“ʻEletā Petelō X. Lāliela,” Liahona, Mē 2025.
ʻEletā Pedro X. Larreal
Fitungofulu Taki Māʻolunga
ʻI he māhina hono fā ʻo e hoko ʻa ʻEletā Petelō X. Lāliela ko ha faifekau taimi kakató, naʻe ʻaʻahi ai ʻa Palesiteni Kōtoni B. Hingikelī (1910 - 2008) ki he Misiona Venezuela Caracas.
Naʻe manatu ʻa ʻEletā Lāliela, “Naʻá ne ʻomi ha fakaafe fakaʻofoʻofa kiate kimautolu fekauʻaki mo e fakatapuí: ʻKapau te ke tokanga peseti ʻe 100, ʻoku ou palōmesi atu ʻe maʻu ʻe ho fāmili ʻi he kahaʻú ha ngaahi tāpuaki.’”
Hili iá, naʻe fai ʻe ʻEletā Lāliela ha tohi ke fakaʻosi ʻene feohi mo hono kaumeʻá. “Naʻe fiemaʻu ke u feilaulauʻi e meʻa kotoa koeʻuhí naʻe fiemaʻu ke u toe tokanga ange.”
ʻI heʻene fakakaukau atu ki aí, ʻokú ne fakatokangaʻi ha ngaahi tāpuaki lahi—ako lelei, ngāue maʻuʻanga moʻui lelei—ʻo kamata mei he falala ki he talaʻofa fakaeʻaposetolo ko iá.
Naʻá ne pehē, “ʻI he taimi ʻoku tau muimui ai ki he fakahinohino ʻa ha palōfita, tangata tikite, mo e tangata maʻu fakahaá, te tau maʻu ha ngaahi tāpuaki ʻi heʻetau moʻuí. ʻOku ou palōmesi atu.”
Naʻe fāʻeleʻi ʻa Petelō ʻEkiseviā Lāliela Nokuela ʻi he ʻaho 6 ʻo Siulai, 1976, ʻi Valenisia, Venesuela, kia Tuilio ʻAnitonio Lāliela Lōmelo mo Heiti Malia Nokuela Ti Lāliela. Naʻá ne mali mo Selaia ʻAlavalesi Kamiposi ʻi he Temipale Caracas Venezuela, ʻi he ʻaho 25 ʻo ʻAokosi, 2001. Ko e mātuʻa kinaua ki ha fānau ʻe toko tolu.
Naʻe maʻu ʻe ʻEletā Lāliela hono mataʻitohi BA ʻi he pulé mei he ʻUnivēsiti Saimone Lotilikuesí, ko ha mataʻitohi MA ʻi he saienisi ʻi he akó mei he ʻUnivēsiti Sanitā Maliá, mo ha mataʻitohi MA ʻi he pule fakapisinisí mei he ʻUnivēsiti Pilikihami ʻIongí. Naʻá ne ngāue ko ha kouʻōtineita ʻo e Seminelí mo e ʻInisititiuti Fakalotú pea ngāue ʻi he Natureʻs Sunshine Products Inc. ko e pule lahi mo e talēkita fakavahelahi ʻo Mekisikou, ʻAmelika Lotolotó, pea mo e Lepapulika Tominikení.
Kimuʻa pea uiuiʻi ʻa ʻEletā Lāliela ko ha Taki Māʻolungá, naʻá ne lolotonga hoko ko e palesiteni ʻo e Misiona Texas McAllen. Kuó ne hoko ko ha Fitungofulu Fakaʻēlia ʻi ha ʻēlia ʻe ua, palesiteni fakasiteiki, tokoni ʻi he kau palesitenisī fakasiteikí, alēleaʻanga māʻolunga, sekelitali pule ʻo e siteikí, mo ha pīsope.