ʻEletā Clement M. Matswagothata

ʻI he taimi naʻe kei siʻi ai ʻa ʻEletā Kelemete M. Masauakofata ʻi Potisuaná, naʻá ne lau leʻo lahi ʻa e Tohi Tapú ki heʻene kui fefiné. Naʻá ne lau ai ʻi he 1 Samuela 3, ki he taimi naʻe folofola ai ʻa e ʻOtuá kia Samuela, ʻa ia naʻe uiuiʻi kimui ko ha palōfitá.

“Ko e ʻeku fuofua fehuʻí ko e, ‘ʻOku kei fakahoko nai ʻe he ʻOtuá ʻa e meʻa tatau?’”

Naʻe kamataʻi ʻe he fehuʻi ko iá ʻa ʻene feinga ke kumi ha ʻOtua ʻoku kei folofola ki he tangatá. Naʻá ne feʻiloaki mo e kau faifekau ʻo e Siasí ʻi hono taʻu 16, lau ʻa e Tohi ʻa Molomoná ʻi ha ngaahi ʻaho siʻi, pea telefoni kiate kinautolu ʻi he 3:00 a.m. ke talaange ʻokú ne fie papitaiso.

Naʻá ne hoko kimui ange ko e fuofua palesiteni fakasiteiki naʻe ui ʻi Potisuaná, naʻá ne hoko leva ko e fuofua Fitungofulu Fakaʻēlia, pea hoko ʻi he taimí ni ko e fuofua Fitungofulu Taki Māʻolunga.

Naʻá ne pehē, “ʻOku ou maʻu ha fakamoʻoni mālohi ʻoku moʻui ʻa e ʻOtuá pea ʻokú Ne folofola mai kiate kitautolu ʻi he ngaahi ʻaho fakaʻosi ko ʻení pea ʻoku tau moʻui ʻi ha kuonga ʻoku ʻaʻeva ai ʻa e kau palōfitá ʻi he māmaní,”

Naʻe fāʻeleʻi ʻa Kelemete Mosiame Masauakofata ʻi Mītolopiti, Potisuana ʻi he ʻaho 8 ʻo Sānuali, 1980, kia Posiotī J. mo Lesieli M. Masauakofata. Hili ʻene ngāue ʻi he Misiona South Africa Cape Town, naʻá ne fetaulaki ai mo hono uaifi ko Novoleti Pusisivē Putelesí, ʻi ha fakataha fakaʻēlia ʻa e kau taautaha lalahi kei talavoú. Naʻá na mali ʻi he Temipale Johannesburg South Africa ʻi he ʻaho 28 ʻo Fēpueli, 2004. ʻOku ʻi ai haʻana fānau ʻe toko tolu.

Naʻe maʻu hono mataʻitohi BA ʻi he filosofií. Kuó ne ngāue ʻi he ngaahi kautaha meʻalele ʻoku ʻi ai hanau kalasi kā kehekehe, ʻo ne ngāue ʻi ha ngaahi tuʻunga fakataki kehekehe, kau ai ʻa e pule faifakataú, pule lahí, mo e pule fakafonua ki he Barloworld Motor.

ʻI he taimi hono uiuiʻi ʻo ʻEletā Masauakofatá, naʻá ne hoko ko ha tokotaha ngāue ouau temipale ʻi he Temipale Johannesburg South Africa pea mo ha tokotaha mataotao fakaʻēlia ʻi he moʻui fakafalala pē kiate kitá.