaá.

Naʻe fāʻeleʻi ʻa Sitīveni Seti Pālou ʻi Mahu, ʻIutā ʻi he ʻaho 1 ʻo Sānuali 1969 kia Sione Kei Pālou mo Peki Kulisiteniseni Pālou. Naʻe “ohi ia ʻe ha ongomātuʻa moʻui mateaki mo faitotonu” naʻá na akoʻi kiate ia ʻa e ongoongoleleí ʻi heʻene kei siʻí.