Brother Sean R. Dixon

ʻI he fakatokangaʻi ʻe Brother Soni R. Tikisoni ʻa e lahi ʻo e ngaahi meʻa ʻoku nau feinga ke tohoakiʻi ʻa e tokanga ʻo e kakai kei talavoú, ʻokú ne fakaʻamu ʻe mamata ʻa e toʻu tupú ki he kau palōfita mo e kau ʻaposetolo ʻo e kuonga ní pea falala mo muimui ki heʻenau fakahinohinó.

Naʻá ne pehē, “Te nau tataki kinautolu kia Sīsū Kalaisi. ʻOku ʻikai ko e palōfitá [Palesiteni Lāsolo M. Nalesoni] ʻa e taumuʻa ʻo ʻetau ngāué; ka ko e Fakamoʻuí. Ka ʻoku tataki moʻoni ʻe he palōfitá ki he Fakamoʻuí, pea kapau te nau muimui kiate Ia, te nau mateuteu ki he meʻa te nau fehangahangai mo ia ʻi heʻenau moʻuí.”

Naʻe fāʻeleʻi ʻa Soni Lomenī Tikisoni ʻi he ʻaho 5 ʻo Mē, 1970, ʻi Polovo, ʻIutā, ko e foha ʻo Tōnolo Lomenī Tikisoni mo Taieni Sikoti Tikisoni. Naʻá ne ngāue fakafaifekau taimi kakato ʻi he Misiona Canada Toronto. Naʻá ne mali kimui mo Maselo Lanikisa ʻi he ʻaho 14 ʻo Mē, 1992, ʻi he Temipale Salt Lake. Ko e mātuʻa kinaua ki ha fānau ʻe toko nima.

Naʻe maʻu ʻa e mataʻitohi BA ʻo Brother Tikisoní ʻi he saienisi ʻo e fāmilí mei he ʻUnivēsiti Pilikihami ʻIongí pea mo e mataʻitohi MA ʻi he akó mei he ʻUnivēsiti ʻo Fīnikí (University of Phoenix). Kuó ne ngāue ʻi ha ngaahi fatongia kehekehe ʻi he Seminelí mo e ʻInisititiuti Fakalotú ʻi ha taʻu ʻe 30, ʻa ia ʻoku lolotonga hoko ko e talēkita ʻo e Vāhenga ʻInisititiuti Fakalotu ʻo ʻIutā Sauté, ʻo tokangaʻi ʻa e ngaahi ʻinisititiuti mei ʻŌlemi ki Seni Siaosi. Kimuʻá, naʻá ne hoko ko ha faiako semineli ʻi he Vahefonua ʻIutaá mo e talēkita ʻo e ʻInisititiuti Fakalotu ʻo e Teleʻa ʻIutaá.

ʻI he taimi naʻe uiuiʻi ai ʻa Brother Tikisoní, naʻá ne hoko ko e palesiteni ʻo e Siteiki Sipeini Fooki ʻIutā Hahaké. Naʻá ne hoko kimuʻa ko ha palesiteni ʻo e Misiona California Redlands, tokoni ʻi he kau palesitenisī fakasiteikí, pīsope, tokoni ʻi he kau pīsopelikí, mo ha palesiteni ʻo e Kau Talavou ʻi he uōtí.