ʻEletā Aaron T. Hall

ʻOku manatu ʻa ʻEletā ʻĒlone T. Holo ki he taimi naʻe vaheʻi ai ia mo hono uaifi ko Kimipelií, ke na hoko ko ha ongo taki fakamisiona ʻi he Misiona Texas Houston South. Naʻá na talaange kia Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻá na kamata ongoʻi lōmekina pea iku fiefia. Naʻe fakahaaʻi ʻe ʻEletā Petinā ʻa e fiemaʻu ko ia ke ongoʻi houngaʻiá.

Naʻá ne pehē, “Kuo teʻeki ke mavahe mei heʻeku fakakaukaú ʻa e meʻa naʻá ne akoʻi mai kiate kimaua ʻi he ʻaho ko iá fekauʻaki mo ha faʻahinga uiuiʻi pē te ma maʻu, ʻa ia ko e, ‘ʻOkú ma ongoʻi houngaʻia pē.’ Te ke fifili pe naʻe anga fēfē nai hono fili koe ʻe he ʻEikí, ka ʻoku tau fakamoʻoniʻi ʻokú Ne ʻafioʻi. Pea koeʻuhí ʻoku tau loto-fiemālie mo faingamālie, te Ne ngaohi kitautolu ke tau malava.”

Naʻe fāʻeleʻi ʻa ʻĒlone Telesī Holo ʻi he ʻaho 4 ʻo Māʻasi, 1971, ʻi Polovo, ʻIutā, ko e foha ʻo ʻĀlani ʻIusini Holo mo Pola Sini Nouaki Holo. Naʻá ne ngāue fakafaifekau taimi kakato ʻi he Misiona Chile Osorno pea hili iá naʻá ne mali mo Kimipelī Ueiti Holo ʻi he ʻaho 28 ʻo Tīsema 1993, ʻi he Temipale Logan Utah. Ko ha ongomātuʻa kinaua ki ha fānau ʻe toko fā.

ʻI he taimi naʻe uiuiʻi ai ʻa ʻEletā Holó, naʻá ne lolotonga hoko ko ha Fitungofulu Fakaʻēlia ʻi he ʻĒlia ʻIutaá. Kuó ne hoko foki ko ha tokoni ʻi he kau palesitenisī fakasiteikí, aleaʻanga māʻolunga, sekelitali pule ʻo e siteikí, pīsope, palesiteni ʻo e kōlomu ʻo e kaumātuʻá, mo ha palesiteni ʻo e Kau Talavoú ʻi he uōtí.

Naʻe maʻu ʻe ʻEletā Holo ʻene mataʻitohi BA ʻi he fefakatauʻaki fakapalōfesinalé mei he ʻUnivēsiti Uepa Siteití pea mo e mataʻitohi MA ʻi he pule fakapisinisí mei he ʻUnivēsiti ʻo ʻIutaá. Kimuʻá, naʻá ne hoko ko ha pule ʻi ha ngaahi kautaha ʻinivesi ke fakatupu ha ngaahi kautaha tekinolosia mo e fakataautaha, ko ʻene ngāue fakamuimuitahá ko ha talēkita ʻi he Potungāue Ngāue Fakafaifekau ʻa e Siasí.