నువ్వు నిజంగా ఎవరో తెలుసుకో

రక్షకుడు తన మర్త్య పరిచర్యను ప్రారంభిస్తున్నప్పుడు, ఆయన “దేవునితో ఉండడానికి” అరణ్యములోనికి నడిపించబడ్డారు. బహుశా మనం కేవలం ప్రార్థనలు చేయడం నుండి ప్రతిరోజూ నిజంగా దేవునితో సంభాషించడానికి మరియు “దేవునితో ఉండడానికి” తగినంత సమయం తీసుకొనేలా మన ఆలోచనా విధానాన్ని మార్చుకోవాలి.

నా తండ్రితో మాట్లాడడానికి సిద్ధపడేందుకు కొన్ని నిమిషాలు కేటాయించినప్పుడు నా ప్రార్థనల నాణ్యత మెరుగుపడుతుందని నేను కనుగొన్నాను. ఇది పనిచేసే ఒక నమూనా అని లేఖనాలు మనకు చూపిస్తున్నాయి. అది జోసెఫ్ స్మిత్ అయినా; హీలమన్ కుమారుడు నీఫై అయినా; లేదా ఈనస్ అయినా, దేవునితో నమోదు చేయబడిన వారి సంభాషణకు ముందు అందరూ ఏదో ఒక రకమైన ధ్యానం మరియు ఆలోచన కలిగి ఉంటారు. అతని తండ్రి యొక్క మాటలు అతని హృదయములో లోతుగా నాటుకుపోయినందున అతని ఆత్మ ఆకలిగొనెనని ఈనస్ చెప్పాడు. “దేవునితో ఉండే” సమయం కోసం ప్రతిరోజూ ఆధ్యాత్మికంగా సిద్ధపడవలసిన అవసరాన్ని ఈ ఉదాహరణలలో ప్రతీ ఒక్కటి మనకు బోధిస్తుంది.

రక్షకుడు నీఫైయులకు ఇలా ఆదేశించారు, “నీవు ప్రార్థన చేయునప్పుడు, నీ గది లోనికి వెళ్ళి తలుపువేసి, రహస్యమందున్న నీ తండ్రికి ప్రార్థన చేయుము.”

అది గదిలో అయినా లేదా పడకగదిలో అయినా, మీరు ఒంటరిగా ప్రార్థన చేయడానికి, మీ ఆత్మను నిశ్చలంగా ఉంచడానికి మరియు “మిక్కిలి నిమ్మళముగా మాటలాడు ఒక స్వరము” యొక్క ప్రేరణలను అనుభవించడానికి ఒక స్థలాన్ని కనుగొనడమే సూత్రం. మనం కృతజ్ఞతతో ఉన్న విషయాల గురించి మరియు మన తండ్రి వద్దకు మనం తీసుకురావాలనుకుంటున్న ప్రశ్నలు లేదా ఆందోళనల గురించి ఆలోచించడం ద్వారా మనం సిద్ధపడవచ్చు. మనం వాడుక పద్ధతిలో ప్రార్థించడం కాకుండా, వీలైతే మన తండ్రితో బిగ్గరగా మాట్లాడడానికి ప్రయత్నించాలి.

మన జీవితాల్లోని గందరగోళంలో, మనం పసిపిల్లలతో కుస్తీ పడుతున్నప్పుడు లేదా సమావేశాల మధ్య పరిగెడుతున్నప్పుడు, మనకు విలాసవంతమైన నిశ్శబ్ద గదులు మరియు ఆలోచనాత్మక సిద్ధపాటు ఉండకపోవచ్చు—కానీ మనం రోజు ప్రారంభంలో “దేవునితో ఉండడానికి” ప్రయత్నించినప్పుడు ఆ నిశ్శబ్ద, శీఘ్ర మరియు అత్యవసర ప్రార్థనలు చాలా అర్థవంతంగా ఉంటాయి.

చాలా కాలంగా ప్రార్థన చేయని వారు లేదా తమ ప్రార్థనలు వినబడుతున్నాయని భావించని వారు కొందరు ఉండవచ్చు. మీ పరలోక తండ్రి మిమ్మల్ని ఎరిగియున్నారని, మిమ్మల్ని ప్రేమిస్తున్నారని మరియు మీ నుండి వినాలని కోరుతున్నారని నేను మీకు వాగ్దానం చేస్తున్నాను. ఆయన మీతో సంభాషించాలని కోరుకుంటున్నారు. మీరు ఎవరో మీరు గుర్తుంచుకోవాలని ఆయన కోరుకుంటున్నారు.

ఎల్డర్ జెఫ్రీ ఆర్. హాలండ్ ఇటీవల ఇలా బోధించారు: “మీరు ఎంత గొప్పగా ప్రార్థిస్తున్నా, ఇంకా ప్రార్థించండి. మీరు ఎంత గట్టిగా ప్రార్థించినా, ఇంకా గట్టిగా ప్రార్థించండి.”

మన ప్రార్థనలను తరచుగా చేయడం మరియు వాటి తీవ్రతను పెంచడంతో పాటు, ప్రతిరోజూ మోర్మన్ గ్రంథాన్ని అధ్యయనం చేయడం మరియు దేవాలయములో ఆరాధించడం మన మనస్సులను బయల్పాటు కోసం సిద్ధం చేయడంలో సహాయపడుతుంది. మన పరలోక తండ్రితో మన సంభాషణను మెరుగుపరచుకోవడానికి మనం కృషి చేస్తున్నప్పుడు, మనం ఆయన పిల్లలమని మరింత గాఢంగా భావించేలా ఆయన మనల్ని దీవిస్తారు.

ఆయన పిల్లలుగా మనపై పరలోక తండ్రికి ఉన్న ప్రేమకు గొప్ప నిదర్శనం ఏమిటంటే, మనం ఇంటికి తిరిగి రావడానికి సహాయం చేయడానికి ఆయన తన కుమారుడిని, మన స్వంత రక్షకుడిని పంపారనే వాస్తవికత. కాబట్టి, మనము ఆయనను తెలుసుకోవలసిన అవసరం ఉంది.

చాలా సంవత్సరాల క్రితం, స్టేకు అధ్యక్షుడిగా పనిచేస్తున్నప్పుడు, దేవాలయంలో విధి పనివాడిగా సేవచేయడానికి ఒక సహోదరుడి కోసం నేను సిఫార్సును సమర్పించాను. అతను ఎంత అద్భుతమైన విధి పనివాడు అవుతాడో వివరించిన తర్వాత, నేను అనుకోకుండా “ఆమోదించవద్దు” అని నొక్కాను, అదే సిఫార్సును నేను సమర్పించాను. నేను ఈ సందేశాన్ని రద్దు చెయ్యడానికి ప్రయత్నించి విఫలమైన తర్వాత, దేవాలయ అధ్యక్షుడికి ఫోన్ చేసి, “నేను ఘోరమైన తప్పు చేశాను” అని చెప్పాను. ఆ మంచి దేవాలయ అధ్యక్షుడు, సంకోచం లేకుండా, “అధ్యక్షులు ఏర్, క్షమించబడనిది మరియు తుదకు సరిదిద్దలేనిది ఏదీ మీరు చేయలేదు” అని అన్నారు. ఎంత గొప్ప సత్యము. వాస్తవానికి, యేసు క్రీస్తు “రక్షించుటకు శక్తిమంతుడు.”

2019 లో దేవాలయ సిఫార్సు ప్రశ్నలలో గొప్ప మార్పు వచ్చింది. గతంలో, మన రక్షకుడిగా మరియు విమోచకుడిగా యేసు క్రీస్తు యొక్క పాత్ర గురించి మీకు సాక్ష్యం ఉందా అని ఒక ప్రశ్న అడిగేవారు. ఇప్పుడు మీ రక్షకుడిగా మరియు విమోచకుడిగా ఆయన పాత్ర గురించి మీకు సాక్ష్యం ఉందా అని అడుగుతున్నారు. యేసు క్రీస్తు యొక్క ప్రాయశ్చిత్తము ఇతరులకు మాత్రమే కాదు; అది మీ కొరకు మరియు నా కొరకు పనిచేస్తుంది. ఆయనే నా రక్షకుడు. ఆయనే మీ రక్షకుడు. వ్యక్తిగతంగా. ఆయన ద్వారా మాత్రమే మీరు మరియు నేను మన తండ్రితో ఉండడానికి తిరిగి వెళ్ళగలము.

కాబట్టి, సహోదర సహోదరీలారా, మనం ఆయనను వెతుకుదాం. తండ్రితో మరియు మనలో ప్రతీ ఒక్కరితో ఆయనకున్న దైవిక సంబంధాన్ని అధ్యయనం చేద్దాం. మనం పశ్చాత్తాపపడినప్పుడు, మన విమోచకుడి ద్వారా మనలో ప్రతీ ఒక్కరికి వ్యక్తిగతంగా వచ్చే విమోచించు ప్రేమ గీతమును పాడడాన్ని అనుభవిద్దాం. “రక్షించుటకు శక్తిమంతుడైనవాని” గురించి మనం తెలుసుకున్నప్పుడు, దేవుని పిల్లలుగా, మనమే ఆయన ఆనందము—ఆయన అతి ముఖ్యమైన దృష్టి అని—మరియు మనలో ప్రతి ఒక్కరూ రక్షింపబడడానికి విలువైనవారమని మనం అర్థం చేసుకుంటాము.

మనకు ప్రేమగల పరలోక తండ్రి ఉన్నారని నేను సాక్ష్యమిస్తున్నాను. బలమైన ప్రార్థన, వ్యక్తిగత బయల్పాటు మరియు యేసు క్రీస్తు యొద్దకు వచ్చుట ద్వారా మనం ఈ నిత్య సత్యాన్ని తెలుసుకున్నప్పుడు, మనం ఇప్పుడు మరియు ఎల్లప్పుడూ “నేను దేవుని బిడ్డను” అని ధైర్యంగా ప్రకటించగలము. యేసు క్రీస్తు నామములో, ఆమేన్.