Brother David J. Wunderli

Tokoni ʻUluaki ʻi he Kau Palesitenisī Lahi ʻo e Kau Talavoú

Kuo ʻiloʻi maʻu pē ʻe Brother Tēvita J. Uanitali ʻoku moʻui ʻa Sīsū Kalaisi.

Naʻá ne pehē, “naʻe tāpuekina au ke u ongoʻi ʻEne ʻiate aú talu mei he fuoloá. Kuó u maʻu maʻu pē ha loto-tui.”

ʻOku ʻikai ʻuhinga ia ʻoku teʻeki ke ne aʻusia ha ngaahi faingataʻa, “ka kuo fakafalala maʻu pē ʻeku fakalaulaulotó ki hono ʻiloʻi ʻoku ʻi ai ha ngaahi tali meiate Iá.”

ʻOku loto ʻa Brother Uanitali ke ongoʻi ʻe he toʻu tupu ʻo e Siasí ʻoku nau kau mo ʻiloʻi ʻoku ʻi ai haʻanau kaungā vaʻinga ʻi he fonua kotoa pē pea ʻoku ʻafioʻi fakafoʻituitui kinautolu ʻe Sīsū Kalaisi.

Naʻe fāʻeleʻi ʻa Tēvita Sione Uanitali ʻi Sōleki Siti ʻi he 22 ʻo Sune, 1961, kia Feletiliki Fiatoa Uanitali mo Penatiini Laimani Uanitali. Naʻá ne fetaulaki mo Taieni Lōpini ʻi he taimi naʻe hiki mai ai [ʻa Taieni] mei Kānata ki he uooti [ʻo Tēvitá]. Naʻe silaʻi kinaua ʻi he Temipale Sōlekí ʻi he 1984 pea ohi hake ʻena fānau ʻe toko faá ʻi Kalefōnia pea mo ʻAlapaini, ʻIutā.

Naʻe ngāue ʻa Brother Uanitali ʻi he Misiona Brazil Rio de Janeiro pea maʻu hono mataʻitohi BA mei he ʻUnivēsiti ʻo ʻIutaá ʻi he tauhi tohí pea mo e lea faka-Potukalí. Naʻá ne ngāue ko ha pule ʻi he Easton Sports pea ko e palesiteni ʻo e OGIO International. Naʻá ne ngāue foki ʻi ha ngaahi poate fakafekauʻaki mo ha ngaahi poate tokoni ʻofa.

ʻI he taimi naʻe uiuiʻi ai iá, naʻá ne lolotonga ngāue ʻi he fakataha alēlea faifaleʻi lahi ʻa e Kau Talavoú. ʻOku ngāue ʻa Sisitā Uanitali ʻi he fakataha alēlea faifaleʻi lahi ʻa e Palaimelí. Mei he 2020 ki he 2023, naʻá na hoko ko ha ongo taki ʻi he Misiona Cape Verde Praia. Naʻe hoko foki ʻa Brother Uanitali ko ha palesiteni fakasiteiki mo ha pīsope ʻi he kau taautaha lalahi kei talavoú, tokoni palesitenisī fakakolo ʻi he senitā akoʻanga fakafaifekaú, pea mo ha palesiteni ʻo e Kau Talavou ʻi he uōtí.