ʻEletā Ozani Farias

Naʻe hoko ʻa hono lotua ʻe ʻEletā ʻŌsani Falaesa ʻa e ngaahi fili faingataʻá, ko ha fakavaʻe mālohi kiate ia talu mei heʻene kei siʻi. Naʻe lotu ʻa ʻEletā Falaesa hili ʻene fetaulaki mo e kau faifekaú ʻi hono taʻu 15. Naʻá ne lotua ha ngaahi faingamālie ngāue fakafaifekau taimi kakato, ako, mali, mo ha ngāue maʻuʻanga moʻui.

Pea naʻa mo e taimi naʻe ʻikai mahino ai ʻa e halá, naʻá ne ʻiloʻi ʻa e meʻa naʻe pau ke ne faí.

Naʻá ne pehē, “ʻOku muʻomuʻa maʻu pē ʻa e ʻOtuá. Tomuʻa tauhi kiate Ia. Kuó ma mamata ki ha ngaahi tāpuaki lalahi mei hono fakahoko ʻení.”

Naʻá ne pehē, kuo teʻeki ke takihalaʻi ia mo hono uaifí ʻe he muimui ki he ngaahi ueʻi mei he Laumālie Māʻoniʻoní. “Kuó u ʻiloʻi ʻa e mālohi ʻo e fakahā fakatāutahá. ʻOku folofola ʻa e ʻOtuá ki Heʻene fānaú. Pea ʻoku ʻi ai e palani ʻa e ʻOtuá maʻatautolu.”

Naʻe fāʻeleʻi ʻa ʻŌsani Pāposa Mākesi Falaesa ʻi Lesafī, Palāsila, ʻi he ʻaho 19 ʻo ʻOkatopa, 1969 kia Hōsea ʻŌsana Falaesa mo Sevelina Pāposa Mākesi. Naʻe silaʻi ia mo hono uaifi ko Siovana ti Meteilosi Palata Falaesá ʻi he Temipale São Paulo Brazil ʻi he ʻaho 18 ʻo Sānuali, 1994. ʻOku ʻi ai haʻana fānau ʻe toko tolu.

Naʻe maʻu ʻe ʻEletā Falaesa hono mataʻitohi BA ʻi he tauhitohí mei he ʻUnivēsiti Katolika ʻo Pēnamipukó, ko ha mataʻitohi postgraduate ʻi he meʻa fakapaʻangá mei he ʻUnivēsiti ʻo Pēnamipukó, ko ha mataʻitohi MA ʻi he taki fakapisinisí mei he Getulio Vargas Foundation. Kuó ne ngāue maʻá e Siasí ʻi ha ngaahi tuʻunga kehekehe, kau ai ʻene hoko ko ha pule ki he meʻa fakapaʻangá, pule ki he ngaahi maʻuʻanga tokoni fakaetangatá, pea ko e fakamuimuitahá, ko ʻene hoko ko e talēkita ʻo e ngaahi meʻa fakatuʻasino ki he ʻĒlia Palāsilá.

ʻOku lolotonga hoko ʻa ʻEletā Falaesa ko ha palesiteni fakamisiona ʻo e Misiona Georgia Atlanta. Kuó ne hoko foki ko ha tokoni ʻi he kau palesitenisī fakasiteikí, kalake fakasiteiki, alēleaʻanga māʻolunga, pīsope, tokoni ʻi he kau pīsopelikí, mo ha faiako Palaimeli.