ʻEletā Ronald M. Barcellos

ʻI he taʻu 12 ʻa ʻEletā Lainolo M. Pāseló, ko e fuofua taimi ia ke ne lau ai ʻa e Tohi ʻa Molomoná. ʻI he ʻosi ʻene laukongá, naʻá ne ʻalu ki he faiako semineli ʻi hono uōtí ʻo kole pe ʻe lava ke ne kamata ʻalu ki he ngaahi kalasi seminelí.

Naʻá ne pehē, “Naʻá ku ʻalu ki he seminelí mei hoku taʻu 12 ki he 18 koeʻuhí ne u manako ʻaupito ke ʻalu ʻo fanongo ki he ngaahi talanoa ʻo e Tohi Tapú mo e Tohi ʻa Molomoná. Naʻá ku ongoʻi maʻu pē ʻa e ʻofa ki he ongoongoleleí, pea naʻá ku ongoʻi maʻu pē naʻe moʻoni.”

Naʻe fakamālohia kimui ange ʻene tuí ʻe he ngāue fakafaifekaú, pea naʻá ne fakapapau ke fakamuʻomuʻa maʻu pē ʻa e ongoongoleleí ʻi heʻene moʻuí.

Naʻá ne pehē, “Nofo ofi ki he [Tamai Hēvaní], tauhi hoʻo ngaahi fuakavá, pea ʻe hoko ʻa ʻEne ngaahi palani maʻaú.”

Naʻe fāʻeleʻi ʻa Lainolo Malatonato Pāselo ʻi Sao Paulo, Palāsila, ʻi he ʻaho 4 ʻo Nōvema, 1975 kia Sēsio Pāselo Siliveilā mo Māsiā Malatonato Pāselo Siliveilā. Naʻá ne mali mo Kalini Sipata ʻAlapaino Pāselo Siliveilā ʻi he Temipale São Paulo Brazil ʻi he ʻaho 4 ʻo Tīsema, 1999. Ko e mātuʻa kinaua ki ha fānau ʻe toko tolu.

Naʻe ako ʻa ʻEletā Pāselo ki he pule fakapisinisí ʻi he ʻUnivēsiti Sao Mākosí ʻi Sao Pauló. Naʻe kau ʻi heʻene ngāue maʻuʻanga moʻuí ʻa ʻene ngāue ki ha ngaahi kautaha fakatau mo tuʻuaki koloa, ʻi heʻene hoko ko ha tokotaha pisinisí. Naʻá ne kau ʻi hono fokotuʻu ha ngaahi pisinisi, kau ai ʻa e GreenMile, LLC, ʻa ia naʻá ne hoko ai ko e ʻōfisa pule lahi ʻi ha ngaahi taʻu lahi.

Naʻe fakaʻosi ʻe ʻEletā Pāselo kimuí ni ʻene ngāue ko ha palesiteni fakamisiona ʻi he Misiona Portugal Lisbon. Kuó ne hoko foki ko ha tokoni ʻi he kau palesitenisī fakasiteikí, alēleaʻanga māʻolunga, palesiteni ʻo e Kau Talavou ʻi he siteikí, pīsope, tokoni ʻi he kau pīsopelikí, kulupulita ʻo e kau taulaʻeiki lahí, palesiteni ʻo e kōlomu ʻo e kaumātuʻá, mo ha faiako semineli.