మీ స్వంత కృపాధారమును విడిచిపెట్టవద్దు

ఒకసారి ఒక పాఠశాల ఉపాధ్యాయురాలు తిమింగలాలు—పెద్దగా ఉన్నప్పటికీ—చిన్న గొంతులను కలిగియున్నందున అవి మనిషిని మింగలేవని బోధించారు. “కానీ యోనా తిమింగలం చేత మింగివేయబడ్డాడు” అని ఒక అమ్మాయి అభ్యంతరం తెలిపింది. “అది అసాధ్యం” అని ఉపాధ్యాయురాలు బదులిచ్చారు. ఇంకా నమ్మకం కలగక, ఆ అమ్మాయి, “సరే, నేను పరలోకానికి వెళ్ళినప్పుడు, నేను అతనిని అడుగుతాను” అని చెప్పింది. “యోనా ఒక పాపి అయ్యుండి, పరలోకానికి వెళ్ళకపోతే ఎలా?” అని ఉపాధ్యాయురాలు అపహాస్యం చేసింది. “అప్పుడు మీరతనిని అడగవచ్చు” అని ఆ అమ్మాయి సమాధానం ఇచ్చింది.

మనము నవ్వుతాము, కానీ యోనా కథ “సంతోషమును వినయముగా వెదకు ప్రతి వారికి,” ముఖ్యంగా కష్టాలలో ఉన్నవారికి అందించే శక్తిని మనం కోల్పోకూడదు.

పశ్చాత్తాపాన్ని ప్రకటించడానికి “నీనెవెకు పొమ్ము” అని దేవుడు యోనాను ఆజ్ఞాపించారు. కానీ నీనెవె ప్రాచీన ఇశ్రాయేలు యొక్క బద్ధ శత్రువు—కాబట్టి యోనా సరిగ్గా దానికి వ్యతిరేక దిశలో, వెంటనే ఓడలో తర్షీషునకు బయలుదేరతాడు. అతను తన పిలుపు నుండి దూరంగా ప్రయాణిస్తుండగా, ఓడ బద్ధలైపోవునంత గొప్ప తుఫాను రేగుతుంది. తన అవిధేయతే కారణమని నిర్ధారించుకున్న యోనా, తనను సముద్రములో పడవేయమని స్వచ్ఛందంగా ముందుకు వస్తాడు. అది ఉగ్ర సముద్రమును శాంతింపజేసి, ఓడలో ఉన్న అతని సహచరులను కాపాడుతుంది.

అద్భుతరీతిగా, ప్రభువు “నియమించిన” ఒక “గొప్ప మత్స్యము” యోనాను మ్రింగినప్పుడు అతను మరణం నుండి తప్పించుకుంటాడు. కానీ, చివరికి అతన్ని పొడి నేలపై ఉమ్మివేసే వరకు అతను ఆ నమ్మశక్యం కాని చీకటి మరియు మురికి ప్రదేశంలో మూడు రోజులపాటు క్షీణిస్తూ ఉండిపోతాడు. తరువాత అతను నీనెవెకు తన పిలుపును అంగీకరిస్తాడు. అయినప్పటికీ, పట్టణమంతా పశ్చాత్తాపపడి కీడు నుండి తప్పించుకున్నప్పుడు, తన శత్రువుల పట్ల చూపబడిన కరుణను బట్టి యోనా కోపగించుకుంటాడు. ఆయన తన పిల్లలందరినీ ప్రేమిస్తున్నారని మరియు రక్షించడానికి ప్రయత్నిస్తున్నారని దేవుడు ఓపికగా యోనాకు బోధిస్తారు.

తన విధులలో ఒకటి కంటే ఎక్కువసార్లు తడబడుతూ, మర్త్యత్వంలో “అందరు పతనమైయున్నారు,” అనే ఒక స్పష్టమైన సాక్ష్యాన్ని యోనా అందిస్తున్నాడు. పతనమైయున్న వారి సాక్ష్యాన్ని గురించి మనము తరచుగా మాట్లాడము. కానీ మనలో ప్రతి ఒక్కరూ నైతిక, శారీరక మరియు సందర్భోచిత సవాళ్లతో ఎందుకు పోరాడుతున్నారనే దానిపట్ల సిద్ధాంతపరమైన అవగాహన మరియు ఆధ్యాత్మిక సాక్ష్యం కలిగియుండడం ఒక గొప్ప దీవెన. ఇక్కడ భూమిపై, భయానకమైన కలుపు మొక్కలు పెరుగుతాయి, బలమైన ఎముకలు కూడా విరిగిపోతాయి మరియు అందరు “దేవుడు అనుగ్రహించు మహిమను పొందలేకపోవుచున్నారు.” అయితే ఆదాము హవ్వలు చేసిన ఎంపికల ఫలితంగా—ఈ మర్త్య స్థితి—“[మనం] సంతోషమును కలిగియుండునట్లు,” మనం ఉనికిలో ఉండడానికి చాలా అవసరం. మన మొదటి తల్లిదండ్రులు నేర్చుకున్నట్లుగా, పతనమైన ప్రపంచం యొక్క చేదును మరియు బాధను అనుభవించడం ద్వారా మాత్రమే మనం నిజమైన సంతోషాన్ని అనుభవించగలము, ఆనందించగలము.

పతనం యొక్క సాక్ష్యం, పాపాన్ని లేదా జీవిత విధులలో నిర్లక్ష్యంగా వ్యవహరించడాన్ని క్షమించదు, దానికి ఎల్లప్పుడూ శ్రద్ధ, సద్గుణము మరియు జవాబుదారీతనం అవసరం. అయితే విషయాలు తప్పుగా జరిగినప్పుడు లేదా కుటుంబ సభ్యుడు, స్నేహితుడు లేదా నాయకుడిలో మనం నైతిక పతనాన్ని చూసినప్పుడు, అది మన నిరాశను తగ్గించాలి. చాలా తరచుగా ఇలాంటి విషయాలు మన విశ్వాసాన్ని దోచుకునే వివాదాస్పద విమర్శలకు లేదా ఆగ్రహానికి లోనయ్యేలా చేస్తాయి. కానీ పతనం యొక్క దృఢమైన సాక్ష్యం యోనా వర్ణించిన విధంగా మనం దేవునిలాగా ఉండడానికి సహాయపడుతుంది, అంటే—తప్పించుకోలేని మన అపరిపూర్ణ స్థితిలో కూడా—మనతో సహా అందరి పట్ల “కటాక్షమును జాలియును బహు శాంతమును అత్యంత కృపను” కలిగియుండాలి.

పతనం యొక్క ప్రభావాలను వ్యక్తపరచడం కంటే గొప్పగా, యోనా కథ మనల్ని ఆ ప్రభావాల నుండి విడిపించగల ఆయన వైపు శక్తివంతంగా నడిపిస్తుంది. ఓడలో ఉన్న తన సహచరులను కాపాడడానికి యోనా చేసిన ఆత్మ-త్యాగం నిజంగా క్రీస్తు వంటిది. మూడుసార్లు యేసు తన దైవత్వానికి సంబంధించిన అద్భుతమైన సూచన కోసం ఒత్తిడి చేయబడినప్పుడు, ఆయన, “యోనా మూడు రాత్రింబగళ్లు తిమింగలము కడుపులో ఏలాగుండెనో ఆలాగు మనుష్య కుమారుడు మూడు రాత్రింబగళ్లు భూగర్భములో ఉండును” అని ప్రకటించుచూ, “యోనాను [యోనా] గూర్చిన సూచక క్రియయే గాని మరి ఏ సూచక క్రియయైనను వారికి అనుగ్రహింపబడదు,” అని పేర్కొన్నారు. రక్షకుని త్యాగపూరిత మరణం మరియు మహిమాన్విత పునరుత్థానానికి చిహ్నంగా, యోనా లోపభూయిష్టంగా ఉండియుండవచ్చు. అయితే తిమింగలం కడుపులో యేసు క్రీస్తు పట్ల అర్పించబడిన ఆయన వ్యక్తిగత సాక్ష్యాన్ని మరియు నిబద్ధతను చాలా హృదయ విదారకంగా మరియు స్ఫూర్తిదాయకంగా ఉండేలా చేసింది అదే.

యోనా ప్రభువుకు చేసిన విన్నపం సంక్షోభంలో ఉన్న ఒక మంచి వ్యక్తి యొక్క విన్నపం వంటిది, ఇది అతడు తనకు తానుగా చేసుకున్నది. ఒక పరిశుద్ధునికి, చాలా మంచి ఉద్దేశ్యాలు మరియు నిజాయితీగల ప్రయత్నాలు ఉన్నప్పటికీ, ఒక విచారకరమైన అలవాటు, వ్యాఖ్య లేదా నిర్ణయం వలన విపత్తు సంభవించినప్పుడు, అది ముఖ్యంగా బాధను మరియు ఒకరిని విడిచిపెట్టిన అనుభూతిని కలిగించవచ్చు. కానీ మనం ఎదుర్కొనే విపత్తు యొక్క కారణం లేదా స్థాయి ఏదైనప్పటికీ, నిరీక్షణ, స్వస్థత మరియు ఆనందానికి ఎల్లప్పుడూ అవకాశం ఉంటుంది. యోనా మాట వినండి:

“నేను ఉపద్రవములో ఉండి యెహోవాకు మనవిచేయగా … ; పాతాళగర్భములోనుండి నేను కేకలు వేయగా. …

“నీవు నన్ను అగాధమైన సముద్రగర్భములో పడవేసియున్నావు, …

“నీ సన్నిధిలోనుండి నేను వెలివేయబడినను, నీ పరిశుద్ధాలయముతట్టు మరల చూచెదననుకొంటిని.

“ప్రాణాంతము వచ్చునంతగా జలములు నన్ను చుట్టుకొనియున్నవి, సముద్రాగాధము నన్ను ఆవరించియున్నది. సముద్రపు నాచు నా తలకు చుట్టుకొనియున్నది.

“ … ఇంకా పర్వతముల పునాదులలోనికి నేను దిగియున్నాను, …నీవు నా ప్రాణమును కూపములోనుండి పైకి రప్పించియున్నావు.

“ … నా ప్రాణము నాలో మూర్ఛిల్లగా నేను యెహోవాను జ్ఞాపకము చేసికొంటిని; నీ పరిశుద్ధాలయములోనికి … నా మనవి వచ్చెను.

“అసత్యమైన వ్యర్థదేవతలయందు లక్ష్యముంచువారు తమ కృపాధారమును విసర్జింతురు.

“కృతజ్ఞతాస్తుతులు చెల్లించి నేను నీకు బలులనర్పింతును, నేను మ్రొక్కుకొనిన మ్రొక్కుబళ్లను చెల్లింపక మానను. యెహోవా యొద్దనే రక్షణ దొరకును.”

ఇది చాలా సంవత్సరాల క్రితం జరిగినప్పటికీ, వ్యక్తిగత నరక కూపములో ఉన్నప్పుడు, నేను ఎక్కడ కూర్చున్నానో, నేను ఈ లేఖనాన్ని కనుగొన్నప్పుడు నాకు ఏమి అనిపించిందో నేను మీకు ఖచ్చితంగా చెప్పగలను. అప్పుడు నేను భావించినట్లే—నేడు మీరు కూడా తోసివేయబడ్డారని, లోతైన నీటిలో మునిగిపోతున్నారని, మీ తల చుట్టూ సముద్రపు నాచు చుట్టుకుని, మీ చుట్టూ సముద్రపు పర్వతాలు కూలిపోతున్నాయని భావిస్తుంటే—యోనా ప్రేరణతో నా విన్నపం ఏమిటంటే: మీ స్వంత కృపాధారమును విడిచిపెట్టవద్దు. మీ మానవ లోపాలు ఉన్నప్పటికీ, మీకు దైవిక సహాయం మరియు స్వస్థత తక్షణమే లభిస్తుంది. విస్మయపరిచే ఈ దయ యేసు క్రీస్తు యందు మరియు ఆయన ద్వారానే లభిస్తుంది. ఆయన మిమ్మల్ని పరిపూర్ణంగా తెలుసుకుని ప్రేమిస్తున్నారు కాబట్టి, ఆయన దానిని మీకు “స్వంతమైనట్లు”గా అందిస్తున్నారు, అంటే అది మీకు సరిగ్గా సరిపోతుంది, మీ వ్యక్తిగత వేదనలను తగ్గించడానికి మరియు మీ ప్రత్యేక బాధలను నయం చేయడానికి రూపొందించబడింది. కాబట్టి, పరలోకము కోసం మరియు మీ కోసం, యేసు క్రీస్తు దయను విడిచిపెట్టవద్దు. దానిని అంగీకరించండి. మీ ఆధ్యాత్మిక బాధ్యతల నుండి దూరంగా ప్రయాణించడం ద్వారా ఉపశమనం లభిస్తుందని మీరు భావించేలా చేసే అపవాది యొక్క “అసత్యమైన వ్యర్థదేవతలను” వినడానికి నిరాకరించడం ద్వారా ప్రారంభించండి. బదులుగా, పశ్చాత్తాపపడిన యోనా దారిని అనుసరించండి. దేవునికి మొరపెట్టండి. దేవాలయం వైపు తిరగండి. మీ నిబంధనలకు కట్టుబడి ఉండండి. ప్రభువును, ఆయన సంఘమును మరియు ఇతరులను, త్యాగము మరియు కృతజ్ఞతతో సేవించండి.

ఈ పనులు చేయడం వలన దేవునికి మీ పట్ల ఉన్న ప్రత్యేక నిబంధన ప్రేమ యొక్క దర్శనం లభిస్తుంది—హెబ్రీ బైబిలు దీనిని హెసెడ్ అని పిలుస్తుంది. దేవుని యొక్క నమ్మకమైన, అలసిపోని, తరగని మరియు “మృదు కనికరముగల” శక్తిని మీరు చూస్తారు మరియు అనుభూతి చెందుతారు, అది మిమ్మల్ని ఎటువంటి పాపం లేదా ఎటువంటి ఎదురుదెబ్బ నుండైనా “విడుదల పొందే … బలవంతులుగా” చేయగలదు. ప్రారంభ మరియు తీవ్రమైన వేదన మొదట ఆ దృష్టిని కప్పివేయవచ్చు. అయితే “[మీరు] మ్రొక్కుకొనిన మ్రొక్కుబళ్లను చెల్లించడం కొనసాగిస్తున్నప్పుడు,” అలాంటి దర్శనం మీ ఆధ్యాత్మిక దృక్పథాన్ని మరింత కాంతివంతముగా ప్రకాశింపజేస్తుంది. ఆ దర్శనంతో మీరు నిరీక్షణ మరియు స్వస్థతను మాత్రమే కాకుండా, ఆశ్చర్యకరంగా, మీ కష్టతరమైన పరీక్షల మధ్య కూడా ఆనందాన్ని పొందుతారు. అధ్యక్షులు రస్సెల్ ఎమ్. నెల్సన్ మనకు చాలా చక్కగా బోధించారు: “మన జీవితాల యొక్క దృష్టి దేవుని యొక్క రక్షణ ప్రణాళిక … యేసు క్రీస్తు మరియు ఆయన సువార్తపై ఉన్నప్పుడు, మన జీవితాలలో—జరుగుచున్న దానిని లేదా జరగని దానిని లక్ష్యపెట్టకుండా మనం ఆనందాన్ని అనుభవించవచ్చు. ఆనందము ఆయన నుండి మరియు ఆయన వలన కలుగుతుంది.”

మనం యోనా వలె లోతైన విపత్తును ఎదుర్కొంటున్నా లేదా మన అపరిపూర్ణ ప్రపంచంలోని రోజువారీ సవాళ్లను ఎదుర్కొంటున్నా, ఆహ్వానం ఒకటే: మీ స్వంత కృపాధారమును విడిచిపెట్టవద్దు. యోనా యొక్క చిహ్నాన్ని, జీవించియున్న క్రీస్తును చూడండి, మీ కోసం—ఆయన మూడు రోజుల సమాధి నుండి లేచి అన్నింటినీ జయించారు. ఆయన వైపు తిరగండి. ఆయన యందు విశ్వాసముంచండి. ఆయనను సేవించండి. సంతోషంగా ఉండండి. ఎందుకంటే ఆయనలో, ఆయనలో మాత్రమే, పతనం నుండి పూర్తి మరియు సంతోషకరమైన స్వస్థత, మనందరికీ అత్యవసరంగా కావలసిన మరియు వినయంగా కోరుకుంటున్న స్వస్థత లభిస్తుంది. ఇది నిజమని నేను సాక్ష్యమిస్తున్నాను. యేసు క్రీస్తు యొక్క పవిత్ర నామములో, ఆమేన్.