మోర్మన్ గ్రంథం—మన ప్రయాణంలో ఒక అమూల్యమైన నిధి

ఆల్మా మరియు మోషైయ కుమారుల వలే, మనము “దేవుని వాక్యమును తెలుసుకొనునట్లు [మనము] లేఖనములను శ్రద్ధగా వెదకాలి” (ఆల్మా 17:2) మరియు సత్యమునందు బలపరచబడాలి.

నా భార్య మరియు నేను జార్జియా అట్లాంటా మిషనులో మిషను నాయకులుగా సేవ చేస్తుండగా, ప్రతీ సువార్తికుడు ప్రతిరోజూ కనీసం 30 నిమిషాలు మోర్మన్ గ్రంథమును అధ్యయనం చేయాలని మేము ప్రోత్సహించాము. ఆ నిబద్ధత మా విశ్వాసాన్ని హెచ్చించింది మరియు అద్భుతాలను వెదకడానికి మరియు ఆశించడానికి మాకు సహాయపడింది.

మిషను తరువాత ప్రతిరోజూ లేఖన అధ్యయనము కొరకు మనకు అదే సమయం అందుబాటులో ఉండకపోవచ్చు, కానీ ప్రతిరోజూ ప్రార్థనాపూర్వకంగా మోర్మన్ గ్రంథమును అధ్యయనం చేయడానికి మీరు నిజాయితీగా ప్రాధాన్యత ఇచ్చిన యెడల, ప్రభువు మరియు ఆయన వాగ్దానాలందు మీరు గొప్ప ఆత్మీయ బలాన్ని మరియు విశ్వాసాన్ని పొందుతారు.

“క్రీస్తు యొక్క మాటలను విందారగించుడి; ఏలయనగా క్రీస్తు యొక్క మాటలు మీరు చేయవలసిన కార్యములన్నిటినీ మీకు తెలుపును” (2 నీఫై 32:3) అని నీఫై బోధించాడు.

విందు చేసుకోవడం అంటే చదవడం కంటే ఎక్కువ—దాని అర్థం ఆస్వాదించడం, ఆలోచించడం మరియు అన్వయించడం. మీరు మోర్మన్ గ్రంథమును అధ్యయనము చేసినప్పుడు, మీ లేఖన అధ్యయనమును మరింత అర్థవంతమైనదిగా చేసే విధానాలను పరిగణించండి. ఉదాహరణకు:

• సువార్త గ్రంథాలయం యాప్‌లో అందుబాటులో ఉన్న అధ్యయన సహాయాలను ఉపయోగించండి.

• దేవుని ప్రణాళికను అర్థం చేసుకోవడానికి మనకు సహాయపడే మరియు మన పరలోక తండ్రితో నిబంధనలు చేసి, పాటించడానికి మనల్ని నడిపించే నిత్య సత్యాలను గుర్తించండి.

• మీ అధ్యయనంలో మీరు నేర్చుకున్న ముఖ్యమైన వాక్యభాగాలను గుర్తించండి మరియు మీ భావాలను వ్రాయండి.

మోర్మన్ గ్రంథము మన ఆత్మల యొక్క ప్రశ్నలకు జవాబివ్వగల శక్తిని కలిగియున్నది. “అవి మాకు ప్రయోజనకరముగా ఉండునట్లు మరియు మేము నేర్చుకొనునట్లు లేఖనములన్నిటినీ మాతో పోల్చితిని”(1 నీఫై 19:23) అని నీఫై చెప్పినట్లుగా, మనం కుడా చెప్పగలగాలి.

మనం క్రీస్తు యొక్క మాటలను విందారగిస్తుండగా, అవి బయల్పాటుకు ద్వారం తెరుస్తాయి మరియు మన జీవితంలోని వివిధ పరిస్థితులలో ఆయనకు దగ్గరగా ఉండడానికి మనం ఏమి చేయాలో మనకు చూపుతాయి.

జీవ వృక్ష ఫలమును తన కుటుంబంతో పంచుకోవాలని లీహై కోరినట్లుగా (1 నీఫై 8:12 చూడండి), మనం మోర్మన్ గ్రంథమును గూర్చి సాక్ష్యమును పొందినప్పుడు, యేసు క్రీస్తు యొక్క సువార్తను తెలుసుకొనుట నుండి కలిగిన ఆనందాన్ని పంచుకోవాలనే కోరికను మనం వృద్ధి చేస్తాము.

ఈ సమావేశములో మాతో పాటు హాజరవుతున్న మా సువార్తికులలో ఒకరైన, సహోదరి బెన్సన్, తన తమ్ముడికి సహాయపడాలనే తన కోరికను నాతో పంచుకుంది. ఆ సమయంలో, అతను కళాశాలకు హాజరు కావడానికి సిద్ధపడుతున్నాడు మరియు సువార్తసేవ చేయడం గురించి ఖచ్చితంగా లేడు. ఆమె సువార్తసేవ సమయంలో మొదటి నాలుగు నెలల కాలంలో మోర్మన్ గ్రంథమును చదివి, తనకు ఇష్టమైన వచనాలను గుర్తించి, తరువాత ఆ ప్రతిని తన సోదరునికి పంపమని సహోదరి బెన్సన్‌‌ను ఆహ్వానించాలని నేను ప్రేరేపించబడ్డాను.

సహోదరి బెన్సన్‌ గుర్తించబడిన మోర్మన్ గ్రంథ ప్రతిని తన సోదరునికి పంపి, ప్రతీ రాత్రి దాని నుండి చదవమని ఆహ్వానించింది. తరువాత ఆమె నాతో ఇలా పంచుకున్నది: “నా సువార్తసేవకు ముందు, నా సోదరుడు పూర్తి-కాల సువార్తసేవ చేయాలనుకుంటున్నాడో లేదో ఖచ్చితంగా తెలియలేదు. నెమ్మదిగా కాలక్రమేణా, అతడు మోర్మన్ గ్రంథమును చదివినప్పుడు, అతడు తన జీవితంలో హెచ్చింపబడిన ఆనందాన్ని కనుగొన్నాడు మరియు సువార్తసేవ చేయాలని ఆలోచించడం ప్రారంభించాడు.”

సహోదరి బెన్సన్‌ తన సువార్తసేవ పూర్తి చేయడానికి రెండు వారాల ముందు, ఆమె సోదరుడు అతని సువార్తసేవకు పిలుపు అందుకున్నాడు. ఇప్పుడు అతడు మెక్సికో టక్స్‌ట్లా గుటియర్జ్ మిషనులో సేవ చేస్తున్నాడు. మోర్మన్ గ్రంథము ద్వారా, ఎల్డర్ బెన్సన్‌ తన జీవితాన్ని ఆధ్యాత్మిక స్పష్టతతో చూడగలిగాడు, అది ప్రభువుకు సేవ చేయాలని నిర్ణయించడానికి మరియు విషయాలు సక్రమంగా జరుగుతాయని నమ్మడానికి అతన్ని నడిపించింది. ఆ నిర్ణయం ఒక అద్భుతం— క్రీస్తు యొక్క మాటల శక్తి ద్వారా ప్రభావితం చేయబడింది.

నా ప్రియమైన సహోదర సహోదరీలారా, మోర్మన్ గ్రంథమును మరింత లోతుగా అధ్యయనం చేయమని మీలో ప్రతి ఒక్కరినీ నేను ప్రోత్సహిస్తున్నాను. మనం మోర్మన్ గ్రంథములో కనుగొనబడిన క్రీస్తు యొక్క మాటలను విందారగించినప్పుడు, నిత్య సత్యములను గ్రహించడానికి మరియు ప్రభువు తన సందేశాన్ని వినడానికి సిద్ధపరచిన వారికి విశ్వాసంతో మన సాక్ష్యాలను పంచుకోవడానికి ఆత్మ మనకు సహాయపడతారని నాకు తెలుసు. ప్రభువు ఇలా బోధించారు, “నేను ఎన్నుకొనిన వారు నా స్వరమును వినెదరు, వారి హృదయములను కఠినపరచుకొనరు” (సిద్ధాంతము మరియు నిబంధనలు 29:7). ఎవరైతే విశ్వాసముతో దేవుడిని అడుగుతారో వారు పరిశుద్ధాత్మ శక్తి చేత మోర్మన్ గ్రంథము యొక్క సత్యమును గూర్చి మరియు దైవత్వమును గూర్చి సాక్ష్యమును పొందుతారని నేను సాక్ష్యమిస్తున్నాను. దీనిని గూర్చి నేను యేసు క్రీస్తు నామములో సాక్ష్యమిస్తున్నాను, ఆమేన్.