మీ వంతును మీరు మనస్ఫూర్తిగా చేయండి

విమానయాన కల్పిత పరిస్థితుల‌లో నా అనుభవం—ఎగరడం, పడవ నడపడం, విత్తడం లేదా తెలుసుకోవడం వంటి—దేనిలోనైనా నైపుణ్యం సాధించడానికి స్థిరమైన స్వీయ-క్రమశిక్షణ మరియు సాధన అవసరమని నాకు గుర్తు చేసింది.

మీరు ఒక నైపుణ్యాన్ని సంపాదించడంలో లేదా ప్రతిభను అభివృద్ధి చేసుకోవడంలో సంవత్సరాలు గడపవచ్చు. అది మీ స్వభావంగా మారేంతగా మీరు చాలా కష్టపడి పనిచేయవచ్చు. కానీ సాధన చేయడం మరియు అధ్యయనం చేయడం మానేయవచ్చని మీరు అనుకుంటే, మీరు ఒకప్పుడు కష్టపడి సంపాదించిన జ్ఞానం మరియు సామర్థ్యాలను క్రమంగా కోల్పోతారు.

ఇది భాష నేర్చుకోవడం, సంగీత వాయిద్యాన్ని వాయించడం మరియు విమానం నడపడం వంటి నైపుణ్యాలకు వర్తిస్తుంది. ఇది క్రీస్తు యొక్క శిష్యునిగా మారడానికి కూడా వర్తిస్తుంది.

సరళంగా చెప్పాలంటే, శిష్యరికానికి స్వీయ-క్రమశిక్షణ అవసరం.

ఇది యాదృచ్ఛిక ప్రయత్నం కాదు మరియు ఇది ప్రమాదవశాత్తు జరగదు.

యేసు క్రీస్తునందు విశ్వాసము ఒక బహుమానం, కానీ దానిని పొందడం అనేది మన పూర్ణ “శక్తి, మనస్సు మరియు బలము” యొక్క నిబద్ధత అవసరమయ్యే ఒక తెలివైన ఎంపిక. అది ప్రతిరోజూ, ప్రతీ గంట చేసే అభ్యాసం. దానికి నిరంతరం నేర్చుకోవడం మరియు దృఢనిశ్చయంతో కూడిన నిబద్ధత అవసరం. మన విశ్వాసం, రక్షకుని పట్ల మన విధేయత, మర్త్యత్వంలో మనం ఎదుర్కొనే వ్యతిరేకతకు విరుద్ధంగా పరీక్షించబడినప్పుడు బలపడుతుంది. మనం దానిని పోషించుకుంటూనే ఉంటాము, మనం దానిని చురుకుగా అన్వయించుకుంటూ ఉంటాము మరియు మనం దానిని ఎప్పటికీ వదులుకోము, కాబట్టి అది కొనసాగుతుంది.

మరోవైపు, మనం దానిపై చర్య తీసుకోవడం ద్వారా విశ్వాసాన్ని మరియు దాని ఒప్పించే శక్తిని ఉపయోగించడంలో విఫలమైతే, మనం ఒకప్పుడు పవిత్రంగా భావించిన వాటిపై మనకు నమ్మకం తగ్గుతుంది—ఒకప్పుడు నిజమని మనకు తెలిసిన వాటిపై నమ్మకం తగ్గుతుంది.

మనల్ని ఎన్నడూ ఆకర్షించని శోధనలు తక్కువ భయంకరంగా మరియు ఎక్కువ ఆకర్షణీయంగా కనిపించడం ప్రారంభిస్తాయి.

గత సాక్ష్యం యొక్క ప్రభావం కొంతకాలం మాత్రమే ఉండగలదు. అది ప్రకాశవంతంగా ఉండడానికి నిరంతర పోషణ అవసరం.

కొత్త నిబంధనలో, రక్షకుడు తన సేవకులలో ప్రతి ఒక్కరికీ పవిత్రమైన బాధ్యతను—తలాంతులు అని పిలువబడే డబ్బును ఇచ్చిన యజమాని గురించి ఒక ఉపమానాన్ని బోధించారు. తమ తలాంతులను శ్రద్ధగా ఉపయోగించిన సేవకులు వాటిని పెంచుకున్నారు. తన తలాంతును పాతిపెట్టిన సేవకుడు చివరికి దానిని కోల్పోయాడు.

పాఠం ఏమిటి? దేవుడు మనకు జ్ఞానం, సామర్థ్యం, ​​అవకాశం అనే బహుమానాలను ఇస్తారు—మనం వాటిని ఉపయోగించుకోవాలని మరియు విస్తరించాలని ఆయన కోరుకుంటున్నారు, తద్వారా అవి మనల్ని ఆశీర్వదించగలవు మరియు ఆయన ఇతర పిల్లలను ఆశీర్వదించగలవు. ఆ బహుమానాలను మనం అప్పుడప్పుడు ఆరాధించే పతకాల వలె అటకపై ఉంచితే అలా జరగదు. మన బహుమానాలు మనం వాటిని ఉపయోగించినప్పుడు మాత్రమే పెరుగుతాయి మరియు గుణించబడతాయి.

“కానీ ఎల్డర్ ఉఖ్‌డార్ఫ్,” “నాకు ఎలాంటి బహుమానాలు లేదా ప్రతిభలు లేవు—కనీసం, అంత విలువైనవి ఏవీ లేవు” అని మీరు అనవచ్చు. బహుశా మీరు స్పష్టంగా, ఆకట్టుకునేలా కనిపించే బహుమానాలు ఉన్న ఇతరులను చూసి, వారితో పోలిస్తే మీరు చాలా సాధారణమైనవారని భావిస్తారు. పూర్వమర్త్య ఉనికిలో, గొప్ప బహుమానం మరియు ప్రతిభల విందు ఇవ్వబడే రోజున, మీ కంచంలో చాలా తక్కువగా ఉన్నట్లు మీరు ఊహించుకోవచ్చు—ముఖ్యంగా నిండా పేర్చబడిన ఇతరుల కంచా‌లతో పోలిస్తే.

ఓహ్, నేను మిమ్మల్ని హత్తుకుని ఈ గొప్ప సత్యాన్ని అర్థం చేసుకోవడానికి మీకు సహాయం చేయగలిగితే ఎంత బాగుండును: మీరు వెలుగు చేత ఆశీర్వదించబడిన జీవి; అనంతమైన దేవుని యొక్క ఆత్మ బిడ్డ! మరియు మీలో మీరు మీ ఊహకందని సామర్థ్యాన్ని కలిగియున్నారు.

కవులు గుర్తించినట్లుగా, మీరు భూమిపైకి “మీతోపాటు దైవత్వాన్ని తీసుకువస్తారు”!

మీ మూల కథ దైవికమైనది, అలాగే మీ భవితవ్యం కూడా. మీరు ఇక్కడికి రావడానికి పరలోకాన్ని విడిచిపెట్టారు, కానీ పరలోకం మిమ్మల్ని ఎప్పుడూ విడిచిపెట్టలేదు!

మీరు సాధారణమైనవారు కాదు.

మీకు ఒక బహుమానం అనుగ్రహించబడింది!

సిద్ధాంతము మరియు నిబంధనలలో, దేవుడు ఇలా ప్రకటించారు:

“అనుగ్రహించుటకు అనేక బహుమానములు కలవు మరియు దేవుని ఆత్మ వలననే ప్రతి [మనుష్యునికి] ఒక వరము అనుగ్రహింపబడుచున్నది.

“అందరి ప్రయోజనము కొరకు కొందరికి ఒకటి, మరికొందరికి ఇంకొకటి అనుగ్రహింపబడుచున్నది.”

మన బహుమానాలలో కొన్ని లేఖనాలలో జాబితా చేయబడ్డాయి. అనేకము చేయబడలేదు.

గొప్ప ప్రవక్తయైన మొరోనై చెప్పినట్లుగా, “దేవుని బహుమానములను నిరాకరించవద్దు, ఏలయనగా అవి అనేకమైనవి మరియు అవి ఒకే దేవుని నుండి వచ్చును.” వాటిని అవి “అనేక మార్గములలో … ప్రత్యక్షపరచుకోవచ్చు; కానీ అందరిలోను అన్నిటినీ జరిగించు దేవుడు ఒక్కడే.”

మన ఆధ్యాత్మిక బహుమానాలు ఎల్లప్పుడూ ఆకర్షణీయంగా ఉండకపోవచ్చు, దానర్థం అవి తక్కువ ప్రాముఖ్యత కలిగి ఉన్నాయని కాదు. ప్రపంచవ్యాప్తంగా ఉన్న సభ్యులలో నేను గమనించిన కొన్ని ఆధ్యాత్మిక బహుమానాలను మీతో పంచుకోవచ్చా? మీరు ఇటువంటి బహుమానాలు ఒకటి లేదా అంతకంటే ఎక్కువ పొందారేమో ఆలోచించండి:

• కరుణ చూపడం.

• నిర్లక్ష్యం చేయబడిన వ్యక్తులను గమనించడం.

• ఆనందంగా ఉండడానికి కారణాలను కనుగొనడం.

• సమాధానపరచువారిగా ఉండడం.

• చిన్న అద్భుతాలను గమనించడం.

• నిజాయితీగా మెచ్చుకోవడం.

• క్షమించడం.

• పశ్చాత్తాపపడడం.

• సహించడం.

• విషయాలను సరళంగా వివరించడం.

• పిల్లలతో జతచేరడం.

• సంఘ నాయకులను ఆమోదించడం.

• వారు చెందియున్నారని తెలుసుకోవడంలో ఇతరులకు సహాయపడడం.

వార్డు ప్రతిభా ప్రదర్శనలో ఈ బహుమానాలు ప్రదర్శింపబడడాన్ని మీరు చూడకపోవచ్చు. కానీ అవి ప్రభువు పనికి ఎంత విలువైనవో మరియు మీ బహుమానాల ద్వారా మీరు దేవుని పిల్లలలో ఒకరిని ఎలా స్పృశించి, ఆశీర్వదించి లేదా రక్షించి ఉండవచ్చో మీరు చూడగలరని నేను ఆశిస్తున్నాను. గుర్తుంచుకోండి: “చిన్న మరియు సాధారణమైన విషయముల ద్వారా గొప్ప క్రియలు జరిగించబడును.”

కాబట్టి మనలో ప్రతీ ఒక్కరం మన వంతు చేద్దాం.

నా ప్రియమైన సహోదర సహోదరీలారా, ప్రియమైన స్నేహితులారా, దేవుడు మీకిచ్చిన బహుమానాలను మరియు ప్రతిభలను గుర్తించడంలో ఆత్మ మీకు సహాయం చేయాలని నేను ప్రార్థిస్తున్నాను. అప్పుడు, ప్రభువు చెప్పిన ఉపమానంలోని నమ్మకమైన సేవకుల మాదిరిగానే, మనం వాటిని పెంచి, గొప్పగా చేద్దాం.

కరుణామయుడైన మన పరలోక తండ్రి యెదుట మన గృహనిర్వాహకత్వము గురించి లెక్క చెప్పడానికి నిలబడే రోజు వస్తుంది. ఆయన మనకు ఇచ్చిన బహుమానాలతో మనం ఏమి చేసామో—ముఖ్యంగా, ఆయన పిల్లలను ఆశీర్వదించడానికి వాటిని ఎలా ఉపయోగించామో ఆయన తెలుసుకోవాలనుకుంటారు. మనం నిజంగా ఎవరమో, మనం ఎవరిగా మారడానికి రూపొందించబడ్డామో దేవునికి తెలుసు, కాబట్టి మనపై ఆయనకు చాలా అంచనాలు ఉన్నాయి.

కానీ వాటిని చేరుకోవడానికి మనం గొప్ప, వీరోచిత లేదా మానవాతీత ఎత్తు వేయాలని ఆయన ఆశించరు. ఆయన సృష్టించిన ప్రపంచంలో, ఎదుగుదల క్రమంగా మరియు ఓపికగా జరుగుతుంది—కానీ స్థిరంగా మరియు అవిశ్రాంతంగా కూడా జరుగుతుంది.

గుర్తుంచుకోండి, యేసు క్రీస్తు మరణాన్ని మరియు పాపాన్ని జయించినప్పుడు, ఆయన మానవాతీత పాత్రను అప్పటికే పూర్తిచేసారు.

మన వంతు క్రీస్తును అనుసరించడం. పాపాన్ని విడిచిపెట్టి, రక్షకుని వైపు తిరిగి, ఆయన మార్గంలో ఒక్కొక్క అడుగు ముందుకు వేసి నడవడం మన వంతు. శ్రద్ధగా మరియు నమ్మకంగా మనం అలా చేస్తున్నప్పుడు, చివరికి అపరిపూర్ణతలు మరియు లోపాల సంకెళ్లను వదిలించుకుని, క్రీస్తులో మనం పరిపూర్ణులమయ్యే రోజు వరకు నెమ్మదిగా మనం శుద్ధి చేయబడతాము.

ఆశీర్వాదాలు మనకు అందుబాటులో ఉన్నాయి. వాగ్దానాలు అందుబాటులో ఉన్నాయి. తలుపు విశాలంగా తెరిచి ఉంది. ప్రవేశించడం మరియు ప్రారంభించడం మన ఎంపిక.

ప్రారంభం చిన్నదే కావచ్చు. అయినా ఫరవాలేదు.

విశ్వాసం బలహీనంగా ఉన్న చోట, క్రీస్తు యేసుపై మరియు శుద్ధి చేసి, పరిశుద్ధపరిచే ఆయన శక్తిపై నిరీక్షణతో ప్రారంభించండి.

ఈ విశ్వాసం మరియు శిష్యత్వ సవాలును మనం సాధారణ పర్యాటకులుగా కాకుండా, బబులోను‌ను విడిచిపెట్టి, తమ హృదయాలను, మనస్సులను మరియు అడుగులను సీయోను వైపు నిలిపే హృదయపూర్వక విశ్వాసులుగా సమీపించాలని మన తండ్రి అడుగుతున్నారు.

మన ప్రయత్నాలు మాత్రమే మనల్ని పరలోకవాసులుగా చేయలేవని మనకు తెలుసు. కానీ అవి మనల్ని యేసు క్రీస్తుకు విశ్వాసపాత్రులుగా, నిబద్ధులుగా చేయగలవు మరియు ఆయన మనల్ని పరలోకవాసులుగా చేయగలరు.

మన ప్రియమైన రక్షకుని కారణంగా, అపజయం పొందే పరిస్థితి లేదు. మన నిరీక్షణను మరియు విశ్వాసాన్ని ఆయనపై ఉంచితే, మన విజయం నిశ్చయం. ఆయన బలాన్ని, శక్తిని, అపారమైన కృపను మనం పొందుతామని ఆయన వాగ్దానం చేస్తున్నారు. ఆయనతో మరియు మన ప్రియమైన వారితో మనం నిత్య మహిమలో జీవించే ఆ గొప్ప మరియు పరిపూర్ణమైన రోజుకు క్రమంగా, కొద్దికొద్దిగా మనం దగ్గరవుతాము.

అక్కడికి చేరుకోవడానికి, ఈరోజు మరియు ప్రతిరోజూ మన వంతు కృషి చేయాలి. నిన్న మనం తీసుకున్న చర్యలకు మనం కృతజ్ఞులం, కానీ అక్కడితో ఆగము. మనం ఇంకా చాలా దూరం వెళ్ళవలసి ఉందని మనకు తెలుసు, కానీ అది మనల్ని నిరుత్సాహపరచనివ్వము.

క్రీస్తు యొక్క అనుచరులుగా మనం ఎవరమనే దాని సారాంశం అదే.

రక్షకుడిని నమ్మాలని మరియు మీ వంతు కృషిని హృదయపూర్వకంగా చేయడంలో ఓపికగా మరియు శ్రద్ధగా పాల్గొనాలని—తద్వారా మీ ఆనందం సంపూర్ణమవ్వాలని మరియు ఒకనాటికి తండ్రి కలిగియున్నదంతా మీరు పొందాలని సంఘములోని ప్రతి సభ్యుడిని మరియు దానిలో భాగం కావాలని కోరుకునే వారందరినీ నేను కోరుతున్నాను మరియు ఆశీర్వదిస్తున్నాను. దీనిని గూర్చి నేను యేసు క్రీస్తు నామములో సాక్ష్యమిస్తున్నాను, ఆమేన్.