యేసు క్రీస్తు మరియు మీ నూతన ప్రారంభం

యేసు “మేలు చేయుచు సంచరించుచుండెను.” ఆ సరళమైన నివేదికను మనం అపొస్తలుల కార్యములు గ్రంథములో చదువుతాము. అది ఎంత తక్కువగా చెప్పబడింది! యేసు నిజంగా మేలు చేయుచు సంచరించుచుండెను! ఆయనే మంచితనానికి—మూలము మరియు—సారాంశం! ఆయన తన మర్త్య జీవితమంతా మంచి చేయడానికి అంకితం చేశారు. ఆయన “కనికరము, దయ, దీర్ఘశాంతము, విస్తారమైన కృపాసత్యములుగలవాడు.”

ఆయన మంచితనాన్ని, కనికరమును వర్ణించడానికి లేదా సంగ్రహించడానికి చేసే ఏ ప్రయత్నమైనా తక్కువ అంచనా వేయడమే అవుతుంది! నిజంగా, అపొస్తలుడైన యోహాను వ్యక్తపరచడానికి ప్రయత్నించినట్లుగా, రక్షకుని మంచితనం యొక్క ప్రతి ప్రత్యక్షతను నమోదు చేయడానికి మనం ప్రయత్నిస్తే, “అట్లు వ్రాయబడిన గ్రంథములకు భూలోకమైనను చాలదు.”

యేసు “మేలు చేయుచు” సంచరించుటను గురించి లేఖనములో నుండు నిర్దిష్ట ఉదాహరణలు మనకు శాశ్వతముగా లోతైన విస్మయాన్ని మరియు ఆశ్చర్యాన్ని రేకెత్తిస్తాయి, ప్రత్యేకించి అక్కడ ఉండడం, ఆయన అద్భుతాలను చూడడం, ఆయన బోధనలను స్వీకరించడం మరియు ఆయన స్వస్థతను అనుభవించడం ఎలా ఉండేదో అని మనం నిజంగా ఆలోచించినప్పుడు. ఆయన సమాజ బహిష్కృతులతో సంభాషించారు, రోగులను మరియు అపవిత్రులను తాకారు, అలసిపోయిన వారికి ఓదార్పునిచ్చారు, విముక్తి కలిగించే సత్యాన్ని బోధించారు మరియు పాపులను పశ్చాత్తాపపడమని పిలిచారు. ప్రతి కుష్టురోగికి, అంధునికి, వ్యభిచారిణికి; కుంటివానికి, చెవిటివానికి, మూగవానికి; దుఃఖిస్తున్న ప్రతి తల్లికి, నిరాశ చెందిన తండ్రికి, రోదిస్తున్న విధవరాలికి; ఖండించబడిన, అవమానించబడిన మరియు బాధలో ఉన్నవారికి; శారీరకంగా లేదా ఆత్మీయంగా మరణించినవారికి, ఆయన చేసింది ఏమిటంటే ఒక నూతన ప్రారంభాన్ని అందించడం. అవును, దిగ్భ్రాంతి కలిగించేలా మరొక తక్కువ అంచనా!

ఆయన చెప్పిన మరియు చేసిన ప్రతిదీ, ఆయన స్వస్థపరిచిన, ఆశీర్వదించిన, బోధించిన మరియు పాపం నుండి విముక్తి కలుగజేసిన ప్రతి ఒక్కరికీ ఒక నూతన ప్రారంభాన్ని అందించింది. ఆయన వారినుండి ఉపసంహరించుకోలేదు మరియు ఆయన నిశ్చయముగా మీ నుండి ఉపసంహరించుకోరు. ఈ క్షణంలో ఆయన నుండి ఈ జీవదాయకమైన మాటలు వినడాన్ని ఊహించుకోండి:

“కుమారుడా, నీ పాపములు క్షమింపబడియున్నవి.”

“చిన్నదానా, లెమ్మని నీతో చెప్పుచున్నాను.”

“నీవు శుద్ధుడవు కమ్ము.”

“నేనును నీకు శిక్ష విధింపను; నీవు వెళ్ళి ఇక పాపము చేయకుము.”

“కుమారీ, నీ విశ్వాసము నిన్ను స్వస్థపరచెను, సమాధానము కలదానవై పొమ్ము.”

ఈ వ్యక్తులకు రక్షకుని యొక్క మాటలు క్లుప్తంగా ఉన్నాయి, కానీ వాటితో ఆయన క్షమాపణ, స్వస్థత, పునఃస్థాపన, శాంతి మరియు నిత్యజీవానికి సంబంధించిన విస్తారమైన కొత్త క్షితిజాలను చిత్రించారు. మహిమగల వార్త ఏమిటంటే, ఆయన మీకు మరియు నాకు ఒకే రకమైన నూతన ప్రారంభాన్ని అందిస్తున్నారు. మనమందరం యేసు క్రీస్తు ద్వారా మరియు ఆయన వలన ఒక నూతన ప్రారంభాన్ని పొందగలము. మీరు కూడా. తన పిల్లల కొరకు తండ్రి యొక్క ప్రణాళికలో నూతన ప్రారంభాలు ప్రధానమైన భాగము. ఇది నూతన ప్రారంభాల సంఘము! నూతన ఆరంభాల సంఘము!

నీటి ద్వారా మరియు ఆత్మ ద్వారా బాప్తిస్మంతో, మనం “నూతనముగా జన్మించాము” మరియు “నూతనజీవము పొంది నడవగలము.” పాప భారంతో నలిగిపోయిన లేదా సమస్యాత్మక జీవితం మరియు పనిచేయని సంబంధాల ప్రభావాలతో బాధపడుతున్న వ్యక్తికి ఆ నూతన ప్రారంభం ఎంత నిరీక్షణను తెస్తుంది? యేసుకు పాప క్షమాపణ లేదా జీవితంలో నూతన ప్రారంభం అవసరం లేదు, అయినప్పటికీ ఆయన బాప్తిస్మం తీసుకున్నారు, మనలో ప్రతీ ఒక్కరి కొరకు ఆయన సాధ్యం చేసిన నూతన ప్రారంభానికి మార్గాన్ని మనకు గొప్ప ఉపశమనంగా చూపించారు.

మన నూతన ప్రారంభం ఒక్కసారిగా జరగదు. మన బాప్తిస్మము అనేది ఒక నూతన ప్రారంభంలో మన ఏకైక అవకాశం అని మనం అనుకుంటాము. అంతే కదా. మనం ఒక్క అవకాశం మాత్రమే కలిగియుండలేదు. ఈ నూతన ప్రారంభాలు ప్రతిరోజూ జరగవచ్చు! మరియు మనకు అవసరమైనన్ని నూతన ప్రారంభాలను ఇచ్చే నిర్దిష్ట ఉద్దేశ్యంతో మరణించిన మన పరిపూర్ణ రక్షకుడి బహుమానాన్ని జ్ఞాపకం చేసుకుంటూ మనం ఒక చిన్న రొట్టె ముక్క తిని, ఒక చిన్న కప్పు నీరు త్రాగినప్పుడు, ఖచ్చితంగా ప్రతీవారం జరగవచ్చు! మనకు అవసరమైనన్ని నూతన ప్రారంభాలను యేసు మనకు ఇస్తారు.

క్రీస్తునందు నూతన జీవితంలో నిబద్ధత మరియు ఆనందంతో, మనం “నూతన సృష్టి”గా మారగలము, అక్కడ పాతవి గతించిపోయి, అన్నీ క్రొత్తవి అవుతాయి. పతనమైన ప్రపంచంలో జీవించడం వల్ల అవాంతరాలు ఎదురైనప్పటికీ, మన విమోచకుని స్వస్థత మరియు పునఃస్థాపన శక్తిపై విశ్వాసాన్ని ఎంచుకోవడం ద్వారా ప్రయత్నిస్తూనే ఉన్న ఆత్మకు అటువంటి నూతన ప్రారంభం ఎలాంటి ఉపశమనాన్ని తెస్తుంది? తండ్రి చిత్తాన్ని నెరవేర్చడానికి మరియు తన దైవిక ప్రాయశ్చిత్త లక్ష్యాన్ని పూర్తి చేయడానికి తన నిబద్ధతను రక్షకుడు ఎప్పుడూ వదులుకోలేదు, ఆయన బాధ వలన వణకి, ప్రతి స్వేద రంధ్రము నుండి రక్తము కారి, శరీరము, ఆత్మ శ్రమపడి—ఆ చేదు గిన్నెనుండి త్రాగకుండా వెనుదిరగాలని ప్రార్థిస్తున్నప్పటికీ. మళ్ళీ, దేవునితో నమ్మకమైన ఓర్పు ఎలా ఉంటుందో ఆయన మనకు ప్రదర్శిస్తున్నారు.

మనం చేసే ప్రతి నిబంధనతో, దానిని పాటించడానికి మనం చేసే ప్రతి ప్రయత్నంతో, మనం “నూతన హృదయం” మరియు “నూతన ఆత్మ” యొక్క పూర్తి స్థాయిని పొందగలము. క్రమంగా, మనం ఆయన మంచితనాన్ని మన హృదయాలలోకి ఆహ్వానించి, మన ఆలోచనలలోని స్వీయ-ఓటమి స్వరాలను పారద్రోలే కొద్దీ, మనం ఆయన జనులమవుతాము, ఎందుకంటే మనం నిజంగా ఆయనను మన దేవుడిగా చేసుకుంటాము. యేసు మన రాజుగా, మన గొర్రెల కాపరిగా, మన సమాధానకర్తయగు అధిపతిగా ఉండాలని ఎంతగానో కోరుకుంటున్నారు మరియు మనం ఆయనను మన హృదయాలలో, మనస్సులలో అలా చేసుకోవాలని ఎంచుకోగలము.

పశ్చాత్తాపం మన నూతన ప్రారంభాలకు, నూతన ఆరంభాలకు మరియు రెండవ అవకాశాలకు ద్వారాలను తెరుస్తుంది. మన ప్రియమైన అధ్యక్షులు రస్సెల్ ఎమ్. నెల్సన్ గారి బోధనలు పశ్చాత్తాపం అనే దైవిక బహుమానం గురించిన అపోహలను తొలగించాయి మరియు తుదకు మనం దానిని గ్రహించడం ప్రారంభించామని నేను భావిస్తున్నాను.

పశ్చాత్తాపం అంటే వారి దృష్టిలో ఏమిటని మన యువత వివరించడాన్ని వినడం ఉత్సాహంగా ఉంటుంది. ఇటీవల ఒక యువతి ముఖంపై చిరునవ్వుతో ఇలా చెప్పడం విన్నాను, “నేను పశ్చాత్తాపం గురించి, అనుదిన పశ్చాత్తాపం గురించి ఆలోచించినప్పుడు, నాకు అద్భుతమైన ఆనందం మరియు నిరీక్షణ కలుగుతుంది. నా పరలోక తండ్రి మరియు నా రక్షకుని ప్రేమను, ఆనందాన్ని నేను అనుభవిస్తాను. ప్రార్థనలో పరలోక తండ్రి వద్దకు రావడానికి మరియు ఏ శ్రమలోనైనా ఆయన సహాయం కోసం అడగడానికి నేను భయపడను. నేను ఏదో తప్పు చేస్తున్నప్పుడు నన్ను పట్టుకోవడానికి వారు ప్రయత్నించడం లేదని నాకు తెలుసు. వారి చేతులు విశాలంగా చాచి ఉన్నాయి. “ఇదే నా దృష్టిలో పశ్చాత్తాపము,” అని ఆమె చెప్పింది. ఈ యువతి, యేసు క్రీస్తు కారణంగా తాను నూతన ప్రారంభాన్ని పొందగలనని అర్థం చేసుకుంది!

మీకు నూతన ప్రారంభం అవసరమా? మీరు క్రొత్తగా ఆరంభించగలరా, మీరు కూడా? రక్షకుడు పరిచర్య చేసిన జనుల గురించి—ఆయన బోధించిన, స్వస్థపరిచిన, లేపిన, క్షమించిన మరియు పునరుద్ధరించిన జనుల గురించి ఆలోచించండి. ఆయన వారిని ఒక నిర్దిష్ట ఆర్థిక తరగతి లేదా నేపథ్యం నుండి ఎంచుకుంటున్నారా? ఆయన నీతిమంతులకు మరియు పాపులకు మధ్య తేడా చూపిస్తున్నారా? ఆ జనులు ఎక్కువ అర్హులు లేదా ఎక్కువ ప్రేమించబడ్డారు కాబట్టి, ఆయన వారిని ప్రత్యేకంగా పేర్కొంటున్నారా? లేదు.

కొందరు ఆయన స్వస్థపరిచే శక్తిని నమ్ముతూ, గొప్ప విశ్వాసంతో ఆయన వద్దకు వచ్చారు—రక్తస్రావ రోగము కలిగిన యొక స్త్రీ, మరణావస్థలోనున్న రోమా యొక్క శతాధిపతి దాసుడు, కుష్ఠురోగి, యాయీరు మరియు బర్తిమయియను గ్రుడ్డివాడు మొదలైనవారు. నజరేతు నుండి వచ్చిన రబ్బీ యొక్క మంచితనం మరియు శక్తి వారి జీవితాలను మరియు వారి అవకాశాలను మారుస్తుందని ఆశిస్తూ, వారిలో ప్రతి ఒక్కరూ తమ విశ్వాసాన్ని పణంగా పెట్టారు. మరియు ఆయన చేసారు. ఆయన తన స్వస్థత శక్తులను స్వేచ్ఛగా ఉపయోగించారు.

కానీ యేసు, బహుశా మీరు చేసినట్లుగానే, “ప్రభువా, నేను నమ్ముచున్నాను, నాకు అపనమ్మకముండకుండ సహాయము చేయుమని” బిగ్గరగా కేకలు వేసిన జబ్బుపడిన బిడ్డ తండ్రి వలె, అస్థిరమైన విశ్వాసంలో ఉన్నవారిని కూడా ఆశీర్వదించారు. వ్యభిచారంలో పట్టుబడిన స్త్రీ, నాయీను విధవరాలు, బెతేస్ద కోనేరు దగ్గర వికలాంగుడు మరియు పుట్టు గుడ్డివాడిలా ఆయనను వెదకని వారిపై కూడా ఆయన కనికరమును క్రుమ్మరించారు. మీరు ఆయనను వెదకకపోయినా లేదా ఆయనను అనుసరించకపోయినా ఆయన మీ జీవితంలో మంచి చేస్తున్నట్లు మీరు భావించారా?

ఈ లేఖన వ్యక్తులలో ప్రతి ఒక్కరికీ మరియు విని, ప్రతిస్పందించే వారందరికీ ఆయన ఒక నూతన ప్రారంభాన్ని ఇచ్చారు, అది పాపం నుండి క్షమించబడిన నూతన జీవితం అయినా లేదా వ్యాధి నుండి స్వస్థత పొందిన నూతన జీవితం అయినా లేదా మరణం నుండి లేపబడిన నూతన జీవితం అయినా.

మీకు మరియు నాకు దాని అర్థం ఏమిటి? ఆయన మంచితనానికి, కరుణకు, ప్రేమపూర్వక దయకు అవధులు లేవు. తండ్రి యొక్క ప్రణాళికలో నూతన ప్రారంభాలు ప్రధానమైనవి! నూతన ఆరంభాలు కుమారుని లక్ష్యం! నూతన అరుణోదయాలు, నూతన అధ్యాయాలు మరియు నూతన అవకాశాలు సువార్త శుభవార్త యొక్క సాధారణ మూలాంశము!

కాబట్టి, నూతన ప్రారంభాన్ని స్వీకరించడానికి మీరు మీ నిబంధనలకు చాలా కాలం దూరంగా ఉన్నారా? లేదు. మళ్ళీ అవకాశం ఇవ్వడానికి మీరు ఏదైనా పేర్కొనబడని చర్యను చాలాసార్లు చేశారా? లేదు. మీరు క్రీస్తు నుండి చాలా దూరం వెళ్ళిపోయారా, ఇక నుండి మీ జీవిత దిశను నూతనంగా మార్చడానికి ఆయన మీకు సహాయం చేయలేకపోయారా? లేదు. మీరు మునిగిపోయారనే ఆలోచన వల్ల ప్రయోజనం పొందేది అపవాది మాత్రమే. మీరు కాదు.

మరియు నూతన ప్రారంభాలు మన పాపాలు మరియు తప్పుల కంటే ఎక్కువ. రక్షకుని మంచితనం మరియు కృప ద్వారా, పాత మనస్తత్వాలు, చెడు అలవాట్లు, క్రోధ స్వభావాలు, ప్రతికూల వైఖరులు, బలహీనతా భావాలు మరియు ఇతరులను నిందించే మరియు వ్యక్తిగత బాధ్యతను తప్పించుకునే ధోరణులను మార్చే నూతన ప్రారంభాలను మనం కలిగి ఉండగలము. సంవత్సరాలుగా మిమ్మల్ని క్షీణింపజేస్తున్న విషయాలను మీరు నిజంగా మార్చుకోవచ్చు. నూతన ప్రారంభాల గురువు బలంతో మీరు మళ్ళీ ప్రారంభించవచ్చు. నూతన ప్రారంభాలను మనకు అందించడంలో ఆయన ఎప్పుడూ అలసిపోరు.

ఒకే పాపంతో లేదా అదే ఎదురుదెబ్బతో పదే పదే పోరాడుతున్న మీరు ముందుకు సాగుతూనే ఉంటారు. ఆయన మీ ముందు ఎలాంటి అడ్డంకిని పెట్టలేదు. ఆయన మీ రెండవ అవకాశాలపై పరిమితిని విధించలేదు. మీరు ముందుకు సాగండి. మీరు ప్రయత్నిస్తూనే ఉండండి. మీ చుట్టూ ఉన్నవారి నుండి సహాయం కోరండి. మరియు మీరు మనస్ఫూర్తిగా మీ తండ్రి తట్టు తిరిగిన ప్రతిసారీ మీ కోసం ఉన్న నూతన ప్రారంభంలో మీరు నమ్మికయుంచండి. ఉద్దేశపూర్వక పాపాలను, యాదృచ్ఛిక పునరావృతాలను మరియు గర్వంతో కూడిన తిరుగుబాటును మీ వెనుక వదిలివేయండి. మీరు ఇంతకు ముందు ఉన్నట్లుగానే ఉండనవసరం లేదు. యేసు క్రీస్తు యొక్క ప్రాయశ్చిత్త రక్తం ద్వారా మీకు అందించబడిన మీ నూతన ప్రారంభాన్ని, మీ రెండవ లేదా మూడవ లేదా నాల్గవ—లేదా వందవ—అవకాశాన్ని స్వీకరించండి.

నాకు ఇవ్వబడిన నూతన ప్రారంభాలకు మరియు నాకు ఇంకా అందించబడే వాటికి నేను వర్ణించలేని విధంగా కృతజ్ఞుడిని.

మన రక్షకుడు చివరిగా తక్కువగా చెప్పబడిన ఒక మాట చెప్పారు, అది లేకుండా నేడు నిరీక్షణకు లేదా ఆనందానికి కారణం ఉండదు. గెత్సేమనే వేదనల తరువాత మరియు హింసాత్మక సిలువ ముగింపులో, ఆయన కేవలం “సమాప్తమైనది” అన్నారు. మెస్సీయ ప్రవచనం నెరవేరింది మరియు మానవాళి పాపాల కొరకు, బాధల కొరకు సంపూర్ణముగా చెల్లించబడింది. ఆయన తన అనంతమైన మరియు శాశ్వతమైన త్యాగం “సమాప్తమైనదని” ప్రకటించారు. అయినప్పటికీ, మూడవ రోజున ఆయన స్వయంగా నూతన జీవితాన్ని అనుభవించే వరకు, తండ్రి యొక్క శక్తి ద్వారా మహిమపరచబడిన, పునరుత్థానం చేయబడిన జీవిగా నూతన ప్రారంభాన్ని పొందే వరకు ఆయన ప్రాయశ్చిత్తం పూర్తికాలేదు.

ఆయన ఎల్లప్పుడూ తన తండ్రికి ఇష్టమైన వాటినే చేసారు మరియు ఆయన “అన్ని విషయములందు తండ్రి యొక్క చిత్తమునకు లోబడియున్నారు,” కాబట్టి మీరు మరియు నేను నూతన ప్రారంభాలను కలిగి ఉండవచ్చు. మీ నూతన ప్రారంభాన్ని ఈరోజే, ఇప్పుడే స్వీకరించండి. యేసు క్రీస్తు మన విశ్వాసమునకు కర్త మరియు దానిని కొనసాగించేవారు, ఆయన మనతో లెక్కలేనన్ని నూతన అధ్యాయాలను వ్రాస్తున్నారు. ఆదియు అంతము ఆయనే—మన అవమానాలకు, బాధలకు ముగింపు మరియు ఆయనలో నూతన జీవితానికి నాంది, ఆయన కృపను పొందేలా, గతాన్ని వెనుక వదిలివేసి, మనకు అవసరమైనన్నిసార్లు నూతన ఉదయాన్ని ప్రారంభించేలా చేస్తారు. నిజంగా, “[మనము] బ్రదుకు దినములన్నియు ఆయన కృపాక్షేమములే [మన] వెంట వచ్చును.” యేసు క్రీస్తు నామములో, ఆమేన్.